Begin typing your search above and press return to search.

ৰাজ্যত বানৰ সমানে খহনীয়াৰো তাণ্ডবঃ ২৫শ গাঁও নিঃশেষ

দুৰ্যোগ ব্যৱস্থাপনাৰ আওতাত খহনীয়াৰ সমস্যাক সামৰি লোৱা নহয়। ফলত নৈৰ খহনীয়াৰ সমস্যা সমস্যা হৈয়ে ৰৈছে ৷

ৰাজ্যত বানৰ সমানে খহনীয়াৰো তাণ্ডবঃ ২৫শ গাঁও নিঃশেষ

Sentinel Digital DeskBy : Sentinel Digital Desk

  |  26 May 2020 6:52 AM GMT

ৰাজ্যত বানৰ সমানে খহনীয়াৰো তাণ্ডবঃ ২৫শ গাঁও নিঃশেষ

প্ৰতিবছৰে বাৰিষাত ৰাজ্যৰ বহু অঞ্চলত বানে তাণ্ডব চলায় । ব্ৰহ্মপুত্ৰ আৰু ইয়াৰ বহুকেইখন উপনৈয়ে সৃষ্টি কৰি অহা বানৰ সমস্যা একপ্ৰকাৰ অপ্ৰতিৰোধ্য হৈ পৰিছে ৷ বানৰ সমান্তৰালভাবে বিগত কিছু বছৰত ৰাজ্যৰ কেতবোৰ অঞ্চলত নৈৰ খহনীয়ায়ো জটিল ৰূপ ধাৰণ কৰিছে ৷ শেহতীয়া এক তথ্য অনুসৰি বিগত কিছুবছৰত খহনীয়াত ৰাজ্যৰ ২৫শ গাঁও নিশ্ছিন্ন হয় ৷ ফলত এই গাঁওসমূহত বাস কৰা কমেও চাৰি লক্ষ লোকে ঘৰ-বাৰী হেৰুৱাই স্থানচ্যুত হ'বলগা হয়। লক্ষ্যণীয় যে দুৰ্যোগ ব্যৱস্থাপনাৰ আওতাত খহনীয়াৰ সমস্যাক সামৰি লোৱা নহয়। ফলত নৈৰ খহনীয়াৰ সমস্যা সমস্যা হৈয়ে ৰৈছে ৷ শেহতীয়া তথ্য অনুসৰি প্ৰতিবছৰে ৰাজ্যৰ আঠ হেজাৰ হেক্টৰ ভূমি নৈৰ খহনীয়াৰ কবলত পৰে ৷ এই ক্ষেত্ৰত আন এক লক্ষ্যণীয় কথা হ'ল যে বানাক্ৰান্ত লোকে চৰকাৰী সাহায্য লাভ কৰে যদিও খহনীয়া আক্ৰান্ত লোকে কোনো ধৰণৰ চৰকাৰী সাহায্য লাভ নকৰে ৷ মাথোঁ খহনীয়াত বাসগৃহৰ ক্ষতিসাধন হ'লেহে চৰকাৰী সাহায্য লাভ কৰে ৷ কিন্তু এই সাহায্য লাভৰ বাবে খহনীয়া আক্ৰান্তই নিজৰ পট্টা ভূমিত বাসগৃহ নিৰ্মাণ কৰিব লাগিব৷

আনহাতে, চৰকাৰে ৰাজ্যৰ ২৫টা অঞ্চলক খহনীয়া প্ৰবণ অঞ্চলৰূপে চিনাক্ত কৰিছে। এই খহনীয়া প্ৰবণ অঞ্চলসমূহৰ অন্যতম হৈছে ৰহমৰীয়া, পলাশবাৰী, মাটমৰা, মাজুলী, কাৰেং চাপৰি, লাহৰিঘাট আৰু বাঘবৰ ৷ ৰাজ্যৰ গৰাখহনীয়াৰ সমস্যা সম্পৰ্কত জলসম্পদ বিভাগৰ এজন অৱসৰপ্ৰাপ্ত অভিযন্তাই কয় যে অসমত নৈৰ খহনীয়া সমস্যাৰ গভীৰতা বানতকৈ কোনোগুণে কম নহয় ৷ খহনীয়া গোটেই বছৰ হৈ থাকে ৷ গতিকে বানতকৈ এই সমস্যা অধিক জটিল ৷ দেশৰ আন ৰাজ্যৰ নৈৰসমূহৰ সৈতে অসমৰ নৈসমূহৰ চৰিত্ৰগত পাৰ্থক্য আছে ৷ এই কথা অনুধাৱন কৰাত কেন্দ্ৰীয় চৰকাৰ ব্যৰ্থ হৈছে ।ফলত সমস্যাটোৰ কোনো সমাধানসূত্ৰ ওলোৱা নাই ৷ আৰম্ভণিৰে পৰা জলসম্পদ বিভাগে কেৱল বান সমস্যা নিৰাময়তহে গুৰুত্ব আৰোপ কৰি আহিছে ৷

ইপিনে, বিগত কিছুদিন ধৰি হৈ থকা নেৰেনেপেৰা বৰষুণৰ ফলত ব্ৰহ্মপুত্ৰৰ বহুকেইখন উপনৈ ফেনেফুটুকাৰে বাঢ়ি আহি বুৰাই পেলাইছে ৰাজ্যৰ কে'বাখনো জিলাৰ বিস্তীৰ্ণ অঞ্চল ৷ক'ৰ'না মহামাৰীৰ ভয়াবহ প্ৰাদুৰ্ভাবৰ মাজতে সৃষ্টি হোৱা এই আকস্মিক বানত নৈপৰীয়া জনতাৰ মাজত হাহাকাৰ লাগিছে ৷ শেহতীয়া তথ্য অনুসৰি ডিব্ৰুগড়, লখিমপুৰ, ধেমাজি, দৰং আৰু গোৱালপাৰা জিলাৰ কমেও ৩০হেজাৰ লোক এই বানত ক্ষতিগ্ৰস্ত হৈছে ৷ চৰকাৰী তথ্য অনুসৰি এই আকস্মিক বানত এই জিলাসমূহৰ ১২৭গাঁও ক্ষতিগ্ৰস্ত হৈছে আৰু ৫৭৯ হেক্টৰ কৃষিভূমি বানৰ পানীত বুৰ গৈছে ৷

আৰু পঢ়িব পাৰেঃ অসমত ক'ৰ'না আক্ৰান্তৰ সংখ্যা ৫৯৫লৈ বৃদ্ধি, আৰু ৪৭ জন পজিটিভ চিনাক্ত

Next Story