গুৱাহাটী: ড° হিমন্ত বিশ্ব শৰ্মাৰ মন্ত্ৰীসভাত নতুনকৈ শপতগ্ৰহণ কৰা চাৰি গৰাকী মন্ত্ৰীক বিভাগসমূহ আৱণ্টন কৰা হয়। ৰাজ্যপালে মন্ত্ৰী পৰিষদৰ এই চাৰি সদস্যৰ বিভাগ আৱণ্টন কৰা হয়।
মন্ত্ৰী ৰামেশ্বৰ তেলীয়ে শ্ৰম কল্যাণ বিভাগ, চাহ জনজাতি আৰু আদিবাসী কল্যাণ বিভাগ, লগতে ৰূপান্তৰ আৰু উন্নয়ন বিভাগৰ দায়িত্ব লাভ কৰিছে।
অজন্তা নেঁওগে পৰ্যটন বিভাগ আৰু মহিলা আৰু শিশু উন্নয়ন বিভাগ লাভ কৰিছে।
অতুল বৰাই আবকাৰী বিভাগ, সীমান্ত সুৰক্ষা আৰু উন্নয়ন বিভাগ, অসম চুক্তি ৰূপায়ণ বিভাগ আৰু পঞ্চায়ত আৰু গ্ৰামোন্নয়ন বিভাগ লাভ কৰিছে। আনহাতে চৰণ বড়োৱে পৰিবহণ বিভাগ আৰু বড়োলেণ্ড কল্যাণ বিভাগৰ দায়িত্ব প্ৰদান কৰা হয়।
অতুল বৰাই ২০১৬ চনৰ পৰা কৃষি বিভাগৰ দায়িত্ব পালন কৰি আহিছিল। কিন্তু এইবাৰ তেওঁ কৃষি বিভাগৰ সলনি পঞ্চায়ত আৰু গ্ৰামোন্নয়ন বিভাগ লাভ কৰিছে। বাকী তিনিটা বিভাগ তেওঁৰ পূৰ্বৰ মন্ত্ৰীসভাতো আছিল।
ড° হিমন্ত বিশ্ব শৰ্মাৰ পূৰ্বৰ মন্ত্ৰীসভাত অজন্তা নেঁওগে বিত্ত বিভাগ আৰু মহিলা আৰু শিশু উন্নয়ন বিভাগৰ দায়িত্বত আছিল। এইবাৰ তেওঁ বিত্ত বিভাগৰ সলনি পৰ্যটন বিভাগ লাভ কৰিছে। তেওঁ প্ৰথমবাৰৰ বাবে ২০০২-০৩ চনত অসম চৰকাৰৰ মন্ত্ৰী পৰিষদত ৰাজ্যিক মন্ত্ৰী হিচাপে অন্তর্ভুক্ত হৈছিল আৰু সেই সময়ত পৰ্যটন আৰু খাদ্য আৰু অসামৰিক যোগান বিভাগৰ দায়িত্ব পালন কৰিছিল।
ৰামেশ্বৰ তেলী ২০১৯ চনৰ পৰা ২০২৪ চনলৈ কেন্দ্ৰীয় মন্ত্ৰী আছিল। সেই সময়ছোৱাত তেওঁ পেট্ৰ’লিয়াম, শ্ৰম আৰু খাদ্য প্ৰক্ৰিয়াকৰণ বিভাগৰ কেন্দ্ৰীয় ৰাজ্যিক মন্ত্ৰী হিচাপে দায়িত্ব পালন কৰিছিল। এইবাৰেই তেওঁ প্ৰথমবাৰৰ বাবে অসম মন্ত্ৰীসভাত মন্ত্ৰী হিচাপে অন্তর্ভুক্ত হৈছে। তেওঁ ২০০১, ২০০৬ আৰু ২০২৬ চনত অসম বিধানসভালৈ নিৰ্বাচিত হৈছিল।
অধিক পঢ়ক - অসমৰ সৈতে সীমা আলোচনা শীঘ্ৰেই পুনৰ আৰম্ভ হ’ব: মেঘালয়ৰ মুখ্যমন্ত্ৰী কনৰাড কে. ছাংমা
