শ্বিলংঃ মেঘালয়ৰ উমৰৈ মিলিটাৰী ষ্টেচনত বুধবাৰৰ পৰা ‘প্ৰগতি ২০২৬’ নামৰ বহুৰাষ্ট্ৰীয় সামৰিক অনুশীলন আৰম্ভ হৈছে। এই অনুশীলনত ১২খন মিত্ৰদেশৰ সেনা জোৱানে অংশগ্ৰহণ কৰিছে।
দুই সপ্তাহজোৰা এই অনুশীলনত ভূটান, কম্বোডিয়া, ইণ্ডোনেছিয়া, লাওছ, মালয়েছিয়া, মালদ্বীপ, ম্যানমাৰ, নেপাল, ফিলিপাইনছ, ছেইচেলছ, শ্ৰীলংকা আৰু ভিয়েটনামৰ সেনাবাহিনী অংশ লৈছে। ইয়াৰ লক্ষ্য হৈছে আঞ্চলিক সহযোগিতা, সমন্বয় আৰু কৌশলগত সম্পৰ্ক অধিক শক্তিশালী কৰা।
সামৰিক মুখপাত্ৰ লেফটেনেণ্ট কৰ্ণেল মহেন্দ্ৰ ৰাৱটে কয় যে ‘PRAGATI 2026’ৰ সম্পূৰ্ণ নাম হৈছে “Partnership of Regional Armies for Growth and Transformation in the Indian Ocean Region”। এই অনুশীলন সমতা, বন্ধুত্ব আৰু পাৰস্পৰিক সন্মানৰ মনোভাৱৰে অনুষ্ঠিত হৈছে।
অনুশীলনে অংশগ্ৰহণকাৰী দেশসমূহৰ সেনাবাহিনীক পেছাদাৰী অভিজ্ঞতা বিনিময়, একে-অপৰৰ পৰা শিক্ষা গ্ৰহণ আৰু সামৰিক সম্পৰ্ক অধিক ঘনিষ্ঠ কৰাৰ এক মঞ্চ প্ৰদান কৰিছে।
উদ্বোধনী অনুষ্ঠানত জ্যেষ্ঠ সামৰিক বিষয়া আৰু বিশিষ্ট ব্যক্তিসকল উপস্থিত থাকে। অনুষ্ঠানত ভাষণ দি মেজৰ জেনেৰেল সুনীল শ্বেওৰাণয়ে বৰ্তমানৰ সুৰক্ষা জনিত প্ৰত্যাহ্বান মোকাবিলাত যৌথ সহযোগিতাৰ গুৰুত্বৰ ওপৰত জোৰ দিয়ে।
লেফটেনেণ্ট কৰ্ণেল মহেন্দ্ৰ ৰাৱটৰ মতে, এই সামৰিক অনুশীলনৰ মূল লক্ষ্য হৈছে অংশগ্ৰহণকাৰী দেশসমূহৰ মাজত যৌথ অভিযানত সুসমন্বয় গঢ়ি তোলা, সহযোগিতাৰ ক্ষেত্ৰ চিনাক্ত কৰা, অভিজ্ঞতা বিনিময় কৰা আৰু উত্তম পদ্ধতি আদান-প্ৰদানৰ বাবে এক স্থায়ী ব্যৱস্থা গঠন কৰা।
এই অনুশীলনৰ জৰিয়তে যৌথ প্ৰশিক্ষণ আৰু সাংস্কৃতিক বিনিময়ৰ মাধ্যমেৰে দেশসমূহৰ মাজত প্ৰতিৰক্ষা সম্পৰ্ক আৰু বন্ধুত্ব অধিক শক্তিশালী কৰাৰ লক্ষ্য লোৱা হৈছে। লগতে বহুৰাষ্ট্ৰীয় পৰিবেশত ব্যৱস্থাপনা আৰু গোয়েন্দা তথ্য বিনিময়ৰ বাবে সাধাৰণ ধাৰণা গঢ়ি তোলাৰ ওপৰতো জোৰ দিয়া হৈছে।
দুই সপ্তাহজোৰা এই অনুশীলনত আধা-পাহাৰীয়া আৰু জংঘলীয়া এলেকাত সন্ত্ৰাসবাদবিৰোধী অভিযানৰ ওপৰত বিশেষ গুৰুত্ব দিয়া হ’ব।
প্ৰশিক্ষণ কাৰ্যসূচীত যৌথ পৰিকল্পনা, কৌশলগত ড্ৰিল আৰু সমন্বিত অভিযান অন্তৰ্ভুক্ত থাকিব, যাৰ জৰিয়তে সেনা জোৱানসকলৰ অভিযোজন ক্ষমতা, সহনশীলতা আৰু কৌশলগত দক্ষতা বৃদ্ধি পাব।
ইয়াৰ উপৰিও, কঠিন পৰিস্থিতিত কাম কৰাৰ সময়ত শাৰীৰিক সক্ষমতা, শৃংখলা আৰু সমন্বয়ৰ ওপৰত বিশেষ গুৰুত্ব আৰোপ কৰা হ’ব।
অনুশীলনৰ অংশ হিচাপে ভাৰতীয় প্ৰযুক্তি আৰু প্ৰতিৰক্ষা কোম্পানীসমূহে ‘আত্মনিৰ্ভৰ ভাৰত’ উদ্যোগৰ অধীনত দেশীয়ভাৱে নিৰ্মিত সামগ্ৰী আৰু নতুন উদ্ভাৱন প্ৰদৰ্শন কৰিব। ইয়াৰ জৰিয়তে জ্ঞান বিনিময়ৰ সুযোগ সৃষ্টি হোৱাৰ লগতে প্ৰতিৰক্ষা উৎপাদন, উদ্ভাৱন আৰু আত্মনিৰ্ভৰতাৰ ক্ষেত্ৰত ভাৰতৰ সক্ষমতাও উজলাই ধৰা হ’ব বুলি লেফটেনেণ্ট কৰ্ণেল মহেন্দ্ৰ ৰাৱটে জানিবলৈ দিয়ে।
তেওঁৰ মতে, ‘প্ৰগতি ২০২৬’ অনুশীলনে আঞ্চলিক অংশীদাৰ দেশসমূহৰ মাজত সামৰিক সহযোগিতা অধিক শক্তিশালী কৰাৰ লগতে পেছাদাৰী সম্পৰ্ক গভীৰ কৰি তুলিব আৰু সাধাৰণ সুৰক্ষা প্ৰত্যাহ্বান মোকাবিলাত যৌথ দৃষ্টিভংগী গঢ়ি তোলাত সহায় কৰিব।
অধিক পঢ়ক - পশ্চিম এছিয়া সংকটৰ মাজতে অসমৰ মিতব্যয়ী পদক্ষেপ: নতুন বাহন ক্ৰয় নিষিদ্ধ, ভ্ৰমণত নিয়ন্ত্ৰণ
