গুৱাহাটীঃ সদ্য সমাপ্ত বিধানসভা নিৰ্বাচনত এনডিএক বিজয়ৰ দিশে নেতৃত্ব দিয়া ড° হিমন্ত বিশ্ব শৰ্মাক পৰৱৰ্তী মুখ্যমন্ত্ৰী হিচাপে আজি অসম গণ পৰিষদ (এজিপি)-ৰ সদ্য নিৰ্বাচিত সকলো বিধায়কে সমৰ্থন জনাইছে। বিগত পাঁচ বছৰত এনডিএ চৰকাৰৰ সময়ছোৱাত ৰাজ্যখনৰ উন্নয়নৰ ক্ষেত্ৰত তেওঁৰ কৰ্মদক্ষতাত এজিপি বিধায়কসকলে সন্তুষ্টি প্ৰকাশ কৰে।
সদ্য সমাপ্ত নিৰ্বাচনত এজিপিৰ ১০জন প্ৰাৰ্থীয়ে নিজ নিজ সমষ্টিত বিজয় লাভ কৰিছে।
বুধবাৰে গুৱাহাটীৰ আমবাৰীত অৱস্থিত এজিপিৰ মুখ্য কাৰ্যালয়ত এজিপি বিধায়ক দলৰ প্ৰথমখন বৈঠক অনুষ্ঠিত হয়। বৈঠকত এজিপিৰ সদ্য নিৰ্বাচিত বিধায়কসকল উপস্থিত আছিল।
বিধায়ক দলৰ বৈঠকত এজিপি নেতাসকলে ড° হিমন্ত বিশ্ব শৰ্মাৰ নাম একেৰাহে দ্বিতীয়বাৰৰ বাবে মুখ্যমন্ত্ৰীৰ পদৰ বাবে প্ৰস্তাৱ কৰে। লগতে এজিপি বিধায়কসকলে অতুল বৰাক এজিপি বিধায়ক দলৰ নেতা হিচাপেও নিৰ্বাচিত কৰে।
বৈঠক শেষ হোৱাৰ পিছত এজিপিৰ সভাপতি অতুল বৰাই কয়, “বিগত পাঁচ বছৰত অসমত সামগ্ৰিক উন্নয়ন আৰু প্ৰগতিৰ জোৱাৰ আনিবলৈ সক্ষম হোৱা ড° হিমন্ত বিশ্ব শৰ্মাৰ নাম অসমৰ পৰৱৰ্তী মুখ্যমন্ত্ৰী হিচাপে সৰ্বসম্মতিক্ৰমে প্ৰস্তাৱ দিয়া হৈছে। অসমত সামগ্ৰিক উন্নয়নৰ গতি অধিক ত্বৰান্বিত কৰাৰ উদ্দেশ্যে এই প্ৰস্তাৱ গ্ৰহণ কৰা হৈছে। একে সময়তে এজিপিৰ সদ্য নিৰ্বাচিত সকলো বিধায়কে নিজ নিজ সমষ্টিৰ দ্ৰুত উন্নয়ন, অসমৰ সামগ্ৰিক বিকাশ, লগতে খিলঞ্জীয়া লোকসকলৰ দীৰ্ঘদিনীয়া সমস্যাসমূহৰ সমাধান আৰু উন্নয়নৰ বাবে সম্পূৰ্ণ শক্তিৰে কাম কৰাৰ সংকল্প গ্ৰহণ কৰিছে।”
অতুল বৰাই মত প্ৰকাশ কৰি কয় যে, “আজিৰ বৈঠকত মোক বিধায়ক দলৰ নেতা হিচাপে নিৰ্বাচিত কৰাৰ লগতে কেশৱ মহন্তক উপ-নেতা হিচাপে নিৰ্বাচিত কৰা হৈছে। ধৰ্মেশ্বৰ ৰায়ক বিধায়ক দলৰ মুখ্য হুইপ আৰু ড° তপন দাসক সচিব হিচাপে নিৰ্বাচিত কৰা হৈছে। মোৰ ওপৰত আস্থা ৰাখি নেতা হিচাপে দায়িত্ব অৰ্পণ কৰাৰ বাবে বিধায়ক দলৰ সকলো সদস্যলৈ মই আন্তৰিক কৃতজ্ঞতা জ্ঞাপন কৰিছোঁ। লগতে বৈঠকত উপস্থিত এজিপিৰ সদ্য নিৰ্বাচিত বিধায়কসকলক সফল কাৰ্যকালৰ বাবে মোৰ আন্তৰিক শুভেচ্ছা জনাইছোঁ,”।
এজিপি বিধায়কৰ তালিকাত এইবাৰ ছয়খন নতুন মুখ সংযোজন হৈছে — বিলাসীপাৰাৰ জীৱেশ ৰায়, বৰপেটাৰ দীপক কুমাৰ দাস, বজালীৰ ধৰ্মেশ্বৰ ৰায়, হাজো-শুৱালকুছিৰ প্ৰকাশ চন্দ্ৰ দাস, ডিমৰীয়াৰ ড° তপন দাস আৰু টীয়কৰ বিকাশ শইকীয়া। ১৫ সংখ্যক অসম বিধানসভাত এজিপিৰ সদস্য সংখ্যা আছিল ৯জন, আৰু এইবাৰ সেই সংখ্যা বৃদ্ধি পাই ১০জন হৈছে। ২০১৬ চনৰ পৰা এজিপি এনডিএৰ মিত্ৰদল হিচাপে জড়িত হৈ আছে।
অধিক পঢ়ক - অসম চৰকাৰে কঠোৰ কঠিন আৱৰ্জনা ব্যৱস্থাপনা ব্যৱস্থা ৰূপায়ণৰ নিৰ্দেশ জাৰি কৰিছে
