তেজপুৰঃ তেজপুৰৰ বিশ্ববিখ্যাত লিচুক প্ৰচাৰ আৰু স্থানীয় পৰিচয় ৰক্ষাৰ বাবে এক উল্লেখযোগ্য পদক্ষেপ হিচাপে অঞ্চলটোত উৎপাদিত ১০ বিধ লিচুক থলুৱা অসমীয়া নাম দিয়াৰ সিদ্ধান্ত গ্ৰহণ কৰা হয়। ৬ জুন আৰু ৭ জুনত অনুষ্ঠিত হ’বলগীয়া দ্বিতীয় বাৰ্ষিক তেজপুৰ লিচু মহোৎসৱৰ পূৰ্বে আজি জিলা উপায়ুক্ত কাৰ্যালয়ৰ কনফাৰেন্স হলত অনুষ্ঠিত এক গুৰুত্বপূৰ্ণ বৈঠকত এই সিদ্ধান্ত গ্ৰহণ কৰা হয়।
সভাখনত সভাপতিত্ব কৰে শোণিতপুৰ জিলাৰ জিলা আয়ুক্ত তথা তেজপুৰ লিচু উৎসৱ উদযাপন সমিতিৰ সভাপতি আনন্দ কুমাৰ দাসে। বৈঠকত কৃষি বিজ্ঞানী, চৰকাৰী বিষয়া, লিচু খেতিয়ক, উদ্যোগী, শিক্ষাবিদ আৰু বিভিন্ন সংগঠনৰ প্ৰতিনিধিসকলে অংশগ্ৰহণ কৰে।
বিজ্ঞানীসকলে জনোৱা মতে, তেজপুৰত প্ৰায় ১৫বিধ বিভিন্ন জাতৰ লিচু উপলব্ধ। ইয়াৰ ভিতৰত জিআই (GI) টেগপ্ৰাপ্ত পাঁচটা জাত — বোম্বাইয়া, বিলাতী, এলাচী, চাহী আৰু পিয়াজী —ৰ নাম পৰিৱৰ্তন কৰিব নোৱাৰি। কিন্তু বাকী জাতসমূহ, যেনে কাঠ বোম্বাই, গ্ৰীণ বিলাতী, ৰঙীয়া আৰু চায়না-৩ আদিক সিহঁতৰ সোৱাদ, ৰং, আকাৰ আৰু বৈশিষ্ট্যৰ ভিত্তিত অসমীয়া নাম প্ৰদান কৰা হ'ব।
এই লিচু জাতসমূহৰ বাবে উপযুক্ত থলুৱা নাম চূড়ান্ত কৰাৰ উদ্দেশ্যে এখন সমিতি গঠন কৰা হৈছে।
সভাত ভাষণ দি তেজপুৰৰ বিধায়ক পৃথিৰাজ ৰাভাই ঘোষণা কৰে যে চৰকাৰে শীঘ্ৰেই “ঘৰে ঘৰে লিচু” আঁচনি আৰম্ভ কৰিব। এই আঁচনিৰ অধীনত জিলাখনৰ বিভিন্ন পৰিয়ালৰ ঘৰত উন্নতমানৰ লিচুৰ পুলি ৰোপণ কৰা হ'ব।
আগতীয়াকৈ অনুষ্ঠিত হ'ব লগীয়া এই উৎসৱত ৫০ৰো অধিক প্ৰদৰ্শক, প্ৰায় ৩০জন কৃষক আৰু কৃষক উৎপাদক সংগঠন (FPO), লগতে দেশ-বিদেশৰ একাধিক ক্ৰেতাই অংশগ্ৰহণ কৰিব বুলি আশা কৰা হৈছে। উৎসৱৰ অংশ হিচাপে কাৰিকৰী অধিৱেশন, সাংস্কৃতিক অনুষ্ঠান, লিচু বাগিচা পৰিদৰ্শন আৰু অধিক লিচু জাতক জিআই টেগ প্ৰদানৰ বিষয়ে কৰ্মশালাৰো আয়োজন কৰা হ'ব।
অধিক পঢ়ক - অসমঃ বক্সা পাহাৰৰ ঐতিহাসিক শিলাখোদিত ভাস্কৰ্যস্থলীলৈ যোৱা একমাত্ৰ বাঁহৰ দলং ভাঙি পৰিল
