তলাবন্ধৰ বাবে জি এছ টিৰ পৰা ৰেহাই নাপায় ব্যৱসায়ীয়েঃ কেন্দ্ৰৰ সিদ্ধান্ত
ক'ৰ'না মহামাৰী প্ৰতিৰোধৰ বাবে ঘোষণা কৰা দেশজোৰা তলাবন্ধৰ সময়ছোৱাত সামগ্ৰী আৰু সেৱা কৰ(জি এছ টি)পৰিশোধৰ পৰা ৰেহাই বিচাৰি ব্যৱসায়ী-বণিক গোষ্ঠীয়ে জনাই অহা দাবী অগ্ৰাহ্য কৰিছে কেন্দ্ৰীয় চৰকাৰে ৷ প্ৰাপ্ত তথ্য অনুসৰি তলাবন্ধৰ ফলত ব্যৱসায়িক কাম-কাজ অচল হৈ পৰাত ব্যৱসায়িক-বণিক গোষ্ঠীয়ে অন্ততঃ ছমাহৰ বাবে জি এছ টি পৰিশোধৰ পৰা ৰেহাই দিবলৈ কেন্দ্ৰক অনুৰোধ জনাই আহিছে ৷ ইয়াৰ জৰিয়তে দেশৰ ভাঙি পৰা অৰ্থনীতি পুনৰুদ্ধাৰ কৰাত সহায় হ'ব বুলি ব্যৱসায়িক-বণিক গোষ্ঠীসমূহে যুক্তি দিছে ৷ কিন্তু এনে সকলো যুক্তি কেন্দ্ৰীয় চৰকাৰে খণ্ডন কৰি কোনো কাৰণতে জি এছ টি ৰেহাই দিয়া নহয় বুলি স্পষ্ট কৰি দিছে ৷ এই কথা সদৰী কৰি এক সূত্ৰই জনোৱা মতে, কেন্দ্ৰীয় বিত্ত মন্ত্ৰালয়ৰ যুক্তি হ'ল যে জি এছ টি ৰেহাইয়ে উদ্যোগ-প্ৰতিষ্ঠানসমূহক কোনো সকাহ নিদিয়ে ৷ বৰঞ্চ জি এছ টি ৰেহাই দিলে কেন্দ্ৰ আৰু ৰাজ্য চৰকাৰসমূহৰ ৰাজহ আহৰণত বেয়া প্ৰভাৱ পৰিব ৷ উল্লেখ্য যে কেন্দ্ৰীয় চৰকাৰে ঘোষণা কৰা ২০ লাখ কোটি টকীয়া পেকেজৰ অংশস্বৰুপে উদ্যোগ-প্ৰতিষ্ঠানসমূহলৈ বিভিন্ন ৰেহাই আৰু সকাহ আগবঢ়োৱা হৈছে ৷ইয়াৰ বিপৰীতে সম্প্ৰতি কেন্দ্ৰই জি এছ টি ৰেহাই নিদিয়াৰ সিদ্ধান্ত লৈছে ৷
এই বিষয়ে কেন্দ্ৰীয় বিত্ত মন্ত্ৰালয়ত হোৱা এক আলোচনাৰ উদ্ধৃতি দি নাম প্ৰকাশত অনিচ্ছুক এক সূত্ৰই জনোৱা মতে, জি এছ টি ৰেহাই দেশৰ স্বাৰ্থৰ পৰিপন্থী হ'ব আৰু ইয়ে গ্ৰাহক-উপভোক্তাৰ কোনো উপকাৰ সাধন নকৰে ৷ লক্ষ্যণীয় যে কেন্দ্ৰই জি এছ টি ৰেহাই নিদিবলৈ লোৱা সিদ্ধান্তক সমৰ্থন কৰিছে কেন্দ্ৰীয় পৰোক্ষ কৰ আৰু সীমা শুল্ক ব'ৰ্ডৰ প্ৰাক্তন অধ্যক্ষ নাজীব শ্বাহে ৷ সাংবাদিকৰ আগত শ্বাহে কয়, " মই আশাবাদী যে কেন্দ্ৰই চাহিদাৰ কথা বিবেচনা কৰা নাই ৷ একোটা সামগ্ৰীত জি এছ টি ৰেহাই দিয়াটো কেতিয়াও সঠিক সিদ্ধান্ত নহয় ৷ ই মূল্য শৃংখলত ব্যাঘাত হানিব আৰু ইয়ে কেতিয়াও সামগ্ৰীৰ মূল্য হ্ৰাসত সহায় নকৰে ৷ তাৰ বিপৰীতে এনে বঝৱস্থাই দেশীয় উদ্যোগ-প্ৰতিষ্ঠানসমূহৰ ক্ষতি সাধন কৰিব৷"
উল্লেখ্য যে ক'ৱিড-১৯বিৰোধী যুঁজৰ অস্ত্ৰৰুপে পৰিগণিত হোৱা পি পি ই কিট, ভেণ্টিলেটৰ, ছেনিটাইজাৰ, আদিক কেন্দ্ৰ কৰি জি এছ টি ৰেহাইৰ প্ৰসংগ উত্থাপন হয় ৷ এই সঁজুলিসমূহতো জি এছ টি আদায় দিবলগীয়া হৈ আহিছে ৷ কিন্তু এইসমূহত জি এছ টি ৰেহাই দিলে, এনে সঁজুলিৰ মূল্য অত্যধিক বৃদ্ধি পাব বুলি বিভিন্নজনে মতপোষণ কৰি আহিছে ৷ ইয়াৰ যুক্তি দি একাংশই মতপোষণ কৰে পূৰ্বে ছেনিটেৰী নেপকিনত জি এছ টি ৰেহাই দিয়া হয় ৷ কিন্তু ইয়াৰ ফলত ভাৰতীয় ছেনিটেৰী প্ৰস্তুতকাৰী প্ৰতিষ্ঠানসমূহে তীব্ৰ প্ৰত্যাহ্বানৰ সন্মুখীন হ'বলগীয়া হয় ৷ কাৰণ জি এছ টিয়ে আমদানীকৃত আৰু দেশত উৎপাদিত সামগ্ৰীৰ মাজত ভাৰসাম্য ধৰি ৰাখিছে ৷ যদিহে জি এছ টি ৰেহাই দিয়া হয়, তেন্তে আমদানিকৃত সামগ্ৰীয়ে বজাৰ দখল কৰাৰ আশংকা প্ৰবল ৷
