পশ্চিম এছিয়া সংকটৰ মাজতে অসমৰ মিতব্যয়ী পদক্ষেপ: নতুন বাহন ক্ৰয় নিষিদ্ধ, ভ্ৰমণত নিয়ন্ত্ৰণ

গুৱাহাটীঃ পশ্চিম এছিয়াৰ চলি থকা সংকট আৰু প্ৰশাসনিক সজাগতা বৃদ্ধিৰ প্ৰয়োজনীয়তাৰ প্ৰতি লক্ষ্য ৰাখি অসম চৰকাৰে নতুন মিতব্যয়ী ব্যৱস্থা ঘোষণা কৰিছে।

বিত্ত বিভাগে জাৰি কৰা এক নিৰ্দেশনাত সকলো বিভাগ আৰু জিলা প্ৰশাসনক পৰৱৰ্তী নিৰ্দেশ নোপোৱালৈ এই ব্যৱস্থাসমূহ কঠোৰভাৱে পালন কৰিবলৈ কোৱা হৈছে।

নতুন নিৰ্দেশনা অনুসৰি, চৰকাৰে আগন্তুক ছয় মাহলৈ নতুন বাহন ক্ৰয়ত নিষেধাজ্ঞা জাৰি কৰিছে। ৰাজ্যৰ ভিতৰত চৰকাৰী বাহনৰ ব্যৱহাৰো সীমিত কৰিবলৈ কোৱা হৈছে।

ইয়াৰ উপৰিও, মন্ত্ৰী আৰু চৰকাৰী বিষয়াসকলৰ বিদেশ ভ্ৰমণ ছয় মাহৰ বাবে স্থগিত ৰখা হৈছে। অৱশ্যে ৰাষ্ট্ৰীয় বা কৌশলগত স্বাৰ্থ, শিক্ষা, চিকিৎসাজনিত জৰুৰী অৱস্থা অথবা বিদেশত থকা নিকট আত্মীয়ক সাক্ষাৎ কৰাৰ ক্ষেত্ৰত মুখ্যমন্ত্ৰীৰ পূৰ্ব অনুমতি সাপেক্ষে অনুমতি দিয়া হ’ব।

নিৰ্দেশনাত মুখ্যমন্ত্ৰী, মন্ত্ৰী আৰু জ্যেষ্ঠ বিষয়াসকলৰ কনভয়ৰ আকাৰো হ্ৰাস কৰাৰ কথা কোৱা হৈছে, যদিও সুৰক্ষা ব্যৱস্থাত কোনো আপোচ কৰা নহ’ব। লগতে, অতি জৰুৰী নহ’লে ৰাজ্যৰ ভিতৰত আৰু বাহিৰত চৰকাৰী ভ্ৰমণ সীমিত কৰা হৈছে।

গুৰুত্বপূৰ্ণ সিদ্ধান্ত হিচাপে চৰকাৰে জৰুৰী আইন-শৃংখলা পৰিস্থিতিত CAPF আৰু অসম আৰক্ষীৰ জিলা আন্তঃগতি সীমিত কৰিছে। এতিয়াৰ পৰা এনে ক্ষেত্ৰত পূৰ্ব অনুমতি বাধ্যতামূলক হ’ব। এই বিষয়ে গৃহ আৰু ৰাজনৈতিক বিভাগে শীঘ্ৰে বিস্তৃত নিৰ্দেশনা জাৰি কৰিব।

চৰকাৰে পুৰণি আৰু অচল চৰকাৰী বাহনসমূহ তৎক্ষণাৎ বাতিল কৰাৰো নিৰ্দেশ দিছে। লগতে, বাহন ভাড়াত লোৱাৰ ক্ষেত্ৰত বৈদ্যুতিক বাহনক অগ্ৰাধিকাৰ দিবলৈ বিভাগসমূহক কোৱা হৈছে।

চলিত বিত্তীয় বৰ্ষত পেট্ৰ’ল, তেল আৰু লুব্ৰিকেণ্ট (POL) খৰচ ২০ শতাংশ কমোৱাৰ নিৰ্দেশ দিয়া হৈছে।

