গুৱাহাটী: অসম বিধানসভাৰ সচিবালয়ে পুনৰ নিয়োগৰ ভিত্তিত কৰ্মৰত ১২জন অৱসৰপ্ৰাপ্ত বিষয়া আৰু কৰ্মচাৰীক ২৯ মে’, ২০২৬ৰ পৰা দায়িত্বৰ পৰা অব্যাহতি দিছে।
সচিবালয়ৰ এক চৰকাৰী আদেশ অনুসৰি, অসম বিধানসভাৰ অধ্যক্ষ ৰঞ্জিত কুমাৰ দাসৰ নিৰ্দেশমৰ্মে এই সিদ্ধান্ত গ্ৰহণ কৰা হৈছে।
অব্যাহতি দিয়া লোকসকল বিভিন্ন শাখাত OSD, সমন্বয়ক, কাৰ্যালয় সহায়ক, গেটকিপাৰ আৰু অন্যান্য সহায়ক কৰ্মচাৰী হিচাপে কৰ্মৰত আছিল। তেওঁলোক বিধানসভাৰ ৰাজহুৱা উদ্যোগ সমিতি, বিধায়ক আৱাস, ইছ্যু শাখা, আইন প্ৰণয়ন শাখা, প্ৰতিষ্ঠান শাখা, নিৰাপত্তা শাখা আৰু CPA শাখাত নিয়োজিত আছিল।
অব্যাহতি পোৱা লোকসকল হৈছে ৰঞ্জিত কুমাৰ শৰ্মা, পংকজ কুমাৰ শৰ্মা, ধনজিত তালুকদাৰ, তাৰিণী কান্ত স্বৰ্গীয়াৰী, সেৱালী দেৱী, কবি ৰাম হালৈ, কুলধৰ কামান, সমীৰ দাস, মাধৱ তালুকদাৰ, ভৱেন পেগু, বিশ্বজিৎ শোম আৰু দিল্লী ৰাম শৰ্মা।
ইয়াৰ পূৰ্বে, ২৭ মে’ত বিধানসভাৰ অধ্যক্ষ ৰঞ্জিত কুমাৰ দাসে মেয়াদ বৃদ্ধি কৰি কৰ্মৰত সচিব দুলাল পেগুক পদৰ পৰা অপসাৰণ কৰিছিল। লগতে নতুন সচিব নিযুক্তি নোহোৱালৈকে ৰাজীৱ ভট্টাচাৰ্যক কাৰ্যবাহী সচিব হিচাপে দায়িত্ব দিয়া হৈছে।
অধিক পঢ়ক - উচ্চতম ন্যায়ালয়ৰ নিৰ্দেশ উপেক্ষা কৰি ঘাইপথত ট্ৰাক পাৰ্কিং, অসমত দুৰ্ঘটনাত চাৰিজনৰ মৃত্যু
