ৰাজ্যত স্নাতক নামভৰ্তি প্ৰক্ৰিয়া আৰম্ভ; শিক্ষাৰ্থীয়ে ৬টা কাৰ্যসূচীৰ বাবে আবেদন কৰিব পাৰিব

গুৱাহাটী: উচ্চ শিক্ষা সঞ্চালকালয় (DHE), অসমে ২০২৬-২৭ শিক্ষাবৰ্ষৰ বাবে FYUGP (Four-Year Undergraduate Programme), FYIMP (Five-Year Integrated Master Programme) আৰু FYIPGP/FYUPGP কাৰ্যসূচীৰ নামভৰ্তিৰ সময়সূচী আনুষ্ঠানিকভাৱে প্ৰকাশ কৰিছে। এই নামভৰ্তি অসম ৰাজ্যিক উচ্চ শিক্ষা নামভৰ্তি পৰ্টেল SAMARTH-ৰ জৰিয়তে সম্পন্ন কৰা হ’ব। এই শিক্ষাবৰ্ষৰ পাঠদান ১ আগষ্ট, ২০২৬ৰ পৰা আৰম্ভ হ’ব।

DHE-ৰ এক অধিসূচনা অনুসৰি, সকলো চৰকাৰী, প্ৰাদেশিকীকৃত, PDUAM, স্বায়ত্তশাসিত, চৰকাৰী মডেল আৰু ভেঞ্চাৰ কলেজৰ লগতে অংশগ্ৰহণকাৰী ব্যক্তিগত কলেজ আৰু বিশ্ববিদ্যালয়সমূহৰ নামভৰ্তি কেৱল অনলাইন পৰ্টেলৰ জৰিয়তেই সম্পন্ন কৰা হ’ব।

ছাত্ৰ-ছাত্ৰীসকলে চৰকাৰী নামভৰ্তি পৰ্টেল SAMARTH Admission Portal-ৰ জৰিয়তে আবেদন কৰিব পাৰিব। এইবাৰ শিক্ষাৰ্থীসকলে কাৰ্যসূচী (program) বাছনিৰ বাবে যোৱা বছৰৰ দহটা বিকল্পৰ বিপৰীতে ছয়টা বিকল্প লাভ কৰিব। এই বিকল্পসমূহ একে উচ্চ শিক্ষানুষ্ঠান (বিশ্ববিদ্যালয়/কলেজ) অথবা ভিন্ন উচ্চ শিক্ষানুষ্ঠান (বিশ্ববিদ্যালয়/কলেজ)ৰ পৰা বাছনি কৰিব পাৰিব।

অধিসূচনাখনত কোৱা অনুসৰি, Non-CUET শ্ৰেণীৰ নামভৰ্তিৰ বাবে Samarth-ত পঞ্জীয়ন প্ৰক্ৰিয়া ২০২৬ চনৰ ১১ এপ্ৰিলৰ পৰা আৰম্ভ হৈছে। পঞ্জীয়ন, কাৰ্যসূচী বাছনি আৰু নথি পৰীক্ষণ (scrutiny) ১২ মে’ৰ পৰা ২২ মে’লৈ চলিব। শিক্ষাৰ্থীসকলৰ বাবে সংশোধনী (correction) উইণ্ড’ ২৩ মে’ৰ পৰা ২৫ মে’লৈ খোলা থাকিব।

প্ৰথম মেধা তালিকা ২ জুনত প্ৰকাশ কৰা হ’ব আৰু সেই অনুসৰি নামভৰ্তি ৪ জুনৰ পৰা ৬ জুনলৈ অনুষ্ঠিত হ’ব। দ্বিতীয় মেধা তালিকা ৯ জুনত প্ৰকাশ পাব আৰু নামভৰ্তি ১০ জুনৰ পৰা ১২ জুনলৈ চলিব। স্পট এডমিছন ১৫ জুনত অনুষ্ঠিত হ’ব।

CUET শ্ৰেণীৰ নামভৰ্তিৰ ক্ষেত্ৰত পঞ্জীয়ন আৰু কাৰ্যসূচী বাছনি ৫ জুলাইৰ পৰা ১৩ জুলাইলৈ অনুষ্ঠিত হ’ব। শিক্ষাৰ্থীসকলৰ বাবে সংশোধনী (correction) উইণ্ড’ ১৪ জুলাইৰ পৰা ১৫ জুলাইলৈ খোলা থাকিব। প্ৰথম মেধা তালিকা ১৯ জুলাইত প্ৰকাশ কৰা হ’ব আৰু নামভৰ্তি ২১ জুলাইৰ পৰা ২২ জুলাইলৈ অনুষ্ঠিত হ’ব।

দ্বিতীয় মেধা তালিকা ২৩ জুলাইত প্ৰকাশ কৰা হ’ব আৰু সেই অনুসৰি নামভৰ্তি ২৫ জুলাইৰ পৰা ২৬ জুলাইলৈ অনুষ্ঠিত হ’ব। ২৮ জুলাইত স্পট এডমিছনৰ ব্যৱস্থা থাকিব।

CUET আৰু Non-CUET উভয় শ্ৰেণীৰ শিক্ষাৰ্থীৰ বাবে চূড়ান্ত স্পট এডমিছন ২০২৬ চনৰ ২৯ জুলাইৰ পৰা ৩১ জুলাইলৈ অনুষ্ঠিত হ’ব।

যিসকল শিক্ষাৰ্থীয়ে পৰিয়ালৰ বাৰ্ষিক আয় ৪ লাখ টকাৰ তলত হোৱাৰ ভিত্তিত বিনীমূলীয়া আবেদন কৰিব পাৰিব, তেওঁলোকৰ নথিপত্ৰ পৰীক্ষণ (document verification) কৰা হ’ব। শিক্ষানুষ্ঠানসমূহক শিক্ষাৰ্থীৰ মূল নম্বৰপত্ৰ বা প্ৰমাণপত্ৰ নিজৰ ওচৰত ৰাখিবলৈ অনুমতি দিয়া নহ’ব।

ইন্টিগ্ৰেটেড পেমেণ্ট গেটৱেৰ জৰিয়তে মাচুল পৰিশোধ কৰিলে, উচ্চ-পছন্দৰ শিক্ষানুষ্ঠানলৈ স্থানান্তৰ হোৱা শিক্ষাৰ্থীসকলৰ বাবে স্বয়ংক্ৰিয় ফী ৰিফাণ্ডৰ সুবিধাও উপলব্ধ থাকিব।

অধিক পঢ়ক - বিধানসভা নিৰ্বাচনৰ পিছত পাঁচখন ৰাজ্যৰ পৰা Model Code of Conduct উঠাই দিলে নিৰ্বাচন আয়োগে