গোৰেশ্বৰ: আগন্তুক অসম বিধানসভা নিৰ্বাচন, ২০২৬ৰ ভোট গণনাৰ সময়ত শান্তি, আইন-শৃংখলা আৰু সুৰক্ষা বজাই ৰাখিবলৈ তামুলপুৰ জিলা প্ৰশাসনে গুৰুত্বপূৰ্ণ নিষেধাজ্ঞা জাৰি কৰিছে। জিলা আয়ুক্ত আইএএছ চিমি কৰণে ভাৰতীয় নাগৰিক সুৰক্ষা সংহিতা (BNSS)ৰ ধাৰা ১৬৩ অনুসৰি এই আদেশ জাৰি কৰিছে।
আদেশ অনুসৰি, তামুলপুৰ উচ্চতৰ মাধ্যমিক বিদ্যালয়ত স্থাপন কৰা ভোট গণনা কেন্দ্ৰৰ ১০০ মিটাৰ ব্যাসাৰ্ধৰ ভিতৰত জনসমাগম আৰু বাহন ৰখা সম্পূৰ্ণভাৱে নিষিদ্ধ কৰা হৈছে। লগতে বৈধ পৰিচয়-পত্ৰ নথকা কোনো ব্যক্তিৰ প্ৰৱেশ নিষিদ্ধ কৰা হৈছে।
ইয়াৰ লগতে ১০০ মিটাৰ পৰিসৰৰ ভিতৰত অস্থায়ী দোকান বা খাদ্যৰ দোকান স্থাপন সম্পূৰ্ণ নিষিদ্ধ কৰা হৈছে; অস্ত্ৰ-শস্ত্ৰ, লাঠি বা অস্ত্ৰ হিচাপে ব্যৱহাৰযোগ্য যিকোনো বস্তু কঢ়িয়াই নিয়া আৰু বিজয় শোভাযাত্ৰা অনুষ্ঠিত কৰাও নিষিদ্ধ কৰা হৈছে; ফটকা, বিস্ফোৰক বা যিকোনো ধৰণৰ শব্দ উৎপাদক যন্ত্ৰ ব্যৱহাৰ কৰাটো নিষিদ্ধ কৰা হৈছে; বাহনত সংলগ্ন বা অন্য ধৰণে লাউডস্পীকাৰ ব্যৱহাৰ কৰাত সীমাবদ্ধতা আৰোপ কৰা হৈছে; লগতে ভোট গণনা হলৰ ভিতৰত ম'বাইল ফোন, কেমেৰা আৰু ইলেক্ট্ৰনিক সামগ্ৰী নিয়া নিষিদ্ধ আৰোপ কৰা হৈছে।
এই আদেশ নিৰ্বাচনী কৰ্তব্যত নিযুক্ত নিৰাপত্তা বাহিনী আৰু চৰকাৰী বিষয়া-কৰ্মচাৰীসকলৰ ক্ষেত্ৰত প্ৰযোজ্য নহ’ব। এই নিৰ্দেশনা ২০২৬ চনৰ ৪ মে’ৰ পৰা কাৰ্যকৰী হ’ব আৰু ভোট গণনা প্ৰক্ৰিয়া সম্পূৰ্ণ নোহোৱা পৰ্যন্ত বলবৎ থাকিব।
অধিক পঢ়ক - আমি বড়োফাৰ নীতিৰ অধীনত একত্ৰিত হৈছো: বিটিচিৰ মুৰব্বী হাগ্ৰামা মহিলাৰী
