কোকৰাঝাৰ: এক ঐতিহাসিক জনাদেশত বড়োলেণ্ড পিপলছ ফ্ৰণ্টে বিটিচি (BTC) অঞ্চলৰ বিধানসভা নিৰ্বাচনত বৃহৎ জয় লাভ কৰিছে। হাগ্ৰামা মহিলাৰীৰ নেতৃত্বাধীন এই দলে ১০খন আসন দখল কৰাৰ বিপৰীতে বাকী ৪খন আসন বিজেপিৰ দখললৈ যায়। ফলত এনডিএ মিত্ৰজোঁটে বিটিচিৰ মুঠ ১৪খন আসনেই দখল কৰি ইউপিপিএলক সম্পূৰ্ণৰূপে প্ৰভাৱহীন কৰি তোলে।
ইউপিপিএলৰ বহু শীৰ্ষ নেতা এই নিৰ্বাচনত পৰাজয়ৰ মুখামুখি হ’বলগীয়া হয়। এইসকলৰ ভিতৰত আছে ইউপিপিএল সভাপতি প্ৰমোদ বড়ো, সাধাৰণ সম্পাদক ৰাজু কুমাৰ নাৰ্জাৰী, এবছুৰ প্ৰাক্তন সভাপতি দীপেন বড়ো, মহিলা শাখাৰ সভাপতি প্ৰতিভা ব্ৰহ্মা আৰু বৰ্তমানৰ বিধায়ক লৰেন্স ইছলাৰী। তেওঁলোকক বিভিন্ন সমষ্টিত বড়োলেণ্ড পিপলছ ফ্ৰণ্ট (BPF) আৰু বিজেপি প্ৰাৰ্থীয়ে পৰাস্ত কৰে।
কোকৰাঝাৰ (ST) সমষ্টিত BPF প্ৰাৰ্থী আৰু বিটিচি প্ৰধান হাগ্ৰামা মহিলাৰীৰ পত্নী সেউলি মহিলাৰীয়ে ইউপিপিএলৰ লৰেন্স ইছলাৰীক ৩৯,৬৩৩টা ভোটৰ বৃহৎ ব্যৱধানত পৰাস্ত কৰে। সেউলি মহিলাৰীয়ে ৭৪,৮১৬টা ভোট লাভ কৰাৰ বিপৰীতে ইছলাৰীয়ে ৩৫,১৮৩টা ভোট লাভ কৰে।
দতমা (ST) সমষ্টিতো BPF-ৰ জ্যেষ্ঠ নেতা আৰু বিধায়ক ৰবিৰাম নাৰ্জাৰীয়ে ইউপিপিএলৰ সাধাৰণ সম্পাদক ৰাজু কুমাৰ নাৰ্জাৰীক ২৪,২৮৩টা ভোটৰ ব্যৱধানত পৰাস্ত কৰে। তেওঁ ৪৮,৭৭৫টা ভোট লাভ কৰাৰ বিপৰীতে প্ৰতিদ্বন্দ্বীয়ে ২৪,৭৯২টা ভোট লাভ কৰে।
ইফালে গোসাইগাঁও সমষ্টিত BPF প্ৰাৰ্থী শভাৰাম বসুমতাৰীয়ে ঝাৰখণ্ড মুক্তি মৰ্চা (Jharkhand Mukti Morcha)-ৰ প্ৰাৰ্থী ফেড্ৰিকচন হান্সদাক ২৩,০৮৩টা ভোটৰ ব্যৱধানত পৰাস্ত কৰি জয়লাভ কৰে।
একেদৰে, কংগ্ৰেছ প্ৰাৰ্থী মহম্মদ আশ্ৰাফুল ইছলাম শ্বেইখে পৰ্বতঝোৰা সমষ্টিৰ পৰা বিজয় লাভ কৰি BPF-ৰ ড° ৰেজুয়াল কৰিমক ৮,৬২৬টা ভোটৰ ব্যৱধানত পৰাস্ত কৰে। শ্বেইখে মুঠ ৭৬,২০৮টা ভোট লাভ কৰাৰ বিপৰীতে ৰেজুয়ালে ৬৭,৬৭২টা ভোট লাভ কৰে।
আনহাতে, বাওখুংগ্ৰী সমষ্টিত BPF প্ৰাৰ্থী ৰূপম কুমাৰ ৰয়ে জয়ী হৈ কংগ্ৰেছ প্ৰাৰ্থী শেফালী মাৰাকক ২১,৫৯৭টা ভোটৰ ব্যৱধানত পৰাস্ত কৰে। ৰয়ে ৫৯,৮১২টা ভোট লাভ কৰাৰ বিপৰীতে মাৰাকে ৩৮,২১৫টা ভোট লাভ কৰে।
ইফালে জিলাখনৰ বিভিন্ন স্থানত Bodoland People's Front-ৰ উৎসাহী দলীয় কৰ্মীসকলে নিজৰ দলীয় কাৰ্যালয়সমূহত বিজয় উদযাপন কৰা দেখা যায়।
অধিক পঢ়ক - ওদালগুৰি জিলাত NDAৰ চাৰিওখন বিধানসভা আসনত সম্পূৰ্ণ জয়লাভ