![আফ্ৰিকান ছোৱাইন ফ্লুঃ সকলো ৰুগীয়া গাহৰি বধৰ নিৰ্দেশ মুখ্যমন্ত্ৰীৰ](http://media.assettype.com/assamese-sentinelassam%2Fimport%2Fh-upload%2F2020%2F09%2F24%2F161770-sonowal.jpg?w=480&auto=format%2Ccompress&fit=max)
ক'ৰ'নাৰ বিভীষিকাৰ মাজতে ৰাজ্যত জটিল ৰূপ ধাৰণ কৰিছে আফ্ৰিকান ছোৱাইন ফ্লুৱে ৷ এই সংক্ৰামক ৰোগত বহু গাহৰি আক্ৰান্ত হৈছে ৷ সম্প্ৰতি এনে সকলো গাহৰি বধ কৰিবলৈ নিৰ্দেশ জাৰি কৰিছে মুখ্যমন্ত্ৰী সৰ্বানন্দ সোণোৱালে ৷ ৰাজ্যত আফ্ৰিকান ছোৱাইন ফ্লুৱে সৃষ্টি কৰা পৰিস্থিতিক লৈ বুধবাৰে মুখ্যমন্ত্ৰী সোণোৱালে পশুপালন আৰু পশুচিকিৎসা বিজ্ঞান বিভাগৰ শীৰ্ষ বিষয়াবৰ্গৰ সৈতে এক বৈঠকৰ আয়োজন কৰে ৷
এই বৈঠকতে মুখ্যমন্ত্ৰীয়ে ৰোগাক্ৰান্ত গাহৰিবোৰ বাচি বাচি বধ কৰিবলৈ বিভাগীয় বিষয়াবৰ্গক নিৰ্দেশ দিয়ে ৷ পৰিস্থিতিৰ বিভিন্ন দিশ তথা কেন্দ্ৰীয় আৰু ৰাজ্য চৰকাৰৰ বিভিন্ন নিৰ্দেশনা জুঁকিয়াই এনে সিদ্ধান্ত ল'বলগা হৈছে বুলি মুখ্যমন্ত্ৰীয়ে বৈঠকত উল্লেখ কৰে ৷এনে ব্যৱস্থা গ্ৰহণৰ পোষকতা কৰিছে ৰপ্তানীকাৰীয়েও ৷ তেওঁ কয় যে আফ্ৰিকান ছোৱাইন ফ্লু ৰোগাক্ৰান্ত গাহৰিবোৰ শীঘ্ৰে চিনাক্ত আৰু বধ কৰি নিৰোগী গাহৰিবোৰক ৰক্ষা কৰিব লাগিব ৷
আনহাতে, ৰোগাক্ৰান্ত গাহৰি বধৰ ফলত গাহৰি পালকসকলে যি ক্ষতিৰ সন্মুখীন হ'ব, সেই ক্ষতিপূৰণৰ ব্যৱস্থা কৰিবলৈ মুখ্যমন্ত্ৰীয়ে পশুপালন আৰু পশু চিকিৎসা বিজ্ঞান বিভাগৰ বিষয়াবৰ্গক নিৰ্দেশ দিয়ে ৷ লগতে তেওঁ ৰোগাক্ৰান্ত গাহৰিৰ বসতিস্থলসমূহ ছেনিটাইজ কৰিবলৈ নিৰ্দেশ দিয়ে, যাতে এই সংক্ৰামক ৰোগ নিৰোগী প্ৰাণীৰ শৰীৰলৈ সোঁচৰাতো ৰোধ কৰিব পৰা যায় ৷