গুৱাহাটীত ক'ৰ'নাত আক্ৰান্ত হ'ল দন্ত চিকিৎসাৰ ছাত্ৰী, আতংক বৃদ্ধি
গুৱাহাটী মহানগৰী তথা ৰাজ্যত অধিক অৱনতি ঘটিছে ক'ৰ'না মহামাৰীজনিত পৰিস্থিতি ৷ শেহতীয়া খবৰ অনুসৰি মহানগৰীত এগৰাকী দন্ত চিকিৎসা বিজ্ঞানৰ ছাত্ৰীৰ শৰীৰত মাৰাত্মক ক'ৰ'না ভাইৰাছৰ উপস্থিতি ধৰা পৰিছে ৷ ছাত্ৰীগৰাকী আঞ্চলিক দন্ত চিকিৎসা মহাবিদ্যালয়ত অধ্যয়নৰত ৷ ছাত্ৰীগৰাকী ক'ৰ'না মহামাৰীৰ দ্বাৰা আক্ৰান্ত হোৱাটো নিশ্চিত কৰাৰ পাছতে চৰকাৰে দন্ত চিকিৎসা মহাবিদ্যালয়খনৰ ছাত্ৰীবাস কণ্টেইনমেণ্ট জ'নৰুপে ঘোষণা কৰে ৷ ছাত্ৰীবাসটোত দুশগৰাকী ছাত্ৰী থাকে। আনহাতে, ৰাজ্যত ক'ৰ'না মহামাৰীৰ দ্বাৰা আক্ৰান্ত লোকৰ সংখ্যা ৫৮জনলৈ বৃদ্ধি পাইছে ।গুৱাহাটীতে পুৰুষ-মহিলাসহ পাঁচজন লোকৰ শৰীৰত ধৰা পৰিছে মাৰাত্মক ক'ৰ'না ভাইৰাছৰ উপস্থিতি ৷ এনে পৰিস্থিতিত চৌদিশে আতংকৰ সৃষ্টি হৈছে।
