গুৱাহাটী: ৰাজ্যৰ মুঠ ১৭৪খন বিদ্যালয়—যাৰ ভিতৰত ১৪০খন ব্যক্তিগত আৰু ৩৪খন চৰকাৰী তথা প্ৰাদেশিকীকৃত বিদ্যালয়—HSLC (হাই স্কুল লিভিং চাৰ্টিফিকেট) পৰীক্ষাত একেবাৰে শূন্য সফলতাৰ হাৰ লাভ কৰিছে। এইটোতেই শেষ নহয়। এইবাৰৰ HSLC পৰীক্ষাত আন ১৩৫খন বিদ্যালয়—৬৭খন ব্যক্তিগত, ৬৮খন চৰকাৰী তথা প্ৰাদেশিকীকৃত—ৰ ফলাফল ১ শতাংশৰ পৰা ১০ শতাংশৰ ভিতৰত সীমাবদ্ধ। চৰকাৰে এই বিদ্যালয়সমূহৰ বিৰুদ্ধে ব্যৱস্থা গ্ৰহণ আৰম্ভ কৰাৰ ফলত এই বিদ্যালয়ৰ ভৱিষ্যৎ অনিশ্চিত হৈ পৰিছে, লগতে ইয়াৰ ছাত্ৰ-ছাত্ৰীসকলৰ ভৱিষ্যতো অনিশ্চয়তাৰ মাজত পৰিছে।
ইয়াত এটা প্ৰশ্ন উদ্ভৱ হয়: এই বিদ্যালয়সমূহে ছাত্ৰ-ছাত্ৰীসকলৰ ভৱিষ্যৎ গঢ়িছে নে তেওঁলোকৰ বাবে বিপৰ্যয় মাতিছে ?
এইবাৰৰ HSLC পৰীক্ষাত সামগ্ৰিক উত্তীৰ্ণতাৰ হাৰ ৬৫.৬২ শতাংশ। এই তালিকাত ডিমা হাসাও জিলাই ৮৩.২৩ শতাংশ সফলতাৰ হাৰে শীৰ্ষস্থান দখল কৰিছে, তাৰ পাছতেই শিৱসাগৰ ৮৪.০৮ শতাংশ আৰু ডিব্ৰুগড় ৭৮.৪৬ শতাংশ সফলতাৰ হাৰে স্থান লাভ কৰিছে।
ৰাজ্যৰ মুঠ ১২খন জিলাৰ প্ৰদৰ্শন গড়ৰ তলত, অৰ্থাৎ এইবাৰৰ HSLC পৰীক্ষাত সামগ্ৰিক উত্তীৰ্ণতাৰ হাৰৰ তলত আছে। এই ১২খন জিলা হৈছে— কাছাৰ (৪৯.১৩%), বঙাইগাঁও (৪৯.৬২%), ধুবুৰী (৫০.০২%), হাইলাকান্দি (৫১.৮১%), মৰিগাঁও (৫৭.৯৭%), শোণিতপুৰ (৫৬.০২%), হোজাই (৫৯.৯৬%), মাজুলী (৫৯.৪৬%), দক্ষিণ শালমৰা (৩৯.২৩%), বিশ্বনাথ (৬১.১৬%), গোৱালপাৰা (৬২.০৪%) আৰু নগাঁও (৬৩.৫৭%)।
HSLC-২০২৬ ফলাফল অনুসৰি, শূন্য সফলতাৰ হাৰ থকা চৰকাৰী বিদ্যালয়সমূহৰ জিলা-ভিত্তিক সংখ্যা হৈছে— বৰপেটা (২), কাছাৰ (৬), ধুবুৰী (৩), ধেমাজি (৩), গোৱালপাৰা (২), হাইলাকান্দি (১), যোৰহাট (৩), কামৰূপ (১), কোকৰাঝাৰ (১), লক্ষীমপুৰ (১), মৰিগাঁও (১), নগাঁও (৩), নলবাৰী (১), ডিমা হাসাও (১), শিৱসাগৰ (৩), শোণিতপুৰ (১) আৰু হোজাই (১)।
ব্যক্তিগত বিদ্যালয়সমূহৰ ক্ষেত্ৰত শূন্য সফলতাৰ হাৰ থকা জিলা-ভিত্তিক সংখ্যা হৈছে— বৰপেটা (৪), বঙাইগাঁও (৪), বাক্সা (৬), বিশ্বনাথ (৪), চৰাইদেউ (১), চিৰাং (২), কাছাৰ (১৭), ধুবুৰী (৫), দৰং (৩), ধেমাজি (৫), ডিব্ৰুগড় (৮), গোৱালপাৰা (২), গোলাঘাট (৪), হাইলাকান্দি (৪), যোৰহাট (৫), কামৰূপ (৭), কাৰ্বি আংলং (৪), শ্রীভূমি (২), কোকৰাঝাৰ (৩), লক্ষীমপুৰ (৪), মাজুলী (৪), মৰিগাঁও (৪), নগাঁও (২), নলবাৰী (৫), ডিমা হাসাও (২), শিৱসাগৰ (৩), শোণিতপুৰ (৮), তিনিচুকীয়া (৩), উদালগুৰি (৩), কামৰূপ-মেট্ৰো (১১) আৰু হোজাই (১)।
অধিক পঢ়ক - মণিপুৰ সংকটৰ তৃতীয় বৰ্ষপূর্তি উপলক্ষে শান্তি সমাবেশ; হাজাৰ হাজাৰ লোকে অংশগ্ৰহণ কৰে
