অইল ইণ্ডিয়া লিমিটেডৰ অধীনৰ তিনিচুকীয়া জিলাৰ বাঘজান তৈল ক্ষেত্ৰৰ অগ্নিকাণ্ডস্থলীৰ ওচৰত এখন বেইলী দলঙৰ নিৰ্মাণৰ কাম আৰম্ভ কৰিছে ভাৰতীয় সেনাই । সেনাৰ তৃতীয় ক'ৰ্পছে এই দলং নিৰ্মাণ কৰিছে ৷ এক বিবৃতিত অইল ইণ্ডিয়া লিমিটেডে এই কথা জানিবলৈ দি কয় যে এই দলং নিৰ্মাণৰ বাবে সেনাই তৃতীয় ক'ৰ্পছৰ তেজপুৰৰ মিছামাৰীস্থিত মুখ্য কাৰ্যালয়ৰ পৰা ৯ ট্ৰাক সামগ্ৰী অনাৰ ব্যৱস্থা কৰিছে ৷ ইয়াৰ পূৰ্বে যোৱা মঙলবাৰে সেনাৰ তৃতীয় ক'ৰ্পছৰ এটা দলে অগ্নিকাণ্ডস্থলীত বেইলী দলং নিৰ্মাণৰ বাবে এক জৰীপ সম্পন্ন কৰে ৷ আনহাতে, অইল ইণ্ডিয়াই জানিবলৈ দিয়া মতে, অগ্নিকাণ্ডস্থলীৰ সন্মুখত তাপৰ এক ঢাল স্থাপনৰ কাম সম্পূৰ্ণ হৈছে ৷ উল্লেখ্য যে যোৱা ২৭মে' আৰু ৯জুনত এই অগ্নিকাণ্ডস্থলীত দুদিন ভয়াবহ অগ্নিকাণ্ডৰ সূত্ৰপাত ঘটে ৷ দ্বিতীয়টো অগ্নিকাণ্ডই ইমানেই ভয়াবহ ৰূপ ধাৰণ কৰে যে ওচৰ-পাঁজৰৰ কমেও ১০হেজাৰ লোকক অস্থায়ী শিবিৰলৈ স্থানান্তৰ কৰা হয় ৷
আৰু পঢ়িব পাৰেঃ ঐতিহাসিক চমৰীয়া সত্ৰ দৰ্শন মুখ্যমন্ত্ৰী সোণোৱালৰ
