গুৱাহাটী: এটা মধ্যবিত্ত পৰিয়ালৰ এজন যুৱকে চাৰি বছৰ পূৰ্বে বিধায়ক হোৱাৰ এক ডাঙৰ সপোন দেখিছিল। আজি সেই যুৱকেই নিজৰ জনগোষ্ঠীৰ পৰম্পৰাগত পোছাক পৰিধান কৰি বিধানসভাত শপত গ্ৰহণ কৰিলে। তেওঁৰ চাৰি বছৰৰ দীঘলীয়া স্বপ্ন আজি বাস্তৱত পৰিণত হ’ল।
সেই যুৱকজন হৈছে বিজেপিৰ পবিত্ৰ ৰাভা, যিয়ে ২০২৬ চনৰ অসম বিধানসভা নিৰ্বাচনত গোৱালপাৰা পশ্চিম বিধানসভা সমষ্টিৰ পৰা বিজয় লাভ কৰে।
আজি শপত গ্ৰহণ অনুষ্ঠানত পবিত্ৰ ৰাভাই ৰাভা জনগোষ্ঠীৰ পৰম্পৰাগত পোছাক পৰিধান কৰি অসম বিধানসভালৈ আহে। তেওঁ সংস্কৃত ভাষাত শপত গ্ৰহণ কৰে।
গোৱালপাৰা জিলাৰ আগিয়া মহাবিদ্যালয়ৰ পৰা স্নাতক ডিগ্ৰী লাভ কৰা পবিত্ৰ ৰাভা ছাত্ৰজীৱনৰ পৰাই সামাজিক কাম-কাজৰ সৈতে জড়িত আছিল।
বিধানসভাৰ বাহিৰত সংবাদ মাধ্যমৰ সৈতে কথা পাতি পবিত্ৰ ৰাভাই কয়, “মোৰ অনুভৱ হৈছে যেন মই সপোন দেখিছোঁ। চাৰি বছৰ আগতে মই মোৰ WhatsApp ষ্টেটাছত লিখিছিলোঁ — ‘মোৰ সপোন বাস্তৱতাৰ দিশে আগবাঢ়িছে।’ আজি মই মোৰ WhatsApp ষ্টেটাছ আপডেট কৰি লিখিছোঁ যে মোৰ স্বপ্ন বাস্তৱত পৰিণত হৈছে।
বিগত চাৰি বছৰ আছিল এক সংগ্ৰামময় যাত্ৰা। এই সফলতাৰ বাবে মই মাননীয় মুখ্যমন্ত্ৰী, বিজেপিৰ মাননীয় ৰাজ্য সভাপতি, দলৰ নেতা-কর্মী আৰু মোৰ সমষ্টিৰ ৰাইজক ধন্যবাদ জনাইছোঁ।
মই গোৱালপাৰা পশ্চিম সমষ্টিৰ ৰাইজৰ সুখ-দুখৰ সময়ত সদায় তেওঁলোকৰ সৈতে থাকিম। মই এটা সাধাৰণ পৰিয়ালৰ পৰা আহি ৰাজ্যৰ বিধানসভালৈ উপস্থিত হ’ব পাৰিছোঁ। ইয়াৰ বাবে মই ঈশ্বৰৰ ওচৰত কৃতজ্ঞ।”
পবিত্ৰ ৰাভাই আৰু কয়, “মোৰ বিধানসভা সমষ্টিত বহু চৰকাৰী ভূমি, সংৰক্ষিত বনাঞ্চল আৰু খিলঞ্জীয়া লোকৰ ভূমি বেদখলকাৰীৰ দখললৈ গৈছে। এই ভূমিসমূহ বেদখলমুক্ত কৰাটো মোৰ মুখ্য দায়িত্ব।”
অধিক পঢ়ক - অসম বিধানসভাৰ শপত গ্ৰহণ: পৰম্পৰাগত পোছাকত নতুন বিধায়কসকলৰ জনসেৱাৰ প্ৰতিশ্ৰুতি
