গুৱাহাটী: অসমৰ ৰাজ্যপাল লক্ষ্মণ প্ৰসাদ আচাৰ্যই আজি লোক ভৱনৰ কনফাৰেন্স হলত ভাৰতীয় সংবিধানৰ অনুচ্ছেদ ১৮০(১) অনুসৰি ১৬সংখ্যক অসম বিধানসভাৰ (ALA) প্ৰো-টেম স্পীকাৰ হিচাপে বিধায়ক চন্দ্ৰমোহন পাটোৱাৰীক শপত বাক্য পাঠ কৰায়।
ইয়াৰ আগতে ALA-ৰ সচিব দুলাল পেগুৱে বিধানসভাৰ কাৰ্যবাহী আৰম্ভ কৰাৰ অনুমতি ৰাজ্যপালৰ পৰা বিচাৰিছিল। এই অনুষ্ঠানত ৰাজ্যপালৰ আয়ুক্ত আৰু সচিব এছ. এছ. মীনাক্ষী সুন্দৰমসহ অসম বিধানসভা আৰু লোক ভৱনৰ বহু বিষয়া উপস্থিত আছিল।
সাতবাৰকৈ বিধায়ক হোৱা চন্দ্ৰমোহন পাটোৱাৰী ১৬সংখ্যক অসম বিধানসভাৰ আটাইতকৈ জ্যেষ্ঠ বিধায়ক। শেহতীয়া বিধানসভা নিৰ্বাচনত তেওঁ টিহু সমষ্টিৰ পৰা কংগ্ৰেছ প্ৰাৰ্থী ৰতুল পাটোৱাৰীক পৰাজিত কৰি জয়ী হৈছিল। ইয়াৰ আগতে তেওঁ ধৰ্মপুৰ সমষ্টিৰ পৰা ছয়বাৰ বিধায়ক হৈছিল।
পাটোৱাৰীয়ে ২১ মে’ত অনুষ্ঠিত হ’বলগীয়া ১৬সংখ্যক অসম বিধানসভাৰ প্ৰথম অধিৱেশনৰ প্ৰথম দিনা অধ্যক্ষতা কৰিব আৰু বিধানসভাৰ ১২৫জন বিধায়কক শপত পাঠ কৰাব। সেই দিনাই নতুন অধ্যক্ষ (Speaker) নিৰ্বাচিত কৰা হ’ব। ২২ মে’ত ৰাজ্যপালে নৱ-নিৰ্বাচিত বিধায়কসকলক সম্বোধন কৰিব। অধিৱেশনখন ২১, ২২, ২৫ আৰু ২৬ মে’ত অনুষ্ঠিত হ’ব।
মুখ্যমন্ত্ৰী ড° হিমন্ত বিশ্ব শৰ্মাই বিধায়ক ৰঞ্জিত কুমাৰ দাসক ১৬সংখ্যক অসম বিধানসভাৰ অধ্যক্ষ হিচাপে মনোনীত কৰিছে।
অধিক পঢ়ক - বিশ্বব্যাপী তেল বৃদ্ধিৰ মাজতে গুৱাহাটীত পেট্ৰ’ল, ডিজেলৰ মূল্য আকাশলংঘী
