গুৱাহাটীঃ ফাঁচী বজাৰত কেলচিয়াম কাৰ্বাইডেৰে কৃত্ৰিমভাৱে পকোৱা ছয় কুইণ্টল আম জব্দ কৰি ধ্বংস কৰিলে অসম খাদ্য সুৰক্ষা আয়ুক্তালয়ৰ দলটোৱে।
কেলচিয়াম কাৰ্বাইড ব্যৱহাৰ কৰি পকোৱা ফল খালে গিলিবলৈ অসুবিধা, বমি, ছালত ঘা আদি গুৰুতৰ স্বাস্থ্যজনিত সমস্যাৰ সৃষ্টি হ’ব পাৰে।
অভিযান চলোৱাৰ সময়ত বিষয়াসকলে আমৰ আন দুটা নমুনাও পৰীক্ষাৰ বাবে সংগ্ৰহ কৰে।
ফাঁচী বজাৰৰ ফলৰ বজাৰ পৰা গুৱাহাটী আৰু ৰাজ্যৰ বিভিন্ন বজাৰলৈ আমসহ বিভিন্ন ফল পঠিওৱা হয়। ইয়াৰ ফলত কৃত্ৰিমভাৱে পকোৱা ফল ৰাজ্যজুৰি বজাৰত বিয়পি থকাৰ আশংকা বৃদ্ধি পাইছে।
আম, কল বা আন ফল কৃত্ৰিমভাৱে পকোৱাৰ দৰে অবৈধ কাম বহু সময়ত সংশ্লিষ্ট কৰ্তৃপক্ষৰ চকুৰ সন্মুখতে সংঘটিত হয়।
ইয়াৰ মাজতে ভাৰতীয় খাদ্য সুৰক্ষা আৰু মানদণ্ড কৰ্তৃপক্ষই (FSSAI) এইবাৰো সকলো ৰাজ্যৰ খাদ্য সুৰক্ষা আয়ুক্ত আৰু আঞ্চলিক অধিকাৰীক ফলৰ বজাৰ, গুদামঘৰ, পাইকাৰী ব্যৱসায়ী আৰু বিতৰণ ব্যৱস্থাৰ ওপৰত কঠোৰ নজৰ ৰখাৰ নিৰ্দেশ দিছে, বিশেষকৈ য’ত কেলচিয়াম কাৰ্বাইড ব্যৱহাৰৰ সন্দেহ থাকে।
Food Safety and Standards Authority of India (FSSAI)-এ কেলচিয়াম কাৰ্বাইড বা আন নিষিদ্ধ পকোৱা ৰাসায়নিক পদাৰ্থ, মম আৰু কৃত্ৰিম ৰং ব্যৱহাৰ ৰোধ কৰিবলৈ বিশেষ অভিযান চলোৱাৰ পৰামৰ্শ দিছে।
FSSAI-এ লগতে কৈছে যে ফলৰ গুদামঘৰ বা ফলৰ ক্ৰেটৰ ওচৰত কেলচিয়াম কাৰ্বাইড পোৱা গ’লে, সেইটো খাদ্য ব্যৱসায়ীৰ বিৰুদ্ধে আইনী ব্যৱস্থা গ্ৰহণৰ বাবে পৰোক্ষ প্ৰমাণ হিচাপে গণ্য কৰা হ’ব পাৰে।
অধিক পঢ়ক - উৎকোচ লোৱাৰ অভিযোগত চাকৰিৰ পৰা বৰ্খাস্ত ; দুৰ্নীতিৰ বিৰুদ্ধে কঠোৰ ব্যৱস্থা গ্ৰহণ অসম চৰকাৰৰ
