মনৰ সৌন্দৰ্যই প্ৰকৃত সৌন্দৰ্য বুলি কোৱা হয় ।যেন এই কথাই প্ৰতিপন্ন কৰি দেখৱালে বহিঃৰাজ্যৰ পৰা তলাবন্ধৰ সময়ত গৃহাভিমুখী হোৱা নগাৱৰ ১৬জন লোকে ৷ নগাঁৱত উপস্থিত হোৱাৰ পাছতে নিয়মানুসৰি তেওঁলোকক কোৱাৰেণ্টিনত ৰখাৰ ব্যৱস্থা কৰা হয় ৷ লোককেইজনক প্ৰশাসন তথা স্বাস্থ্য বিভাগে নগাঁৱৰ ছেইণ্ট ৰবাৰ্ট স্কুলত স্থাপিত কোৱাৰেণ্টিন কেন্দ্ৰত ৰখাৰ ব্যৱস্থা কৰে ৷ কোৱাৰেণ্টিনত থকাৰ সময়ছোৱাত তেওঁলোকে স্কুলৰ চৌহদৰ সন্মুখৰ ফালে ফুলৰ পুলি ৰোপন কৰে ৷ স্কুলখনৰ চৌহদক সৌন্দৰ্যৰ আকৰত পৰিণত কৰিবলৈ স্বেচ্ছাই আগবাঢ়ি অহা এই লোকসকলক সহায় কৰে প্ৰশাসনে ৷
ফুলৰ পুলি সংগ্ৰহৰ পৰা বিভিন্ন ধৰণেৰে তেওঁলোকক প্ৰশাসনে সহায় কৰে ৷ এই সম্পৰ্কত স্কুলখনৰ কোৱাৰেণ্টিন কেন্দ্ৰৰ নডেল বিষয়া তথা কলিয়াবৰৰ নিবাসী শিক্ষক লেখনাথ শৰ্মাই কয়, " এই বিদ্যালয় মণ্টেশ্বৰী বিদ্যালয় হোৱাৰ পৰিপ্ৰেক্ষিতত এই ফুলৰ বাগিচা কণ কণ শিশুসকলৰ প্ৰতি এক উপহাৰ হ'ব ৷ ল'কডাউন অন্ত পৰাৰ পাছত শিশুসকল স্কুললৈ আহিব ৷ তেতিয়া ফুল দেখি তেওঁলোকৰ মন পুলকিত হ'ব ৷ আমি এনেদৰে এক ব্যতিক্ৰমী কাম কৰিবলৈ সক্ষম হৈছো ৷ ই কোৱাৰেণ্টিন কালৰ এক স্মৃতি হৈ ৰব ৷" কোৱাৰেণ্টিনত থকাসকলে এনেদৰে ফুলৰ বাগিচা স্থাপন কৰাত আনন্দ প্ৰকাশ কৰিছে কলিয়াবৰৰ দ্যুতিভা বৰাই ৷