গুৱাহাটীঃ অসমত জলসম্পদ, লোক নিৰ্মাণ বিভাগ (PWD), জলসিঞ্চন, গুৱাহাটী পৌৰ নিগম (GMC) আদি বহু বিভাগৰ কেইবাটাও প্ৰকল্প বহু বছৰ ধৰি অসম্পূৰ্ণ হৈ থকাৰ ফলত ৰাজ্যৰ ধনৰ অপচয় হৈছে। এই প্ৰকল্পসমূহত চৰকাৰী কোষাগাৰৰ প্ৰায় ৩৮৭ কোটি টকা ব্যয় হ’লেও সাধাৰণ মানুহে ইয়াৰ কোনো লাভ পোৱা নাই।
অধিকাৰিক তথ্য অনুসৰি, ২০১০ চনৰ পৰাও আৰম্ভ হোৱা প্ৰায় ৩৫টা প্ৰকল্প এতিয়াও সম্পূৰ্ণ হোৱা নাই। এই ক্ষেত্ৰত দায়িত্ব কাৰ ওপৰত পৰিব, সেয়া এক ডাঙৰ প্ৰশ্ন হৈ পৰিছে।
জলসম্পদ বিভাগে ২০১৪ৰ পৰা ২০২০ চনৰ ভিতৰত আৰম্ভ কৰা ৬টা প্ৰকল্পত প্ৰায় ২৪০ কোটি টকা খৰচ কৰিছে। কিন্তু ৫১৫ কোটি টকাৰ এই প্ৰকল্পসমূহ এতিয়াও সম্পূৰ্ণ হোৱা নাই।
একেদৰে, জলসিঞ্চন বিভাগৰ ১১টা প্ৰকল্প চাৰি বছৰৰ আগতে আৰম্ভ হৈছিল। ৫৮ কোটি টকাৰ অনুমানিত ব্যয়ৰ বিপৰীতে ইতিমধ্যে ৬৩ কোটি টকা খৰচ হ’লেও কাম শেষ হোৱা নাই।
PWD বিভাগৰ ১৬টা প্ৰকল্প ২০০৯ৰ পৰা ২০১৪ চনৰ ভিতৰত আৰম্ভ হৈছিল। ১০৫ কোটি টকাৰ প্ৰকল্পত ইতিমধ্যে ৬৮ কোটি টকা ব্যয় হৈছে।
GMCৰ উলুবাৰী মাৰ্কেট কমপ্লেক্স প্ৰকল্প ২০১৪ চনত আৰম্ভ হৈছিল। ২.৬০ কোটি টকাৰ এই প্ৰকল্পত ১.৪৯ কোটি টকা খৰচ হ’লেও কাম বন্ধ হৈ আছে। গণেশগুৰি মাৰ্কেট প্ৰকল্পৰ অৱস্থাও একেই। প্ৰায় ৯০ শতাংশ টকা ব্যয় হোৱাৰ পাছতো প্ৰকল্প সম্পূৰ্ণ হোৱা নাই।
CAGৰ ২০২৪-২৫ বৰ্ষৰ প্ৰতিবেদনত কোৱা হৈছে যে, অসম্পূৰ্ণ প্ৰকল্পত ধন আবদ্ধ হৈ থাকিলে চৰকাৰী ব্যয়ৰ গুণগত মান কমি যায় আৰু জনসাধাৰণে বহুদিন ধৰি ইয়াৰ লাভৰ পৰা বঞ্চিত হয়। লগতে ঋণ লৈ কৰা এই প্ৰকল্পসমূহৰ বাবে চৰকাৰৰ ওপৰত সুদ আৰু ঋণ পৰিশোধৰ বোজাও বৃদ্ধি পায়।
সূত্ৰ অনুসৰি, বহু সময়ত প্ৰকল্প আৰম্ভ কৰাৰ আগতে সঠিকভাৱে সমীক্ষা কৰা নহয়। আনহাতে, কাম আৰম্ভ হোৱাৰ পিছতো সময়মতে তদাৰকী নোহোৱাৰ বাবে বহু প্ৰকল্প লেহেমীয়া হৈ পৰে। কিছুমান সম্পূৰ্ণ হোৱা প্ৰকল্পো পৰৱৰ্তী আনুষ্ঠানিকতা সম্পূৰ্ণ নোহোৱাৰ বাবে ব্যৱহাৰ নোহোৱাকৈ পৰি আছে। খাৰুপেটিয়াৰ ক’ল্ড ষ্ট’ৰেজ ইয়াৰ উদাহৰণ।
যদি চৰকাৰে এনে দীৰ্ঘদিনীয়া বিলম্বৰ বাবে দায়ী বিষয়াসকলৰ বিৰুদ্ধে ব্যৱস্থা গ্ৰহণ নকৰে, তেন্তে আগন্তুক দিনতো ৰাজ্যৰ কোটি কোটি টকাৰ অপচয় হৈ থাকিব।
অধিক পঢ়ক - কাজিৰঙা ৰাষ্ট্ৰীয় উদ্যানত পৰ্যটকৰ অন্যতম প্রধান আকৰ্ষণ হৈ উঠিছে ‘সোণালী বাঘ’
