৩১মে'ৰ পাছতো অসমত নৈশ কাৰ্ফিউ অব্যাহত থকাৰ সম্ভাৱনা
ভয়াবহ ৰূপত প্ৰাদুৰ্ভাব ঘটা ক'ৰ'না মহামাৰী প্ৰতিৰোধৰ উদ্দেশ্য দেশজুৰি ঘোষণা তলাবন্ধ(ল'ক-ডাউন)ৰ চতুৰ্থ পৰ্যায়ৰ ম্যাদ অহা ৩১মে'ত অন্ত পৰিব ৷ তাৰ পাছত ক'ৰ'না প্ৰতিৰোধৰ বাবে চৰকাৰীভাবে গ্ৰহণ কৰা কাৰ্যসূচী কি হ'ব ? ইয়াক লৈ বহুতৰে মনত কৌতুহলৰ সৃষ্টি হৈছে ৷ আনহাতে, অসমকে ধৰি উত্তৰ-পূবৰ কে'বাখনো ৰাজ্য আৰু দেশৰ বহু কেইখন ৰাজ্যত ক'ৰ'নাত আক্ৰান্তৰ সংখ্যা উদ্বেগজনকভাবে বৃদ্ধি পাই আছে ৷ গতিকে বহুতে ল'ক-ডাউন বাহাল ৰখাৰ পোষকতা কৰিছে। এনে অৱস্থাতে আজি স্বাস্থ্য মন্ত্ৰী হিমন্ত বিশ্ব শৰ্মাই কয় যে অসম চৰকাৰে ৩১মে'ৰ পাছতো নৈশ সান্ধ্য আইন বা কাৰ্ফিউ বাহাল ৰখাৰ পোষকতা কৰিছে ৷ উল্লেখ্য যে বৰ্তমানলৈ অসমত ন শতাধিক লোক ক'ৰ'না মহামাৰীত আক্ৰান্ত হৈছে ৷ ইয়াৰে মাজতে শতাধিক ক'ৰ'না আক্ৰান্ত সুস্থ হৈছে ।এনে পৰিস্থিতি বিৰাজ কৰি থকা সত্বেও স্বাস্থ্য মন্ত্ৰী শৰ্মাই কয়, " নৈশ কাৰ্ফিউৰ বাদে আন সকলো স্বাভাৱিক হ'ব ৷ আমি নৈশ কাৰ্ফিউ অব্যাহত ৰখাৰ পক্ষপাতী । আন নিষেধাজ্ঞাসমূহৰ ক্ষেত্ৰত আমি ভাবো যে আমি সাধাৰণ জীৱনযাত্ৰালৈ উভতি যাব পাৰিম ৷ সন্ধিয়া ছয় বজাৰ পৰিৱৰ্তে নিশা ৯ বজাৰ পৰা কাৰ্ফিউ বলবৎ কৰিলেও তাৰ আমি পোষকতা কৰিম৷" অৱশ্যে এই সংক্ৰান্তীয় চূড়ান্ত সিদ্ধান্ত কেন্দ্ৰীয় চৰকাৰে গ্ৰহণ কৰিব বুলি তেওঁ সদৰী কৰে ৷ এই সম্পৰ্কত ৰাজ্য চৰকাৰে এতিয়াই কোনো কথা ঘোষণা কৰিব নোৱাৰে বুলিও তেওঁ উল্লেখ কৰে ৷