অপ্ৰয়োজনীয় খৰচ ৰোধ কৰিবলৈ চৰকাৰী বিভাগসমূহক বৃহৎ সভা, ৱৰ্কিং লাঞ্চ, চৰকাৰী ডিনাৰ, সাংস্কৃতিক অনুষ্ঠান আৰু বিনোদনমূলক খৰচ পৰিহাৰ কৰিবলৈ কোৱা হৈছে। ভ্ৰমণ জড়িত অতি প্ৰয়োজনীয় নহোৱা প্ৰশিক্ষণ আৰু এক্সপ’জাৰ ভিজিটো সীমিত কৰা হৈছে।

চৰকাৰী অনুষ্ঠানৰ বাবে অস্থায়ী পেণ্ডেল নিৰ্মাণ নকৰি বিদ্যমান চৰকাৰী ভৱন, সভাকক্ষ আৰু অডিটৰিয়াম ব্যৱহাৰ কৰিবলৈ নিৰ্দেশ দিয়া হৈছে। লগতে, ২০২৫-২৬ বিত্তীয় বৰ্ষৰ তুলনাত চলিত বৰ্ষত ৰাজস্ব আৰু প্ৰতিষ্ঠানিক খৰচ ১০ শতাংশ হ্ৰাস কৰাৰ সিদ্ধান্ত লোৱা হৈছে। অৱশ্যে বেতন, পেঞ্চন, ঋণ পৰিশোধ আৰু বাধ্যতামূলক খৰচ এই হ্ৰাসৰ অন্তৰ্ভুক্ত নহ’ব।

ৰাজহ বৃদ্ধি কৰিবলৈ চৰকাৰী বিভাগসমূহক ব্যৱহাৰ মাচুল, লাইচেঞ্চ ফী, লীজ ভাড়া আৰু সেৱা মাচুল পুনৰ নিৰ্ধাৰণ আৰু যুক্তিসংগতভাৱে বৃদ্ধি কৰাৰ নির্দেশ দিয়া হৈছে। বিভিন্ন আঁচনিৰ অধীনত নিৰ্মিত চৰকাৰী ভৱন আৰু কমিউনিটি হলসমূহো বাণিজ্যিকভাৱে ব্যৱহাৰ কৰি অতিৰিক্ত আয় সংগ্ৰহ কৰাৰ কথা কোৱা হৈছে। এই সকলো আয় e-GRAS ব্যৱস্থাৰ জৰিয়তে সংগ্ৰহ কৰিব লাগিব।

চৰকাৰে কাৰ্যালয়সমূহত বিদ্যুতৰ অপচয় ৰোধ কৰিবলৈ এনৰ্জি অডিট কৰাৰ নির্দেশ দিছে। পৌৰসভাসমূহকো মিতব্যয়ীভাৱে বিদ্যুৎ ব্যৱহাৰ কৰিবলৈ কোৱা হৈছে, বিশেষকৈ অপ্রয়োজনীয় ষ্ট্ৰীট লাইট ব্যৱহাৰ এৰাবলৈ।

ইয়াৰ উপৰিও, চৰকাৰে ৰাজহুৱা পৰিবহণ, কাৰপুলিং আৰু বৈদ্যুতিক বাহন (EV) ব্যৱহাৰক উৎসাহিত কৰিছে। পৰিবহণ বিভাগক EV ক্ৰয়ৰ বাবে বিশেষ সুবিধা ঘোষণা আৰু ৰাজ্যজুৰি EV চাৰ্জিং ব্যৱস্থা বৃদ্ধি কৰাৰ নির্দেশ দিয়া হৈছে।

গৃহ আৰু নগৰ পৰিক্ৰমা বিভাগক অহা ১২ মাহৰ ভিতৰত পৌৰসভাৰ ৰাজহুৱা পৰিবহণক জীৱাশ্ম ইন্ধনৰ বিকল্প ব্যৱস্থালৈ ৰূপান্তৰ কৰাৰ লক্ষ্য দিয়া হৈছে। আনহাতে, Guwahati Municipal Corporationক সম্পূৰ্ণ সেউজীয়া ৰাজহুৱা পৰিবহণ ব্যৱস্থাৰ দিশে আগবাঢ়িবলৈ দায়িত্ব দিয়া হৈছে।

অধিক পঢ়ক - ১৬সংখ্যক অসম বিধানসভাৰ প্ৰথম অধিৱেশন আৰম্ভ: শপত গ্ৰহণ, অধ্যক্ষ নিৰ্বাচন আৰু ৰাজ্যপালৰ ভাষণ