গুৱাহাটী: অসম আৰু উত্তৰ-পূৰ্বাঞ্চলৰ অন্যান্য ৰাজ্যসমূহত পঞ্জীয়নভুক্ত খুচুৰা বিনিয়োগকাৰীৰ সংখ্যাত হোৱা তীব্ৰ বৃদ্ধিয়ে অঞ্চলটোৰ আৰ্থিক বিকাশৰ স্পষ্ট সংকেত বহন কৰিছে। অধিক তাৎপৰ্যপূর্ণ বিষয় হৈছে যে নতুন প্ৰজন্মই এনে বিনিয়োগৰ ক্ষেত্ৰত অধিক আগ্ৰহ দেখুৱাইছে।
শেহতীয়া NSE (National Stock Exchange)-ৰ প্ৰতিবেদন অনুসৰি, বৰ্তমান অসমত ৫১.৫০ লাখ পঞ্জীয়নভুক্ত খুচুৰা বিনিয়োগকাৰী আছে। ২০২১ চনৰ পৰা ৰাজ্যখনত খুচুৰা বিনিয়োগকাৰীৰ সংখ্যা ৬.৯ গুণ বৃদ্ধি পাইছে। একে সময়ছোৱাত মিজোৰামত এই সংখ্যা ৮.৭ গুণ আৰু অৰুণাচল প্ৰদেশত ৭.৯ গুণ বৃদ্ধি পাইছে।
NSE-ৰ মতে, বৰ্তমানৰ খুচুৰা বিনিয়োগকাৰীসকল অসমৰ লগতে ভাৰতৰ আৰ্থিক বিকাশৰ এক শক্তিশালী, স্থিতিশীল আৰু ক্রমবৰ্ধমান শক্তি হিচাপে পৰিগণিত হৈছে। অসমত আর্থিক স্থিতিশীলতাৰ ফলত গঢ় লৈ উঠা উদ্যোগিক পৰিৱেশে মানুহক শ্বেয়াৰ বজাৰত বিনিয়োগ কৰিবলৈ উৎসাহিত কৰিছে।
শ্বেয়াৰ বজাৰ সদায় অস্থিৰ হৈ থকাৰ বাবে বিশেষজ্ঞসকলে অসমৰ খুচুৰা বিনিয়োগকাৰীসকলক আতংকিত নহ’বলৈ আৰু ধৈৰ্য্য ধৰিবলৈ আহ্বান জনাইছে। তেওঁলোকৰ পৰামৰ্শ হৈছে—“আপুনি এজন বিনিয়োগকাৰী, ব্যৱসায়ী নহয়।”
খুচুৰা বিনিয়োগ বৃদ্ধিৰ মূল কাৰণসমূহৰ ভিতৰত আছে মোবাইল-ভিত্তিক ট্ৰেডিং, সহজ KYC প্ৰক্ৰিয়া, বিত্তীয় সচেতনতা বৃদ্ধি, বজাৰ-সংলগ্ন বিনিয়োগ পণ্যৰ গ্ৰহণযোগ্যতা বৃদ্ধি আদি।
SEBI (Securities Exchange Board of India)-ৰ মতে, ব্যক্তিগত খুচুৰা বিনিয়োগকাৰীসকল হৈছে সেইসকল ব্যক্তি যিসকলে সংস্থা বা প্ৰতিষ্ঠানৰ হৈ নহয়, নিজৰ ব্যক্তিগত একাউণ্টৰ বাবে শ্বেয়াৰ, বণ্ড, মিউচুৱেল ফাণ্ড আদি ছিকিউৰিটিজ ক্ৰয়-বিক্ৰয় কৰে। কোনো নিৰ্দিষ্ট IPO (Initial Public Offering)-ত ২ লাখ টকাৰ অধিক বিনিয়োগ নকৰা ব্যক্তিক খুচুৰা বিনিয়োগকাৰী বুলি গণ্য কৰা হয়।
অধিক পঢ়ক - নতুন Income Tax Act 2025-এ আয়কৰ দাখিল প্ৰক্ৰিয়া সহজ কৰাৰ লক্ষ্য লৈছে: মুখ্য আয়কৰ আয়ুক্ত নিৰূপমা কটৰুৱে
