গুৱাহাটী: জুবিন গাৰ্গ মৃত্যুকাণ্ডৰ অন্যতম অভিযুক্ত শ্যামকানু মহন্তই আজি জামিন বিচাৰি গুৱাহাটী উচ্চ ন্যায়ালয়ৰ দ্বাৰস্থ হয়। ২০২৬ চনৰ ৩০ এপ্ৰিলত বিশেষ ফাষ্ট-ট্ৰেক আদালতে মহন্তৰ জামিন আবেদন খাৰিজ কৰিছিল। সেই আদেশক প্ৰত্যাহ্বান জনাই তেওঁ উচ্চ ন্যায়ালয়ত আবেদন দাখিল কৰে।
৩০ এপ্ৰিলত ফাষ্ট-ট্ৰেক আদালতে জুবিন গাৰ্গৰ অস্বাভাৱিক মৃত্যুৰ গোচৰত শ্যামকানু মহন্তৰ জামিন আবেদন খাৰিজ কৰি কয় যে জামিন লাভ কৰিলে তেওঁ পলায়ন কৰাৰ সম্ভাৱনা আছে। শর্মিলা ভূঞাৰ আদালতে দিয়া আদেশত উল্লেখ কৰা হয় যে মহন্তই সাক্ষীসকলক প্ৰভাৱিত কৰি গোচৰৰ তদন্ত আৰু অগ্ৰগতিত বাধা সৃষ্টি কৰাৰ সম্ভাৱনাও আছে।
আদালতে লগতে কয় যে ২০২৫ চনৰ ১৯ ছেপ্টেম্বৰত জুবিন গাৰ্গৰ মৃত্যুৰ পিছত শ্যামকানু মহন্তই অসম আৰক্ষীৰ সৈতে যোগাযোগ কৰা নাছিল বা তদন্তত উপস্থিত হোৱা নাছিল। তাৰ বিপৰীতে তেওঁ পত্নীৰ সৈতে ছিংগাপুৰৰ পৰা মালয়েছিয়ালৈ গুচি গৈছিল আৰু লুকআউট নোটিচ জাৰি আৰু ইণ্টাৰপ’লক সতৰ্ক কৰাৰ পিছতহে ভাৰতলৈ উভতি আহিছিল।
আদালতে পৰ্যবেক্ষণ কৰে যে নথিপত্ৰত স্পষ্টভাৱে উল্লেখ আছে—জুবিন গাৰ্গৰ স্বাস্থ্যজনিত অৱস্থা আৰু চিকিৎসকৰ পৰামৰ্শৰ বিষয়ে জ্ঞাত হৈও শ্যামকানু মহন্তই প্ৰত্যক্ষ আৰু পৰোক্ষভাৱে তেওঁক মদ্যপান কৰাইছিল। লগতে, জুবিন গাৰ্গ NEIF-ৰ ব্ৰেণ্ড এম্বেচেডৰ হিচাপে তেওঁৰ আমন্ত্ৰণত ছিংগাপুৰলৈ যোৱাৰ সময়তো মহন্তই তেওঁৰ সুৰক্ষাৰ বাবে চিকিৎসাকৰ্মী বা নিৰাপত্তা ব্যৱস্থা নিশ্চিত কৰা নাছিল বুলি আদালতে মন্তব্য কৰে।
অধিক পঢ়ক - পেট্ৰ’ল আৰু ডিজেলৰ ওপৰত নিৰ্ভৰশীলতা কমাবলৈ আহ্বান,নৰেন্দ্ৰ মোদীৰ