জেনেভাঃ হান্টাভাইৰাছ হৈছে মূলতঃ এন্দুৰ জাতীয় প্ৰাণীৰ দ্বাৰা বহন কৰা এক ভাইৰাছ, যিবোৰে কেতিয়াবা মানুহকো সংক্ৰমিত কৰিব পাৰে আৰু ইয়াৰ ফলত গুৰুতৰ তথা কেতিয়াবা মাৰাত্মক ৰোগৰ সৃষ্টি হয়। যদিও এই সংক্ৰমণ তুলনামূলকভাৱে দুৰ্লভ, তথাপিও উচ্চ মৃত্যুহাৰ আৰু নিৰ্দিষ্ট চিকিৎসাৰ অভাৱৰ বাবে ই এক গুৰুত্বপূৰ্ণ জনস্বাস্থ্যজনিত চিন্তাৰ বিষয়।
সাধাৰণতে মানুহে সংক্ৰমিত এন্দুৰ বা সিহঁতৰ প্ৰস্ৰাৱ, বিষ্ঠা অথবা লেলাউতিৰ সংস্পৰ্শত আহিলে হান্টাভাইৰাছত আক্ৰান্ত হয়। বেয়া বায়ু চলাচল হোৱা ঠাই পৰিষ্কাৰ কৰা, কৃষিকাৰ্য কৰা অথবা এন্দুৰে ভৰি থকা অঞ্চলত থকাসকলৰ ক্ষেত্ৰত সংক্ৰমণৰ আশংকা বৃদ্ধি পায়। কেতিয়াবা এন্দুৰ কামুৰিলেও এই ভাইৰাছ সংক্ৰমিত হ’ব পাৰে। সীমিত পৰিসৰত মানুহৰ পৰা মানুহলৈ সংক্ৰমণৰ ঘটনা কেৱল দক্ষিণ আমেৰিকাৰ এণ্ডিছ ভাইৰাছৰ ক্ষেত্ৰতহে নথিভুক্ত কৰা হৈছে, বিশেষকৈ ঘনিষ্ঠ সংস্পৰ্শত থকা লোকসকলৰ মাজত।
এই ৰোগৰ লক্ষণ আৰু প্ৰভাৱ অঞ্চলভেদে বেলেগ বেলেগ হয়। আমেৰিকা মহাদেশত হান্টাভাইৰাছে হান্টাভাইৰাছ কাৰ্ডিঅ’পালমোনাৰী ছিণ্ড্ৰ’ম (HCPS) সৃষ্টি কৰিব পাৰে। এইটো হৃদযন্ত্ৰক প্ৰভাৱিত কৰা এক গুৰুতৰ শ্বাস-প্ৰশ্বাসজনিত ৰোগ, যাৰ মৃত্যুহাৰ ৫০ শতাংশলৈকে হ’ব পাৰে। আনহাতে ইউৰোপ আৰু এছিয়াত এই সংক্ৰমণে হেম’ৰেজিক জ্বৰ উইথ ৰেনেল ছিণ্ড্ৰ’ম (HFRS) সৃষ্টি কৰে, যিয়ে বৃক্ক আৰু ৰক্তনলীবোৰক ক্ষতিগ্ৰস্ত কৰে। ইয়াৰ মৃত্যুহাৰ ১ শতাংশৰ কমৰ পৰা ১৫ শতাংশলৈকে হ’ব পাৰে।
সাধাৰণতে ভাইৰাছৰ সংস্পৰ্শত অহাৰ একৰ পৰা আঠ সপ্তাহৰ ভিতৰত লক্ষণসমূহ দেখা দিয়ে আৰু আৰম্ভণিতে ই সাধাৰণ ভাইৰেল ৰোগৰ দৰে অনুভৱ হয়। ইয়াৰ ভিতৰত জ্বৰ, মূৰৰ বিষ, পেশীৰ বিষ আৰু পেট-সংক্রান্তীয় সমস্যাসমূহ অন্তৰ্ভুক্ত। ৰোগ বাঢ়ি গ’লে HCPS-এ শ্বাস-প্ৰশ্বাসৰ অসুবিধা আৰু হাওঁফাওঁ পানী জমা হ'ব পাৰে। আনহাতে HFRS-এ নিম্ন ৰক্তচাপ, ৰক্তক্ষৰণ আৰু বৃক্ক বিকল হোৱাৰ দৰে জটিলতা ৰোগৰ সৃষ্টি কৰিব পাৰে।
