নতুন দিল্লী: চলি থকা পশ্চিম এছিয়া সংকটৰ মাজত তেল বিপণন কোম্পানীসমূহে (OMCs) লোকচানৰ মুখামুখি হোৱাৰ ফলত শুকুৰবাৰে পেট্ৰ’ল আৰু ডিজেলৰ মূল্য প্ৰতি লিটাৰত ৩ টকাকৈ বৃদ্ধি কৰিছে। এই সংশোধিত মূল্য তৎক্ষণাত সমগ্ৰ দেশত কাৰ্যকৰী কৰা হৈছে।
দিল্লীত পেট্ৰ’লৰ দাম প্ৰতি লিটাৰত ৩.১৪ টকা বৃদ্ধি পাই ৯৭.৭৭ টকা হৈছে, আনহাতে ডিজেলৰ দাম ৩.১১ টকা বৃদ্ধি পাইছে।
ইফালে মধ্য প্ৰাচ্যৰ সংকটৰ মাজতে তেল কোম্পানীসমূহে CNGৰ মূল্যও বৃদ্ধি কৰিছে। শুকুৰবাৰৰ পৰা CNGৰ দাম প্ৰতি কিলোগ্ৰামত ২ টকা বৃদ্ধি পাইছে। দিল্লীত নতুন CNG মূল্য হৈছে ৭৯.০৯ টকা প্ৰতি কিলোগ্ৰাম।
OMCs-এ ক্ৰুড তেলৰ মূল্য বৃদ্ধি হোৱাৰ পিছতো খুচুৰা ইন্ধনৰ দাম স্থিৰ ৰখাৰ ফলত বৃহৎ বিত্তীয় লোকচানৰ সন্মুখীন হৈছে।
কেন্দ্ৰীয় পেট্ৰ’লিয়াম মন্ত্ৰালয়ৰ সংযুক্ত সচিব সুজাতা শৰ্মাৰ মতে, পেট্ৰ’ল, ডিজেল আৰু LPG-ৰ মিলিত আণ্ডাৰ-ৰিকভাৰী প্ৰতি মাহে প্ৰায় ৩০,০০০ কোটি টকালৈ বৃদ্ধি পাইছে।
তেওঁ কয়, “আমাৰ OMC-সমূহে অধিক মূল্যত ক্ৰুড তেল কিনিবলগীয়া হৈছে, কিন্তু গ্ৰাহকক সুৰক্ষিত ৰাখিবলৈ সেই অনুপাতে মূল্য বৃদ্ধি কৰা হোৱা নাই। ইয়াৰ ফলত তেওঁলোকৰ বিত্তীয় অৱস্থাত প্ৰভাৱ পৰিছে।”
তেওঁ লগতে কয় যে কেন্দ্ৰীয় চৰকাৰে ইতিমধ্যে পেট্ৰ’ল আৰু ডিজেলৰ ওপৰত এক্সাইজ ডিউটি কমাই প্ৰায় ১৪,০০০ কোটি টকাৰ মাহেকীয়া ৰাজহ ত্যাগ কৰিছে, তথাপিও আণ্ডাৰ-ৰিকভাৰী বৃদ্ধি পাই গৈছে।
ভাৰতৰ ৰাজ্যিক মালিকানাধীন তেল বিপণন কোম্পানীসমূহে (OMCs) যদি ক্ৰুড তেলৰ দাম উচ্চ স্তৰতেই থাকে, তেন্তে FY26 বিত্তীয় বৰ্ষৰ সম্পূৰ্ণ লাভ ধ্বংস হোৱাৰ সম্ভাৱনা আছে বুলি পেট্ৰ’লিয়াম মন্ত্ৰী হাৰদীপ সিং পুৰীয়ে সতৰ্ক কৰি দিছে। মধ্য প্ৰাচ্যৰ উত্তেজনা বৃদ্ধি পোৱাৰ মাজতে তেওঁ এই মন্তব্য কৰে।
CII Annual Business Summit 2026-ত ভাষণ দি পুৰীয়ে কয় যে মধ্য প্ৰাচ্যৰ সংঘাতৰ ফলত সৃষ্টি হোৱা চলি থকা শক্তি সংকটে ভাৰতৰ ইন্ধন খুচুৰা কোম্পানীসমূহৰ ওপৰত তীব্ৰ চাপ সৃষ্টি কৰিছে। তেওঁৰ মতে, বৰ্তমান তেল বিপণন কোম্পানীসমূহে দৈনিক প্ৰায় ১,০০০ কোটি টকা লোকচান ভুগি আছে। (IANS)
অধিক পঢ়ক - অসম বিধানসভাৰ বাজেট অধিৱেশন জুলাইৰ আৰম্ভণিতে অনুষ্ঠিত হ’ব, হিমন্ত বিশ্ব শৰ্মা
