১৫ মে’ত গুৱাহাটীৰ গনেশগুৰিত হোৱা গ্ৰণেড বিস্ফোৰণৰ মূল অভিযুক্ত বিজয় অসমক গ্ৰেপ্তাৰ কৰিবলৈ সক্ষম হৈছে আৰক্ষীয়ে ৷মংগলবাৰে বিয়লি প্ৰায় ৫ বজাত তিনিচুকীয়াৰ ডুমডুমা আৰক্ষী থানাৰ তালাপ আউটপ’ষ্টৰ অন্তৰ্গত ডংগৰিৰ পৰা গ্ৰেপ্তাৰ কৰে বিজয় অসমক ৷ গুৱাহাটী আৰক্ষী আয়ুক্তৰ মতে বিজয় অসমক সম্প্ৰতি গুৱাহাটীলৈ স্থানান্তৰিত কৰা হৈছে ৷
ইফালে বিস্ফোৰণৰ তদন্তকাৰীসকলৰ তথ্য অনুসৰি গুৱাহাটীৰ জু ৰোডৰ চেন্ট্ৰেল ম’লৰ সন্মুখত সুৰক্ষা কৰ্মীলৈ উদ্দেশ্য কৰি বিজয় অসমেই গ্ৰেণেড বিস্ফোৰণ ঘটাইছিল ৷ আৰক্ষীৰ এক বিশেষ সূত্ৰৰ মতে,বিজয় অসমে সততে নিজৰ স্থান পৰিৱৰ্তন কৰি আছিল ৷অন্যহাতে, বিজয় অসমক গ্ৰেপ্তাৰ কৰাৰ নেতৃত্ব বহন কৰিছিল তিনিচুকীয়া আৰক্ষীৰ কাৰ্যালয়ৰ ডিএচপি বিতুল চেটিয়াই ৷
আৰক্ষীৰ তথ্য অনুসৰি বিজয় অসমে গ্ৰেণেড বিস্ফোৰণ প্ৰাকমূহুৰ্তত অভিনেত্ৰী জাহ্নৱী শইকীয়া আৰু প্ৰাণময় ৰাজগুৰুৰ লগত আলোচনাত মিলিত হৈছিল ৷ বিজয় অসম পাঞ্জাবাৰীস্থিত জাহ্নৱী শইকীয়াৰ ভাৰাঘৰটোত আছিল যদিও, আৰক্ষী ঘৰটোত উপস্থিত হোৱাৰ প্ৰাকমূহুৰ্তত তাৰ পৰা পলাই যায় ৷
উল্লেখ্য যে গুৱাহাটী চেন্ট্ৰেল ম’লৰ সন্মুখত সংঘটিত কৰা গ্ৰেণেড বিস্ফোৰণৰ সন্দৰ্ভত এতিয়ালৈকে বিজয় অসমকে ধৰি ছজন লোকক গ্ৰেপ্তাৰ কৰিছে আৰক্ষীয়ে ৷ গ্ৰেপ্তাৰ কৰা আন পাঁচজন হ’ল জাহ্নৱী শইকীয়া,প্ৰাণময় ৰাজগুৰু,চিন্ময় লহকৰ,ইন্দ্ৰ মোহন বৰা আৰু অমিত বল্লভ গোস্বামী ৷
অধিক খবৰৰ বাবে পঢ়ক : শীৰ্ষ বাতৰি
