গুৱাহাটী:ৰূপকোঁৱৰ জ্যোতিপ্ৰসাদ আগৰৱালাৰ জন্ম জয়ন্তী উপলক্ষে অসমৰ সাংস্কৃতিক পৰিক্ৰমা মন্ত্ৰী বিমল বৰাই বিভিন্ন সাংস্কৃতিক বঁটাৰ বাবে নিৰ্বাচিত শিল্পীসকলৰ নাম ঘোষণা কৰিছে। মন্ত্ৰীগৰাকীয়ে ঘোষণা কৰে যে ২০২৩ চনৰ শিল্পী বঁটা বিশিষ্ট সংগীত শিল্পী ৰাজেন গোহাঁই আৰু পোখিলা লেকথেপীক প্ৰদান কৰাৰ বিপৰীতে ২০২২ চনৰ নটসূৰ্য্য ফণী শৰ্মা বঁটা বিশিষ্ট অভিনেতা প্ৰাঞ্জল শইকীয়াক প্ৰদান কৰা হ'ব। ২০২২ চনৰ ড০ ভবেন্দ্ৰ নাথ শইকীয়া বঁটা আন এজন বিশিষ্ট অভিনেতা অৰুণ নাথক প্ৰদান কৰাৰ বিপৰীতে ২০২২ চনৰ বিজু ফুকন বঁটা বিশিষ্ট চলচ্চিত্ৰ নিৰ্মাতা সমৰেন্দ্ৰ নাৰায়ণ দেৱক প্ৰদান কৰা হ'ব। বিশিষ্ট সাহিত্যিক মিলেশ্বৰ পাটৰক ২০২২ চনৰ ভীমবৰ দেওৰী বঁটা প্ৰদান কৰা হ'ব বুলি সাংস্কৃতিক পৰিক্ৰমা মন্ত্ৰীগৰাকীয়ে অৱগত কৰে। বৰাই আৰু কয় যে শিল্প-সংস্কৃতিৰ ক্ষেত্ৰত তেওঁলোকৰ বিশিষ্ট অৱদানৰ বাবে ৫০ গৰাকী শিল্পীক প্ৰতিমাহে ৮ হাজাৰ টকাৰ ছিলপি পেঞ্চন প্ৰদান কৰা হ'ব। তদুপৰি ২০২২-২৩ বৰ্ষৰ বাবে ১৫২ জন মৃত শিল্পীৰ পৰিয়ালক ৫০ হাজাৰ টকাকৈ ৱান টাইম স্পেচিয়েল পেঞ্চন প্ৰদান কৰাৰ লগতে সন্মান লাভ কৰাসকলৰ নামো ঘোষণা কৰে।
লগতে পঢ়ক: অসমত হ্ৰাস পাইছে অপৰাধৰ সংখ্যা
