এটা আন্তৰ্জাতিক দুষ্টচক্ৰৰে জড়িত হৈ দিল্লীত নিষিদ্ধ ড্ৰাগছৰ বেহা পতা গোলাঘাটৰ দুজন যুৱক জালত পৰিছে। প্ৰাপ্ত তথ্য অনুসৰি চক্ৰটোৰ মুঠ পাঁচজন জালত পৰিছে ৷ চক্ৰটোৰ পৰা আৰক্ষীয়ে ৯০কোটি টকাৰ নিষিদ্ধ ড্ৰাগছ জব্দ কৰিছে ৷ ধৃতকেইজনৰ দুজন ৰাহুল সন্দিকৈ আৰু নিত্যানন্দৰ ঘৰ গোলাঘাটত ৷ আন তিনিজন বিহাৰৰ।
বিহাৰৰ কেইজনৰ নাম উদয় কুমাৰ, সুবোধ দাস আৰু সঞ্জীৱ কুমাৰ। ইয়াৰে উদয়, সঞ্জীৱ আৰু সুবোধক আৰক্ষীয়ে যোৱা ৮ ছেপ্তেম্বৰত দিল্লীৰ মুকুন্দপুৰৰ ওচৰৰ আউটাৰ ৰিঙৰ পৰা গ্ৰেপ্তাৰ কৰে। তেওঁলোকৰ প্ৰত্যেকৰে পৰা আৰক্ষীয়ে পাঁচ কিলোগ্ৰামকৈ হেৰ'ইন জব্দ কৰে ৷ পিছদিনা আৰক্ষীয়ে প্ৰগতি ময়দানৰ পৰা ৰাহুল আৰু নিত্যানন্দক তিনি কিলোগ্ৰাম হেৰ'ইনসহ গ্ৰেপ্তাৰ কৰে ৷ দিল্লীৰ আৰক্ষীৰ বিশেষ কোষে চক্ৰটোৰ তথ্য উদ্ধাৰ কৰি অভিযান চলায় ৷