আৰম্ভণিৰ পৰ্যায়ত হান্টাভাইৰাছ চিনাক্ত কৰাটো কঠিন হ’ব পাৰে, কিয়নো ইয়াৰ লক্ষণসমূহ ইনফ্লুৱেঞ্জা, ক’ভিড-১৯, ডেংগু অথবা লেপ্ট’স্পাইৰ’ছিছৰ দৰে ৰোগৰ সৈতে মিল থাকে। সংক্ৰমণ নিশ্চিত কৰিবলৈ এণ্টিবডি চিনাক্তকৰণ আৰু পিচিআৰ (PCR) পদ্ধতিসহ বিভিন্ন পৰীক্ষাগাৰভিত্তিক পৰীক্ষা ব্যৱহাৰ কৰা হয়।
বৰ্তমানলৈকে হান্টাভাইৰাছৰ বাবে কোনো নিৰ্দিষ্ট এণ্টিভাইৰেল চিকিৎসা বা টিকা উপলব্ধ নহয়। চিকিৎসা মূলতঃ সহায়ক ধৰণৰ হয়, য’ত হাওঁফাওঁ, হৃদযন্ত্ৰ আৰু বৃক্কৰ সৈতে জড়িত জটিলতাসমূহ নিয়ন্ত্ৰণ কৰাৰ ওপৰত গুৰুত্ব দিয়া হয়। আৰম্ভণিতে চিকিৎসালয়ত ভৰ্তি কৰা আৰু নিবিড় চিকিৎসা লাভ কৰিলে বাচি থকাৰ সম্ভাৱনা যথেষ্ট বৃদ্ধি পায়।
প্ৰতিৰোধেই হান্টাভাইৰাছৰ বিৰুদ্ধে আটাইতকৈ কাৰ্যকৰী কৌশল হিচাপে বিবেচিত হয়। মুখ্য সাৱধানতামূলক ব্যৱস্থাসমূহৰ ভিতৰত আছে থকা ঘৰ পৰিষ্কাৰ-পৰিচ্ছন্ন কৰি ৰখা, এন্দুৰ সোমাব নোৱাৰাকৈ প্ৰৱেশ পথসমূহ বন্ধ কৰা, খাদ্য সুৰক্ষিতভাৱে সংৰক্ষণ কৰা আৰু নিৰাপদ পৰিষ্কাৰ-পদ্ধতি অনুসৰণ কৰা—যেনে শুকান ঝাড়ু মাৰিৰে পৰিষ্কাৰ নকৰি প্ৰথমে ভিজাই লোৱা। পৰিষ্কাৰ-পৰিচ্ছন্নতা বজাই ৰখাটোও অত্যন্ত গুৰুত্বপূৰ্ণ।
বিশ্ব স্বাস্থ্য সংস্থাসহ বিভিন্ন স্বাস্থ্য কৰ্তৃপক্ষই ৰোগৰ প্ৰাদুৰ্ভাৱ নিয়ন্ত্ৰণৰ বাবে আগতীয়াকৈ চিনাক্তকৰণ, তদাৰকী আৰু জনসচেতনতা বৃদ্ধিৰ ওপৰত বিশেষ গুৰুত্ব আৰোপ কৰিছে। স্বাস্থ্যসেৱা প্ৰতিষ্ঠানসমূহত সংক্ৰমণ নিয়ন্ত্ৰণ ব্যৱস্থা শক্তিশালী কৰা আৰু মানুহ-এন্দুৰ সংস্পৰ্শ হ্ৰাস কৰাটো এই সম্ভাৱ্য মাৰাত্মক ৰোগৰ বিস্তাৰ ৰোধৰ ক্ষেত্ৰত অত্যন্ত প্ৰয়োজনীয় পদক্ষেপ হিচাপে বিবেচিত হৈছে।
অধিক পঢ়ক - নিৰ্বাচনী জয়ৰ পিছত তৃণমূলৰ হিংসাৰ সংস্কৃতি গ্ৰহণ নকৰিবঃ সুবেন্দু অধিকাৰী
