শিলচৰ: শিলচৰৰ মাধুৰবন্দ অঞ্চলত এক ৰহস্যজনক অৱস্থাত সাত মাহৰ গৰ্ভৱতী এগৰাকী মহিলাৰ মৃতদেহ উদ্ধাৰ হোৱাৰ ঘটনাই চাঞ্চল্যৰ সৃষ্টি কৰিছে। এই ঘটনাৰ পিছত তেওঁৰ স্বামীক আৰক্ষীয়ে গ্ৰেপ্তাৰ কৰিছে।
মৃত ৰাবিয়া বেগমক শিলচৰ মেডিকেল কলেজলৈ মৃত অৱস্থাত অনা হৈছিল। তেওঁৰ পূৰ্বেও দুটা সন্তান আছে। ৰাবিয়াৰ পৰিয়ালে স্বামী বীৰু মিঞাৰ বিৰুদ্ধে অভিযোগ দাখিল কৰাৰ পিছত আটক কৰা হয়। অভিযোগ অনুসৰি, বীৰুৰ বাহিৰত অন্য কোনো নাৰীৰ সৈতে সম্পৰ্ক আছিল।
তথ্য অনুসৰি, বীৰুৱে টেলিফোনযোগে নিজৰ শহুৰ দেউতাকক জনাইছিল যে ৰাবিয়া গুৰুতৰভাৱে অসুস্থ আৰু ইচ্ছা থাকিলে তেওঁলোক আহি দেখা কৰিব পাৰে। সেই খবৰ পাই ৰাবিয়াৰ পৰিয়াল মাধুৰবন্দলৈ গৈছিল যদিও ঘৰত কোনো লোকক লগ পোৱা নগ’ল।
পিছত তেওঁলোকে শিলচৰ মেডিকেল কলেজলৈ গৈ ৰাবিয়াৰ নিথৰ দেহ দেখা পায়।
ৰাবিয়াৰ ভায়েকে কয় যে বীৰু মিঞাই তেওঁৰ বাহিৰত অন্য কোনো নাৰীৰ সৈতে সম্পৰ্কৰ কথা জানিবৰ পিছৰে পৰা নিয়মিতভাৱে ৰাবিয়াক প্ৰহাৰ কৰিছিল। পৰিয়ালে লগতে কয় যে ৰাবিয়াৰ শৰীৰত গভীৰ আঘাতৰ চিন দেখা গৈছিল।
অধিক পঢ়ক - ৰঙিয়া ৰেল ষ্টেচনত চৰকাৰী ৰে'ল আৰক্ষীৰ ৬০গ্ৰাম হেৰ'ইন জব্দ, এজনক আটক
