এখন ভাইৰেল হোৱা ফটো। ফটোখনত দেখা গৈছে ক'ৰ'নাবিৰোধী যুঁজৰ এগৰাকী অক্লান্ত সেনানীক। এই ফটোৱে সম্প্ৰতি অনেকৰ হৃদয় জয় কৰিছে। উল্লেখ্য যে ৰাজ্যত ক'ৰ'না ভাইৰাছৰ সংক্ৰমণ বৃদ্ধিৰ সময়তো চিকিত্সক, নাৰ্ছ আদিয়ে অবিৰত সেৱা আগবঢ়াই আছে। নিজৰ জীৱনলৈ ভ্ৰূক্ষেপ নকৰাকৈ স্বাস্থ্যকৰ্মীসকলে সেৱা আগবঢ়াই আহিছে। এনে সময়তে এগৰাকী স্বাস্থ্যকৰ্মীৰ কৰ্তব্যৰত অৱস্থাৰ এখন ফটো ভাইৰেল হৈছে।ফটোখনত দেখা গৈছে পি পি ই কিট পৰিহিত অৱস্থাত এগৰাকী নাৰ্ছক। ইয়াৰ অৰ্থ হৈছে নাৰ্ছগৰাকী কৰ্তব্যৰত অৱস্থাতে আছে।
এই ফটো ইণ্টাৰনেটত ভাইৰেল হোৱাৰ লগে লগে অগনন লোকে তেওঁক প্ৰশংসাৰে ওপচাই পেলাইছে। প্ৰাপ্ত তথ্য অনুসৰি এই নাৰ্ছগৰাকী গুৱাহাটীৰ খানাপাৰাৰ ক'ৱিড-১৯ কেয়াৰ চেণ্টাৰত কৰ্মৰত হৈ আছে। ফটোখনত দেখা গৈছে দিনজোৰা সেৱা আগবঢ়োৱাৰ পাছত ক্লান্ত হৈ পৰা নাৰ্ছগৰাকীয়ে পকী মজিয়াত বহি যেন কিছু জিৰণি লৈছে। নাৰ্ছগৰাকীক স্বাস্থ্য মন্ত্ৰী হিমন্ত বিশ্ব শৰ্মায়ো প্ৰশংসা কৰিছে।ফটোখন আপলোড কৰি কৰা এটা টুইটত স্বাস্থ্য মন্ত্ৰী শৰ্মাই কয়, "মই মোৰ সহযোগীসকলক লৈ গৰ্বিত"।এই ফটো প্ৰথমে ৰণ বিকাশ গৌৰৱ নামৰ এজন ব্যক্তিয়ে ছ'চিয়েল মিডিয়াত প'ষ্ট কৰে।তাৰ পাছৰে পৰা বহু লোকে ফটোখন শ্বেয়াৰ কৰে।
