গুৱাহাটী: অসম আৰু মেঘালয়ৰ মুখ্যমন্ত্ৰীয়ে সীমা নিৰ্ধাৰণসহ বিভিন্ন বিষয়ত আলোচনা কৰে। দুয়োখন ৰাজ্যৰ মুখ্যমন্ত্ৰীয়ে সকলো দ্বিপাক্ষিক সমস্যাৰ স্থায়ী সমাধানৰ বাবে যৌথ প্ৰচেষ্টাৰ ওপৰত গুৰুত্ব আৰোপ কৰে।
মেঘালয়ৰ মুখ্যমন্ত্ৰী কনৰাড কে. ছাংমাই আজি দিছপুৰলৈ আহি অসমৰ মুখ্যমন্ত্ৰী ড° হিমন্ত বিশ্ব শৰ্মাৰ সৈতে সাক্ষাৎ কৰে। আলোচনাত লাপাংগাপ সীমা অঞ্চলত বৃদ্ধি পোৱা উত্তেজনাৰ বিষয়েও আলোচনা হয় আৰু আইন-শৃংখলা বজাই ৰাখি পৰিস্থিতি নিয়ন্ত্ৰণৰ উপায় বিচৰা হয়।
মুখ্যমন্ত্ৰী ড০ শৰ্মাই কয় যে, "আমি এক উৎকৃষ্ট আলোচনা কৰিছিলো আৰু দীৰ্ঘদিনীয়া উত্তৰাধিকাৰী বিষয়ত কিছু ভাল অগ্ৰগতি লাভ কৰিছো। সীমা নিৰ্ধাৰণৰ ক্ষেত্ৰত আমি চলি থকা প্ৰক্ৰিয়াটো ক্ষিপ্ৰ কৰি এই বিষয়ৰ স্থায়ী সমাধান আনিবলৈ সন্মত হৈছিলো।"
তেওঁ আৰু কয়, “অসম আৰু মেঘালয়ে বিভিন্ন ক্ষেত্ৰত একেলগে কাম কৰি আছে আৰু ‘অষ্টলক্ষ্মী অঞ্চল’ৰ উন্নয়নৰ বাবে নতুন সুযোগ বিচাৰি আছে।”
মেঘালয়ৰ মুখ্যমন্ত্ৰী কনৰাড কে. ছাংমাই আজিৰ আলোচনা সন্দৰ্ভত কয়, “মই হিমন্তজীক লগ পাই সুখী হৈছোঁ। তেওঁ আমাৰ চিন্তাসমূহ একেলগে সমাধান কৰাৰ আশ্বাস দিছে আৰু ভৱিষ্যতে উত্তেজনা কমোৱাৰ বাবে একেলগে কাম কৰাৰ কথা কৈছে, বিশেষকৈ সীমান্ত অঞ্চলৰ জনসাধাৰণৰ স্বাৰ্থত।”
তেওঁ কয় যে পশ্চিম জয়ন্তীয়া হিলছৰ লাপাংগাপ অঞ্চল, যি অসমৰ কাৰ্বি আংলং জিলাৰ সীমান্তত অৱস্থিত, তাৰ বাসিন্দাসকলৰ সমস্যা আৰু ওচৰ-চুবুৰীয়া গাঁওসমূহৰ মাজত হোৱা উত্তেজনা সন্দৰ্ভত আলোচনা কৰা হয়। দুয়োখন ৰাজ্যৰ মাজত শান্তি বজাই ৰাখিবলৈ আৰু আইন-শৃংখলা উন্নত কৰিবলৈ ব্যৱস্থা গ্ৰহণৰ ওপৰত গঠনমূলক আলোচনা হয়।
মুখ্যমন্ত্ৰী ছাংমাই সীমান্ত অঞ্চলৰ লোকসকলক শান্তি আৰু সম্প্ৰীতি বজাই ৰাখিবলৈ আহ্বান জনাইছে। তেওঁ কয় যে দুয়োখন ৰাজ্য চৰকাৰে যি প্ৰচেষ্টা চলাই আছে, তাৰ সৈতে সহযোগিতা কৰিলে পৰিস্থিতি সাম কাটিব আৰু অঞ্চলটোত দীঘলীয়া স্থিতিশীলতা নিশ্চিত কৰিব পৰা যাব।
অধিক পঢ়ক - অসম্পূৰ্ণ হৈ থকা প্ৰকল্পত কোটি কোটি টকা আবদ্ধ; ধনৰ অপচয়