গুৱাহাটী: ৰাজ্যত অত্যাৱশ্যকীয় সামগ্ৰীৰ দাম বৃদ্ধি নিয়ন্ত্ৰণ কৰিবলৈ দিছপুৰে সকলো জিলাৰ উপায়ুক্তসকলক (DC) কঠোৰ নিৰীক্ষণ কৰিবলৈ নিৰ্দেশ দিছে।
সদৌ অসম ছাত্ৰ সন্থা (AASU)সহ বিভিন্ন সংগঠনে অত্যাৱশ্যকীয় সামগ্ৰীৰ মূল্যবৃদ্ধিৰ বিৰুদ্ধে মাত মাতিছে। কিছুমান সংগঠনে চৰকাৰক আন্দোলনৰ সতর্কবাণীও দিছে।
মুখ্যমন্ত্ৰী হিমন্ত বিশ্ব শৰ্মায়ে ৰাজ্যত অত্যাৱশ্যকীয় সামগ্ৰীৰ দাম পৰ্যবেক্ষণ ব্যৱস্থা পৰ্যালোচনা কৰে। তেওঁ বিষয়াসকলক বজাৰত স্থিৰতা বজাই ৰাখিবলৈ আৰু অস্বাভাৱিক মূল্যবৃদ্ধি ৰোধ কৰিবলৈ কঠোৰ ব্যৱস্থা ল’বলৈ নিৰ্দেশ দিয়ে।
বৈঠকৰ পিছত দিছপুৰ উপায়ুক্তৰ নেতৃত্বত গঠিত জিলাভিত্তিক পৰ্যবেক্ষণ সমিতিক চাৰি দিনৰ ভিতৰত বৈঠক অনুষ্ঠিত কৰিবলৈ কোৱা হৈছে। লগতে DC, চেম্বাৰ আৰু ব্যৱসায়ী সংগঠনসমূহৰ সৈতে সাপ্তাহিক পৰ্যালোচনা বৈঠক অনুষ্ঠিত কৰাৰ নিৰ্দেশ দিয়া হৈছে।
দিছপুৰ জিলাৰ উপায়ুক্তসকলক খুচুৰা আৰু পাইকাৰী ব্যৱসায়ীসকলক সকলো সামগ্ৰীৰ মূল্য তালিকা প্ৰদৰ্শন নিশ্চিত কৰিবলৈও কৈছে। লগতে অস্বাভাৱিক মূল্যবৃদ্ধি ৰোধ কৰিবলৈ বজাৰত কঠোৰ তদাৰকি চলাবলৈ নিৰ্দেশ দিয়া হৈছে। যদি কোনো ব্যৱসায়ীয়ে অত্যাধিক দাম লয়, তেন্তে তেওঁলোকৰ ব্যৱসায়িক অনুজ্ঞাপত্ৰ (trade license) বাতিল কৰা হ’ব বুলিও সকীয়াই দিয়া হৈছে।
এলপিজি চিলিণ্ডাৰ বিতৰণৰ ক্ষেত্ৰতো দিছপুৰে জিলাৰ উপায়ুক্তসকলক PM Ujjwala আঁচনিৰ হিতাধিকাৰীসকলৰ আধাৰ নম্বৰ শীঘ্ৰে সংযোগ কৰিবলৈ নিৰ্দেশ দিছে, যাতে একেটা ব্যক্তিয়ে একাধিকবাৰ এলপিজি চিলিণ্ডাৰ নাপায়।
ৰাজ্যৰ সকলো জিলাতে মূল্যবৃদ্ধি পৰ্যবেক্ষণ কৰিবলৈ মনিটৰিং কমিটি আছে। কিন্তু সাধাৰণতে এই কমিটিসমূহ নিষ্ক্ৰিয় হৈ থাকে আৰু দিছপুৰে কঠোৰ নিৰ্দেশ দিয়াৰ পিছতহে সক্ৰিয় হয়। পূৰ্বতো এনে কমিটিয়ে বৈঠক অনুষ্ঠিত কৰি বজাৰত অভিযান চলাই কিছুমান ব্যৱসায়ীৰ বিৰুদ্ধে ব্যৱস্থা লৈছিল। কিন্তু কিছুদিন পিছত পুনৰ আগৰ অৱস্থালৈ ঘূৰি যায়। সেয়েহে দিছপুৰে এই কমিটিসমূহ বছৰজুৰি সক্ৰিয় কৰি ৰখাটো অতি প্ৰয়োজনীয়।
ব্যৱসায়িক মহলৰ মতে, অসমৰ বেছিভাগ অত্যাৱশ্যকীয় সামগ্ৰী বাহিৰৰ ৰাজ্যৰ পৰা আহে। সেয়েহে উৎসস্থলত দাম বৃদ্ধি হ’লে অসমতো স্বাভাৱিকভাৱে দাম বৃদ্ধি হয়। ইন্ধনৰ মূল্য বৃদ্ধি হোৱাৰ ফলত পৰিবহণ ব্যয় বাঢ়িছে, আৰু তাৰ ফলত আন সামগ্ৰীৰ দামো বৃদ্ধি পাইছে। অধিকাংশ অত্যাৱশ্যকীয় সামগ্ৰী ট্ৰাকযোগে অসমলৈ অনা হয়। কিছুমান অসাধু ব্যৱসায়ীয়ে এই পৰিস্থিতিৰ সুযোগ লোৱা বুলিও তেওঁলোকে উল্লেখ কৰে।
