নাগৰিকত্ব সংশোধনী বিধেয়ক ২০১৬ৰ সন্দৰ্ভত শিলচৰত প্ৰধানমন্ত্ৰী নৰেন্দ্ৰ মোডীৰ ব্যক্তব্যৰ পিছতে সদৌ অসম ছাত্ৰ সন্থা অৰ্থাৎ AASU আৰু অন্যান্য ৩০ টা জাতীয় দল সংগঠনে ৮ জানুৱাৰীত অসম বন্ধৰ আহ্বান জনাইছে ৷ ইফালে আছুৰ লগতে বিধেয়ক খন বাতিলৰ দাবীত উত্তৰ পূৰ্বাঞ্চল বন্ধৰ আহ্বান দিয়ে উত্তৰ পূব ছাত্ৰ সন্থা চমুকৈ নেছ’ৱেই ৷ সদৌ অসম ছাত্ৰ সন্থাৰ মুখ্য উপদেষ্টা সমুজ্জ্বল কুমাৰ ভট্টাচাৰ্যই শনিবাৰে এক সংবাদমেলত সাংবাদিকৰ সৈতে হোৱা সাক্ষাতত কয় যে,শুক্ৰবাৰে প্ৰধানমন্ত্ৰীৰ ভাষণৰ পৰা এইটোৱেই প্ৰতিপন্ন হ’ল যে মোডী বাংলাদেশীৰ ৰক্ষক ৷ প্ৰধানমন্ত্ৰী মোডীৰ বাংলাদেশীৰ প্ৰতি প্ৰীতি অধিক ৷ চলিত চৰকাৰখন কেৱল বাংলাদেশীৰ কাৰণে ৷ এই মন্তব্য আছুৰ উপদেষ্টা ভট্টাচাৰ্যৰ ৷
লগতে বিধেয়কখন বাতিল কৰিবলৈ আন্দোলন কৰাৰ পিছতো কিন্তু কেন্দ্ৰ চৰকাৰে এই আন্দোলনক উপেক্ষা কৰিছে। মোডীয়ে গণতন্ত্ৰক বিঘ্নিত কৰিব বিচাৰিছে ৷ ইফালে সততে বন্ধ সংস্কৃতিৰ বিৰোধী আছুয়ে এইবাৰ বিধেয়কখন বাতিলৰ দাবীত ৮ জানুৱাৰীত অসম বন্ধৰ ঘোষণা কৰে ৷এই সন্দৰ্ভত আছুৰ উপদেষ্টা সমুজ্জ্বল কুমাৰ ভট্টাচাৰ্যই কয় যে আছুয়ে ১০ বছৰ পৰা বন্ধ পৰা আঁতৰি আছে বা বন্ধ ঘোষণা কৰা নাই৷ আমি বন্ধ সংস্কৃতিৰ বিৰোধী ৷ কিন্তু অনিচ্ছা সত্বেও আমি ৮ জানুৱাৰীত অসম বন্ধৰ ঘোষণা কৰিছোঁ ৷কাৰণ কেন্দ্ৰই বিতৰ্কিত বিধেয়কখন গৃহীত কৰিবৰ কাৰণে উঠিপৰি লাগিছে ৷ লগতে কেন্দ্ৰ আৰু ৰাজ্য চৰকাৰে অসমৰ জনসাধাৰণক মানসিক ভাৱে প্ৰতাৰিত কৰি আহিছে ৷
অন্যহাতে আছুৰ লগতে উত্তৰ পূব ছাত্ৰ সন্থা অৰ্থাৎ নেছ’ৱেও বিতৰ্কিত বিধেয়কখন বাতিলৰ দাবীত ৮ জানুৱাৰীতেই উত্তৰ পূৰ্বাঞ্চল বন্ধৰ ঘোষণা কৰে ৷ আছুৰ সভাপতি দীপাংক কুমাৰ নাথে সাংবাদিকৰ লগত হোৱা এক সাক্ষাৎকাৰত কয় যে নাগৰিকত্ব সংশোধনী বিধেয়ক ২০১৬ ৰ সন্দৰ্ভত প্ৰধানমন্ত্ৰী নৰেন্দ্ৰ মোডীৰ মন্তব্য অসমীয়াৰ কাৰণে এক বৃহৎ প্ৰত্যাহ্বান লগতে যথেষ্ট নিন্দনীয় ৷ ৰাজ্য চৰকাৰে ইয়াৰ পৰিণাম ভোগ কৰিব লাগিব ৷ অসম চুক্তিৰ প্ৰসংগ উত্থাপন কৰি দীপাংক কুমাৰ নাথে কয় যে অসম চুক্তিৰ ৬ নং দফাক বিবেচনা কৰিবৰ কাৰণে এক উচ্চ স্তৰীয় সমিতি গঠন কৰাৰ পদক্ষেপ আৰু অসম চুক্তি ৫ নং দফাক উপেক্ষা কৰি অসমৰ জনগণক প্ৰতাৰিত কৰাৰ এক চালিকা শক্তি ৷ প্ৰধানমন্ত্ৰীৰ দ্বাৰা ঘোষণা কৰা এক পক্ষীয় কথা আমি মানি নলওঁ ৷এই মন্তব্য আছুৰ সভাপতি দীপাংক কুমাৰ নাথৰ ৷
নাগৰিকত্ব সংশোধনী বিধেয়ক ২০১৬ বাতিলৰ দাবীত কৰা আন্দোলনৰ সন্দৰ্ভত আছুৰ সভাপতি দীপাংক কুমাৰ নাথে কয় যে আমি অসমৰ সকলো জনগনে ৭ জানুৱাৰিত ক’লা দিৱস হিচাপে পালন কৰিম ৷ লগতে ৮ জানুৱাৰীত দিয়া অসম বন্ধৰ কথাও উল্লেখ কৰে ৷ ইফালে অহা ২৩ জানুৱাৰীত ৰাজধানী গুৱাহাটীত অনুষ্ঠিত কৰিব "খিলঞ্জীয়াৰ ব্ৰৰ্জ নিনাদ" ৷ ইয়াৰ পিছত নাগৰিকত্ব সংশোধনী বিধেয়ক বাতিলৰ দাবীত ৰাজ্যৰ সকলো ঠাইত জনসভা আয়োজন কৰা হ’ব ৷ অন্যহাতে সদৌ অসম ট্ৰাইবেল সংঘৰ মহাসচিব আদিত্য খাখলাৰীয়ে কয় যে,সদ্য পৰিস্থিতিয়ে জাতীয় নায়কক শিখণ্ডিত পৰিণত কৰিছে ৷ লগতে কয় যে কেন্দ্ৰই ভোট বেংকৰ ৰাজনীতি কৰাত ব্যস্ত আছে ৷ চলিত চৰকাৰ অৰ্থাৎ বিজেপি চৰকাৰ আৰু বিগত চৰকাৰ অৰ্থাৎ কংগ্ৰেছ চৰকাৰৰ মাজত কোনো পাৰ্থক্য নাই ৷ দুয়োখনেই বিশ্বাসঘাটক ৷ দিছপুৰৰ গাদীত বহু অসম আন্দোলনৰ কৰ্মী আছে ।কিন্তু সেই লোকসকলে সম্প্ৰতি বিতৰ্কিত বিধেয়কখনৰ সম্পৰ্কত কেন্দ্ৰৰ লগত একমত হৈছে ৷ এই মন্তব্য AATS ৰ মহসচিব আদিত্য খাখলাৰীৰ ৷
অধিক খবৰৰ বাবে পঢ়ক : শীৰ্ষ বাতৰি
