উদ্বেগজনকভাৱে ক'ৰ'না আক্ৰান্তৰ সংখ্যা বৃদ্ধি পোৱাৰ প্ৰতি লক্ষ্য ৰাখি ইয়াৰ সংক্ৰমণ যাতে আৰু বৃদ্ধি নাপায়, সেয়া নিশ্চিত কৰিবলৈ মহানগৰ আৰক্ষীয়ে ড্ৰ'ণৰ আশ্ৰয় লৈছে ৷ দেওবাৰে মাজনিশাৰ পৰা গুৱাহাটীত পুনৰ ১৪দিনৰ বাবে সম্পূৰ্ণ ল'কডাউন আৰোপ কৰিছে ৷ অহা ১২জুলাইলৈকে বাহাল থাকিবলগীয়া এই লকডাউনৰ সম্পূৰ্ণ প্ৰয়োগ নিশ্চিত কৰিবলৈ অসম আৰক্ষীয়ে ড্ৰ'ণ ব্যৱহাৰ কৰিছে ৷ কোনো লোকে ল'কডাউনৰ নীতি-নিয়ম ভংগ কৰিছে নেকি, সেয়া এই ড্ৰ'ণৰ সহায়ত আকাশমাৰ্গৰ পৰা আৰক্ষীয়ে নিৰীক্ষণৰ ব্যৱস্থা কৰিছে ৷ এই সন্দৰ্ভত মহানগৰ আৰক্ষীৰ যান-বাহন শাখাৰ উপ-আয়ুক্ত (ডি চি পি) মায়ংক কুমাৰে কয় যে তুলনামূলকভাবে অধিক ক'ৰ'না আক্ৰান্ত চিনাক্ত অঞ্চল বা স্থানসমূহত নিৰীক্ষণ অধিক কঠোৰ হ'ব ৷ ইয়াৰ জৰিয়তে কোনো লোকেই যাতে ল'কডাউনৰ নীতি-নিয়ম ভংগ কৰিব নোৱাৰে, সেয়া নিশ্চিত কৰা হ'ব৷ এনে ধৰণৰ দুটা অঞ্চল হৈছে ফাঁচীবজাৰ আৰু হাতীগাঁও ৷ আনহাতে, এই সম্পৰ্কত গুৱাহাটীৰ আৰক্ষী আয়ুক্ত মুন্না প্ৰসাদ গুপ্তাই কয় যে ড্ৰ'ণৰ জৰিইতে দিনটোৰ প্ৰতিটো ক্ষণত জনতাৰ ওপৰত নিৰীক্ষণ অব্যাহত ৰখা হ'ব ৷ গুপ্তাই লগতে কয় যে এই ল'কডাউন অত্যন্ত কঠোৰ ৰূপত বলবৎ কৰা হ'ব ৷
