নতুন দিল্লী: ভাৰতীয় নিৰ্বাচন আয়োগে (ECI) বৃহস্পতিবাৰে ১৬খন ৰাজ্য আৰু তিনিখন কেন্দ্ৰীয় শাসিত অঞ্চলত বিশেষ নিবিড় পুনৰীক্ষণ (SIR) কাৰ্যসূচী আৰম্ভ কৰাৰ ঘোষণা কৰে। আয়োগে কয় যে ভোটাৰ তালিকাৰ সঠিকতা আৰু স্বচ্ছতা অধিক শক্তিশালী কৰাৰ লক্ষ্যৰে এইটো এক বৃহৎ ৰাষ্ট্ৰব্যাপী অভিযান হ’ব।
আয়োগৰ মতে, চলি থকা জনগণনাৰ গৃহ-তালিকাভুক্তিকৰণ কাৰ্যত নিয়োজিত সাধাৰণ ক্ষেত্ৰ পৰ্যায়ৰ কৰ্মীবাহিনীৰ উপলব্ধতা লক্ষ্য কৰি SIR-ৰ তৃতীয় পৰ্যায়ৰ সময়সূচী চূড়ান্ত কৰা হৈছে।
তৃতীয় পৰ্যায় আৰম্ভ হোৱাৰ লগে লগে হিমাচল প্ৰদেশ, জম্মু-কাশ্মীৰ আৰু লাডাখ বাদে সমগ্ৰ দেশ এই SIR অভিযানৰ অন্তর্ভুক্ত হ’ব।
আয়োগে জনায় যে এই তিনিটা অঞ্চলৰ সময়সূচী পিছত ঘোষণা কৰা হ’ব। ইয়াৰ বাবে জনগণনাৰ দ্বিতীয় পৰ্যায় সম্পূৰ্ণ হোৱাৰ লগতে পাহাৰীয়া আৰু তুষাৰাবৃত অঞ্চলসমূহৰ বতৰজনিত অসুবিধাসমূহো বিবেচনা কৰা হ’ব।
এই বৃহৎ পুনৰীক্ষণ অভিযানৰ অংশ হিচাপে ৩.৯৪ লাখতকৈ অধিক বুথ লেভেল অফিচাৰ (BLO)-এ গণনা পৰ্যায়ত প্ৰায় ৩৬.৭৩ কোটি ভোটাৰৰ ঘৰেঘৰে গৈ তথ্য যাচাই কৰিব। BLO-সকলক বিভিন্ন ৰাজনৈতিক দলৰ মনোনীত প্ৰায় ৩.৪২ লাখ বুথ লেভেল এজেণ্ট (BLA)-এ সহায় আগবঢ়াব।
ECI-এ এই বিশেষ নিবিড় পুনৰীক্ষণ (SIR)-ক “অংশগ্ৰহণমূলক আৰু স্বচ্ছ অভিযান” বুলি অভিহিত কৰিছে, য’ত ভোটাৰ, ৰাজনৈতিক দল আৰু বিভিন্ন স্তৰৰ নিৰ্বাচনী বিষয়াসকল জড়িত থাকিব।
ৰাজনৈতিক অংশগ্ৰহণৰ গুৰুত্বৰ ওপৰত জোৰ দি আয়োগে সকলো স্বীকৃতিপ্ৰাপ্ত ৰাজনৈতিক দলক প্ৰতিটো ভোটকেন্দ্ৰৰ বাবে বুথ লেভেল এজেণ্ট (BLA) নিযুক্তি কৰিবলৈ আহ্বান জনাইছে, যাতে পুনৰীক্ষণ প্ৰক্ৰিয়াত স্বচ্ছতা, অন্তর্ভুক্তিমূলক অংশগ্ৰহণ আৰু কার্যকৰী পৰ্যবেক্ষণ নিশ্চিত হয়।
“মই সকলো ভোটাৰক বিশেষ নিবিড় পুনৰীক্ষণ (SIR)-ৰ তৃতীয় পৰ্যায়ত উৎসাহেৰে অংশগ্ৰহণ কৰি গণনা প্ৰপত্ৰ পূৰণ কৰিবলৈ আহ্বান জনাইছোঁ। SIR-ৰ উদ্দেশ্য হৈছে কেৱল যোগ্য ভোটাৰসকলকহে ভোটাৰ তালিকাত অন্তর্ভুক্ত কৰা আৰু অযোগ্য নাম অন্তর্ভুক্ত নকৰাটো নিশ্চিত কৰা,” ১৬খন ৰাজ্য আৰু ৩খন কেন্দ্ৰীয় শাসিত অঞ্চলত SIR-ৰ তৃতীয় পৰ্যায় আৰম্ভ কৰি এই মন্তব্য কৰে মুখ্য নিৰ্বাচন আয়ুক্ত জ্ঞানেশ কুমাৰে।
আয়োগে লগতে জনায় যে ইতিমধ্যে ১৩খন ৰাজ্য আৰু কেন্দ্ৰীয় শাসিত অঞ্চলত সম্পন্ন হোৱা SIR-ৰ প্ৰথম আৰু দ্বিতীয় পৰ্যায়ত সংশ্লিষ্ট SIR আদেশ জাৰি কৰাৰ সময়লৈকে প্ৰায় ৫৯ কোটি ভোটাৰ অন্তর্ভুক্ত হৈছিল। (IANS)
অধিক পঢ়ক - কংগ্ৰেছ নেতৃত্বাধীন UDF-ৰ বিপুল বিজয়ৰ পিছত ভি.ডি. সতীশন কেৰালৰ নতুন মুখ্যমন্ত্ৰী ঘোষণা
