মেডিকেল কলেজৰ অধ্যাপকসকলৰ অৱসৰৰ বয়স ৭০ বছৰলৈ বৃদ্ধি
কৰ্মচাৰী প্ৰতিবেদক
গুৱাহাটীঃ স্বাস্থ্য, বিদ্যুৎ, পৰ্যটন, ৰাজহ আৰু পৰিবহণ বিভাগক লৈ অসম কেবিনেটে কিছু গুৰুত্বপূৰ্ণ সিদ্ধান্ত গ্ৰহণ কৰিছে।
শুকুৰবাৰে অনুষ্ঠিত এখন বৈঠকৰ সময়ত কেবিনেটে ৰাজ্যৰ বিভিন্ন চিকিৎসা মহাবিদ্যালয়ৰ অধ্যাপকসকলৰ অৱসৰৰ বয়স ৬৫ বছৰৰ পৰা ৭০ বছৰলৈ বৃদ্ধি কৰাৰ সিদ্ধান্ত লোৱা বুলি তথ্য আৰু জনসংযোগ মন্ত্ৰী পিজুচ হাজৰিকাই জনায়। তেওঁ কয় যে প্রতি বছৰে ৰাজ্যৰ মেডিকেল কলেজৰ পৰা প্রায় ১১০০ চিকিৎসক পাছ আউট হয়, যিটো চাহিদা পূৰণৰ বাবে যথেষ্ট নহয়৷ চিকিৎসা মহাবিদ্যালয়ৰ অধ্যাপকসকলৰ অৱসৰ বৃদ্ধিৰ সিদ্ধান্ত এই প্ৰেক্ষাপটতে লোৱা হৈছে। কেবিনেটে আৰু ঔষধ ক্ৰয়ৰ বাবে স্বাস্থ্য বিভাগক ১৩৬ কোটি টকা অনুমোদন জনায়।
অসমৰ দুখন চাহ বাগিচা – হাতীখুলী টি ই আৰু কেলিডেন টি ইত হোটেল স্থাপনৰ বাবে অসম পৰ্যটন উন্নয়ন নিগম আৰু ইণ্ডিয়ান হোটেল কোম্পানী লিমিটেডৰ মাজত স্বাক্ষৰিত বুজাবুজিৰ চুক্তিত কেবিনেটে অনুমোদন জনায়।
কেবিনেটে মিৰ্জা, উত্তৰ লখিমপুৰ, ডিব্ৰুগড়, ৰহা, যোৰহাট, বিহপুৰীয়া, তিনিচুকীয়া আৰু বিশ্বনাথত পি মডেলত স্বয়ংক্ৰিয় বাহন পৰীক্ষা কেন্দ্ৰ স্থাপনৰ বাবে অসম ৰাজ্যিক পৰিবহন নিগমক অনুমোদন জনায়।
আনহাতে, কেবিনেটে ৰাজহ বিভাগৰ অধীনত মণ্ডল আৰু কানুংগোৰ নামকৰণ সলনি কৰাৰ সিদ্ধান্ত লয়। মণ্ডলসমূহক এতিয়াৰ পৰা 'ভূমি অভিলেখ সহায়ক' আৰু কানুংগোসকলক 'ভূমি অভিলেখ তত্বাৱধায়ক' বুলি কোৱা হ'ব। এই 'ভূমি অভিলেখ তত্বাৱধায়ক'সকলক পিছলৈ 'ভূমি অভিলেখ পৰিদৰ্শক' বা 'ভূমি অভিলেখ বিষয়া' হিচাপে পদোন্নতি দিব পাৰি। তদুপৰি লেণ্ড ৰেকৰ্ড সহায়ক পদৰ বাবে নূন্যতম শৈক্ষিক অৰ্হতা হ'ব স্নাতক আৰু প্ৰতি পাঁচ বছৰৰ মূৰে মূৰে ৰাজ্যজুৰি বদলিৰ বাবে তেওঁলোক দায়বদ্ধ হ'ব।
শক্তি বিভাগৰ অধীনত নবীকৰণযোগ্য শক্তি উৎপাদনৰ বাবে দুখন চুক্তিত অনুমোদন জনায় কেবিনেটে। প্ৰথমখন চুক্তি হৈছে অসম শক্তি উৎপাদন নিগম লিমিটেড (এপিজিচিএল) আৰু অইল ইণ্ডিয়া লিমিটেড (অইল)ৰ মাজত, যাৰ অধীনত নামৰূপত ২৫ মেগাৱাট বিদ্যুৎ উৎপাদন কৰা হ'ব। ২৪৫০ কোটি টকাৰ নবীকৰণযোগ্য শক্তি প্ৰকল্পৰ বাবে অসম শক্তি বিতৰণ কোম্পানী লিমিটেড (এপিডিচিএল) আৰু এছজেভিএন গ্ৰীণ এনাৰ্জি লিমিটেডৰ মাজত দ্বিতীয়খন চুক্তি। এই উদ্যোগত এপিডিচিএলৰ ৪৯ শতাংশ অংশীদাৰিত্ব থাকিব।
আন এক উল্লেখযোগ্য পদক্ষেপত কেবিনেটে কম্পেচনেট ফেমিলি পেঞ্চন আঁচনিখনত অসম-কেডাৰ আই এ এছ আৰু আই পি এছ বিষয়াসকলক অন্তৰ্ভুক্ত কৰাৰ সিদ্ধান্ত গ্ৰহণ কৰে। এই আঁচনিখনে নিজ নিজ অৱসৰৰ বয়সলৈকে সম্পূৰ্ণ দৰমহাৰ সুবিধা প্ৰদান কৰে চৰকাৰী কৰ্মচাৰীৰ পৰিয়াললৈ যিসকলে সেৱাত থকাৰ সময়তে মৃত্যুবৰণ কৰে।
কেবিনেটে ৰাজ্য চৰকাৰৰ বিভিন্ন বিভাগত বন্ধ হৈ পৰা নগাঁও আৰু কাছাৰ কাগজ কলৰ ৬৬ গৰাকী কৰ্মচাৰী নিযুক্তিৰ বাবে অনুমোদন জনায়।
