যোৰহাটঃ এজন আগশাৰীৰ গেলামালৰ ব্যৱসায়ীক অচিনাক্ত দুষ্কৃতিকাৰীয়ে ধাৰাবাহিকভাৱে টেলিফোনিক ভাবুকি দিয়াৰ পিছতে যোৰহাটৰ মৰিয়নী অঞ্চলত চাঞ্চল্যৰ জোৱাৰে আগুৰি ধৰিছে। সূত্ৰ অনুসৰি, চহৰখনৰ অন্যতম প্ৰতিষ্ঠিত ব্যৱসায়িক প্ৰতিষ্ঠান ‘সীতাৰাম সঞ্জয় কুমাৰ’ৰ স্বত্বাধিকাৰী ৰাজীৱ কুমাৰ আগৰৱালে যোৱা কেইদিনমানৰ পৰা বিভিন্ন ফোন নম্বৰৰ পৰা ভাবুকি লাভ কৰি আহিছে।
ভুক্তভোগী ব্যৱসায়ীজনে উল্লেখ কৰে যে প্ৰায় এসপ্তাহ পূৰ্বে যোৰহাটৰ এজন অচিনাকি ব্যক্তিয়ে তেওঁক ফোন কৰি চোৰাং চাউল বিক্ৰী কৰাৰ অভিযোগ উত্থাপন কৰিছিল আৰু তেওঁক এখন মিটিংৰ বাবে হেঁচা প্ৰয়োগ কৰিছিল। এই সন্দৰ্ভত ব্যৱসায়ীজনে মৰিয়নী থানাত এজাহাৰ দাখিল কৰে। অৱশ্যে আৰক্ষীৰ কাষ চাপিলেও বুধবাৰে পুনৰ এজন অচিনাক্ত ব্যক্তিয়ে তেওঁক ফোন কৰে। ব্যৱসায়ীজনে মিটিংৰ আঁৰৰ কাৰণ সোধাত দুষ্কৃতিকাৰীয়ে তেওঁক ভাবুকি দিয়াৰ অভিযোগ।
স্থানীয় ব্যৱসায়ী সমাজ এতিয়া ব্যৱসায়ীজনৰ সুৰক্ষাক লৈ গভীৰভাৱে চিন্তিত। মৰিয়নী আৰক্ষীয়ে ফোন নম্বৰৰ সন্ধান কৰি তদন্ত আৰম্ভ কৰিছে।
অধিক পঢ়ক - দুৰ্ঘটনা ৰোধৰ বাবে মৰিগাঁৱত জিলা পথ সুৰক্ষা সমিতিৰ বৈঠক
