![৭ বছৰত মাথোঁ ২২৭জন বাংলাদেশীক বিতাড়ন, বিধানসভাত তথ্য](http://media.assettype.com/assamese-sentinelassam%2Fimport%2Fh-upload%2F2020%2F09%2F01%2F156171-patowary.jpg?w=480&auto=format%2Ccompress&fit=max)
অসমৰ পৰা যোৱা সাত বছৰত মাথোঁ ২২৭জন বাংলাদেশীকহে চৰকাৰে বিতাড়ন বা প্ৰত্যৰ্পণ কৰিলে ৷ কালি বিধানসভাত চৰকাৰী পক্ষই দাখিল কৰা এক তথ্যত প্ৰকাশ পোৱা অনুসৰি ২০১৩-ৰ মাৰ্চৰ পৰা ২০২০ৰ জুলাইলৈকে অসমৰ পৰা মাথোঁ ২২৭জন বাংলাদেশীকহে বিতাড়ন কৰা হ'ল ৷ অথচ এই সময়ছোৱাত বিদেশী ন্যায়াধিকৰণসমূহে ১, ৩৬, ১৪৯জন লোকক বিদেশী বুলি ঘোষণা কৰে ৷ কালি বিধানসভাত এই তথ্য দাখিল কৰি সংসদীয় পৰিক্ৰমা মন্ত্ৰী চন্দ্ৰমোহন পাটোৱাৰীয়ে কয় যে আইনী মেৰপেচৰ বাবে বিদেশী বিতাড়নত জটিলতাৰ সৃষ্টি হৈছে ৷ তেওঁ কয় যে বিদেশী ন্যায়াধিকৰণে বিদেশী বুলি ঘোষণা কৰাৰ পাছত এজন ব্যক্তি উচ্চ ন্যায়ালয় আৰু উচ্চতম ন্যায়ালয়ৰ দ্বাৰস্থ হয় ৷ ইয়ে বিদেশী বিতাড়নত জটিলতাৰ সৃষ্টি কৰা বুলি মন্ত্ৰীজনে উল্লেখ কৰে ৷
কংগ্ৰেছ বিধায়ক ৰূপজ্যোতি কুৰ্মীৰ এটা প্ৰশ্নৰ উত্তৰ দি মন্ত্ৰী পাটোৱাৰীয়ে লগতে কয় যে পূৰ্বে বাংলাদেশীক কেৱল খেদি পঠিওৱাৰ ব্যৱস্থাহে আছিল ৷ ইয়াৰ ফলত খেদি পঠিওৱা বাংলাদেশীয়ে পুনৰ অসমত প্ৰৱেশ কৰে ৷ তেতিয়া বিধায়ক কুৰ্মীয়ে কয় যে অসম চুক্তিৰ পাঁচ নম্বৰ দফা অনুসৰি ১৯৭১ৰ ২৪মাৰ্চৰ পাছত প্ৰৱেশ কৰা সকলো বাংলাদেশীক বিতাড়ন কৰিব লাগে ৷ কিন্তু নাগৰিকত্ব(সংশোধনী) আইনৰ জৰিয়তে মুছলমানক বাদ দি ছটা ধৰ্মীয় সম্প্ৰদায়ৰ চুবুৰীয়া তিনিখন দেশৰ পৰা অহা বিদেশীক ভাৰতীয় নাগৰিকত্ব দিব বিচৰা হৈছে বুলি তেওঁ মন্তব্য কৰে ৷
আৰু পঢ়িব পাৰেঃ ক'ৰ'নাৰ প্ৰভাৱঃ সংস্থাপন নাপাব ২৭লক্ষাধিক যুৱক-যুৱতীয়ে