গুৱাহাটীঃ অসমৰ জনস্বাস্থ্য অভিযান্ত্ৰিক বিভাগে এই পৰ্যন্ত জল জীৱন অভিযানৰ অধীনত ৰাজ্যখনে লক্ষ্য নিৰ্ধাৰণ কৰা ৬৭.১৯ লাখ গ্ৰাম্য পৰিয়ালৰ ৪২.১ শতাংশলৈ কাৰ্য্যকৰী ঘৰুৱা টেপ সংযোগ (এফ এইচ টি চি) প্ৰদান কৰিবলৈ সক্ষম হৈছে। বুধবাৰে সংবাদ মাধ্যমক সম্বোধন কৰি পি এইচ ইৰ মন্ত্ৰী জয়ন্ত মল্ল বৰুৱাই কয় যে এফ এইচ টি চিৰ অধীনত ২৯,৫৬৮খন আঁচনি অনুমোদন কৰা হৈছে, ইয়াৰে ৫,১৯০খন আঁচনি সম্পূৰ্ণ হৈছে। তেওঁ কয় যে জে জে এম আৰম্ভ কৰাৰ পূৰ্বে ৰাজ্যত মাত্ৰ ১.১১ লাখ পৰিয়ালত – মুঠ পৰিয়ালৰ ১.৬ শতাংশ – টেপ পানীৰ সংযোগ কাৰ্যক্ষম আছিল।
তেওঁ লগতে কয় যে ২০২২-২৩ বিত্তীয় বৰ্ষত পি এইচ ই বিভাগে ২৮.১ লাখ পৰিয়ালত এফ এইচ টি চি স্থাপনৰ লক্ষ্য লৈছিল, ইয়াৰে ৫.০১ লাখ সংযোগ সম্পূৰ্ণ হৈছে। বাকীখিনি অহা ৩০ জুনৰ ভিতৰত সম্পূৰ্ণ হ'ব বুলিও তেওঁ কয়।
