কোকৰাঝাৰ: ব্ৰহ্মা কুমাৰী কেন্দ্ৰ, কোকৰাঝাৰ উদ্যোগত আয়োজন কৰা সুসভ্য সমাজ গঠনৰ লক্ষ্যৰে ১৩ দিনীয়া নিচা মুক্ত ৰেলী আজি সমাপ্ত হয়।
কাৰ্যসূচীৰ অংশ হিচাপে কোকৰাঝাৰত নিচা মুক্ত তথা ড্ৰাগছ-মুক্ত সমাজ গঠনৰ সজাগতা ৰেলী উলিওৱা হয়। কোকৰাঝাৰ নগৰৰ ছাত্ৰ-ছাত্ৰী, অভিভাৱক আৰু বাসিন্দাসকলৰ অংশগ্ৰহণেৰে এই ৰেলী কোকৰাঝাৰ চৰকাৰী এইচ এছ এম পি স্কুল খেলপথাৰৰ পৰা আৰম্ভ হৈ গ্ৰীণ ফিল্ড, বড়োফা নগৰলৈ আগবাঢ়ে।
গ্ৰীণ ফিল্ডত ড্ৰাগছজাতীয় পদাৰ্থৰে নিৰ্মিত প্ৰতীকী দহন কৰা হয়, আৰু ছাত্ৰ-ছাত্ৰীসকলে মাদকদ্ৰব্য আৰু মদ্যপানৰ পৰা আঁতৰি থকাৰ প্ৰতিজ্ঞা গ্ৰহণ কৰে। ইয়াৰ উপৰিও, যুৱসমাজ আৰু সমাজৰ ওপৰত ড্ৰাগছৰ বেয়া প্ৰভাৱ সন্দৰ্ভত ছাত্ৰ-ছাত্ৰীসকলে বাটৰ নাট প্ৰদৰ্শন কৰে।
সংবাদ মাধ্যমৰ সৈতে কথা পাতি আন্তঃৰাষ্ট্ৰীয় ব্ৰহ্মা কুমাৰী কেন্দ্ৰ, মাউণ্ট আবু, ৰাজস্থানৰ মেডিকেল বিভাগৰ বি কে ৰাজীৱে কয় যে কোকৰাঝাৰ ব্ৰহ্মা কুমাৰী সেৱা কেন্দ্ৰই সমাজৰ কল্যাণৰ উদ্দেশ্যে এই নিচা মুক্ত ৰেলীৰ দৰে মহৎ উদ্যোগ গ্ৰহণ কৰিছে। তেওঁ কয় যে এই ৰেলীৰ মূল লক্ষ্য হৈছে এখন ড্ৰাগছ-মুক্ত আৰু সুসভ্য সমাজ গঢ়ি তোলা।
ড্ৰাগছ আৰু মদ্যপানে সমাজত বেয়া প্ৰভাৱ পেলায়, সেয়ে সুসভ্য সমাজ গঠনৰ বাবে যুৱসমাজে ইয়াৰ পৰা আঁতৰি থাকিব লাগিব।
উল্লেখযোগ্য যে কোকৰাঝাৰ ব্ৰহ্মা কুমাৰী সেৱা কেন্দ্ৰই ১৯ এপ্ৰিলৰ পৰা ম'বাইল ভেন ৰেলী আৰু সভা-সমিতিৰ জৰিয়তে যুৱসমাজ আৰু নাগৰিক সমাজক সজাগ কৰি ড্ৰাগছ আৰু মদ্যপানৰ পৰা আঁতৰি থাকিবলৈ অহৰহ কাম কৰি আহিছে।
অধিক পঢ়ক - নমাটি গাঁৱত মাহেকীয়া স্বাস্থ্য সচেতনতা শিবিৰ আৰু চেনিটাৰী পেড বিতৰণ কাৰ্যসূচী অনুষ্ঠিত
