গুৱাহাটী: গুৱাহাটীৰ আৰক্ষী আয়ুক্তালয়ৰ অপৰাধ শাখাই কংগ্ৰেছ নেতা পৱন খেৰাক আজি ৰিণিকি ভূঞা শৰ্মাই দাখিল কৰা গোচৰ (৪/২০২৬) সন্দৰ্ভত প্ৰায় আঠ ঘণ্টা ধৰি জেৰা কৰে। ইয়াৰ আগদিনা আৰক্ষীয়ে তেওঁক ১২ ঘণ্টা ধৰি জেৰা কৰিছিল। আৰক্ষীয়ে তেওঁক পুনৰ ২৫ মে’, ২০২৬ তাৰিখে হাজিৰ হ’বলৈ সমন জাৰি কৰিছে।
ইফালে অসম প্ৰদেশ কংগ্ৰেছ কমিটিৰ (APCC) সংবাদ আৰু যোগাযোগ বিভাগে কয় যে জ্যেষ্ঠ কংগ্ৰেছ নেতা পৱন খেৰাই অপৰাধ শাখাৰ তদন্তত সম্পূৰ্ণ সহযোগিতা আগবঢ়াই আছে।
প্ৰায় আঠ ঘণ্টাৰ জেৰাৰ পিছত খেৰাই অপৰাধ শাখাৰ কাৰ্যালয়ৰ পৰা ওলাই সংবাদ মাধ্যমৰ সৈতে কথা পাতে। তেওঁ কয় যে এজন দায়িত্বশীল নাগৰিক হিচাপে তেওঁ তদন্তত পূৰ্ণ সহযোগিতা অব্যাহত ৰাখিব। খেৰাই প্ৰকাশ কৰে যে তেওঁক পুনৰ ২৫ মে’ত অপৰাধ শাখাত হাজিৰ হ’বলৈ কোৱা হৈছে আৰু তেওঁ সমন মানি চলিব বুলি নিশ্চিত কৰে।
তথাপি, তদন্তৰ বিষয়ে সংবাদ মাধ্যমৰ নিৰ্দিষ্ট প্রশ্নসমূহৰ উত্তৰ দিবলৈ খেৰাই অস্বীকাৰ কৰে। তেওঁ কয়, “বিষয়টো বৰ্তমান আদালতৰ বিবেচনাধীন (ছাব জুডিচে) হৈ থকাৰ বাবে সংবাদ মাধ্যমৰ আগত মন্তব্য কৰাটো উপযুক্ত নহ’ব। অপৰাধ শাখাৰ তদন্তকাৰী বিষয়াসকলক সকলো উত্তৰ সম্পূৰ্ণভাৱে দিয়া হৈছে।”
অধিক পঢ়ক - অসমৰ ৰাজ্যপাল লক্ষ্মণ প্ৰসাদ আচার্যই চন্দ্ৰমোহন পাটোৱাৰীক অধ্যক্ষ হিচাপে নিযুক্তি দিয়ে
