নতুন দিল্লী: উচ্চতম ন্যায়ালয়ে বৃহস্পতিবাৰে মুখ্য নিৰ্বাচন আয়ুক্ত (CEC) আৰু নিৰ্বাচন আয়ুক্ত (EC)-ৰ নিয়োগ সম্পৰ্কীয় কেন্দ্ৰীয় আইনক লৈ প্রশ্ন উত্থাপন কৰে। আদালতে মন্তব্য কৰে যে বৰ্তমানৰ নিৰ্বাচনী প্ৰক্ৰিয়াই কাৰ্যতঃ কেন্দ্ৰীয় চৰকাৰক সম্পূৰ্ণ নিয়ন্ত্ৰণ দিছে আৰু বিৰোধী দলপতিক কেৱল “স্বাধীনতাৰ দেখুৱনি” হিচাপে সীমাবদ্ধ কৰি ৰাখিছে।
মুখ্য নিৰ্বাচন আয়ুক্ত আৰু অন্যান্য নিৰ্বাচন আয়ুক্ত (নিয়োগ, চাকৰিৰ শর্ত আৰু কাৰ্যকাল) আইন, ২০২৩-ৰ সাংবিধানিক বৈধতা প্ৰত্যাহ্বান জনোৱা কেইবাটাও আবেদনৰ শুনানিৰ সময়ত ন্যায়াধীশ দীপাংকৰ দত্ত আৰু সতীশ চন্দ্ৰ শৰ্মাৰ বেঞ্চে প্রশ্ন তোলে যে ভাৰতীয় নিৰ্বাচন আয়োগ (ECI)-ৰ শীৰ্ষ বিষয়াসকলৰ নিয়োগৰ বাবে গঠন কৰা নিৰ্বাচনী সমিতিত কিয় কোনো স্বাধীন সদস্য অন্তর্ভুক্ত কৰা হোৱা নাই।
২০২৩ চনৰ এই আইন অনুসৰি, নিৰ্বাচনী সমিতিখনত প্ৰধানমন্ত্ৰী, লোকসভাৰ বিৰোধী দলপতি আৰু প্ৰধানমন্ত্ৰীৰ দ্বাৰা মনোনীত এজন কেন্দ্ৰীয় মন্ত্ৰী থাকে।
শুনানিৰ সময়ত ন্যায়াধীশ দত্তৰ নেতৃত্বাধীন বেঞ্চে বাৰে বাৰে উল্লেখ কৰে যে ভাৰতীয় নিৰ্বাচন আয়োগৰ স্বাধীনতা মুক্ত আৰু ন্যায়সঙ্গত নিৰ্বাচন ৰক্ষাৰ বাবে অত্যন্ত গুৰুত্বপূর্ণ, আৰু এই নীতি সংবিধানৰ মৌলিক গাঁথনিৰ অংশ।
“আমি ভাবি আছিলোঁ—CBI সঞ্চালকৰ ক্ষেত্ৰত মুখ্য ন্যায়াধীশ (CJI) থাকে। ইয়াক আইন-শৃংখলা বজাই ৰখাৰ বাবে বুলি ক’ব পাৰি, বা নিয়মৰ শাসন ৰক্ষাৰ ক্ষেত্ৰতো ইয়াক প্ৰয়োগ কৰিব পাৰি। কিন্তু গণতন্ত্ৰ ৰক্ষাৰ ক্ষেত্ৰত নহয় নেকি? শুদ্ধ আৰু মুক্ত নিৰ্বাচন নিশ্চিত কৰাৰ বাবে নহয় নেকি?” উচ্চতম ন্যায়ালয়ে এইদৰে মন্তব্য কৰে।
সৰ্বোচ্চ ন্যায়ালয়ে স্পষ্ট কৰে যে তেওঁলোকে মুখ্য ন্যায়াধীশক (CJI) নিৰ্বাচনী সমিতিৰ অংশ হ’ব লাগিব বুলি কোৱা নাই, কিন্তু নিয়োগ প্ৰক্ৰিয়াত কোনো স্বাধীন সদস্য নথকাক লৈ প্রশ্ন তোলে।
“আমি কোৱা নাই যে CJI থাকিবই লাগিব। কিন্তু এজন স্বাধীন সদস্য কিয় নাথাকিব?” আদালতে প্রশ্ন কৰে।
ইয়াৰ পিছত আদালতে তিনিসদস্যীয় নিৰ্বাচনী সমিতিৰ বাস্তৱিক কাৰ্যপদ্ধতি নিয়েও প্রশ্ন তোলে। বেঞ্চে মন্তব্য কৰে যে যদি প্ৰধানমন্ত্ৰী আৰু বিৰোধী দলপতিৰ মাজত মতভেদ হয়, তেন্তে কেন্দ্ৰীয় মন্ত্ৰীজন সদায় চৰকাৰৰ পক্ষতেই থাকিব।
“তেন্তে বিৰোধী দলপতিক অন্তর্ভুক্ত কৰাৰ অৰ্থ কি? তেওঁ কেৱল অলংকাৰিক। ফল সদায় ২:১ হ’ব। এই সংস্থাত স্বাধীনতাৰ এই দেখুৱনি কিয়? কোনো মন্ত্ৰী প্ৰধানমন্ত্ৰীৰ বিপক্ষে যাব নেকি?” বেঞ্চে প্রশ্ন কৰে।
“প্ৰথম দৃষ্টিত যিটোৱে আমাক চিন্তিত কৰিছে, সেয়া হ’ল—কাৰ্যনির্বাহী বিভাগৰ ভেটো ক্ষমতা কিয় থাকিব?” আদালতে মন্তব্য কৰি কয় যে যদি ফলাফল আগতেই নিৰ্ধাৰিত হয়, তেন্তে বিৰোধী দলপতিক সমিতিত অন্তর্ভুক্ত কৰাৰ কোনো অৰ্থ নাথাকে। (IANS)
অধিক পঢ়ক - মুখ্যমন্ত্ৰী হিমন্ত বিশ্ব শৰ্মাই শক্তিশালী আন্তঃগাঁথনিৰ ওপৰত গুৰুত্ব আৰোপ কৰে