গুৱাহাটীঃ ২০২৪-২৫ বিত্তীয় বৰ্ষৰ শেষত অসমৰ মুঠ সুত বৃদ্ধি পাই ১,৭২,৭৭৫.০৭ কোটি টকালৈ উপনীত হৈছে। ২০২৩-২৪ বৰ্ষত ৰাজ্যখনৰ সুত আছিল ১,৪৬,৯২৭.৮৪ কোটি টকা, অৰ্থাৎ এক বছৰত দায় বৃদ্ধি পাইছে ২৫,৮৪৭.২৩ কোটি টকা।
ৰাজ্যিক বিত্ত সম্পৰ্কীয় ২০২৪-২৫ বৰ্ষৰ ভাৰতৰ নিয়ন্ত্ৰক আৰু মহানিৰীক্ষক (Comptroller and Auditor General of India) (CAG)-ৰ প্ৰতিবেদনত এই তথ্য প্ৰকাশ পাইছে। সংসদীয় পৰিক্ৰমা মন্ত্ৰী অতুল বৰাই আজি অসম বিধানসভাৰ অধিৱেশনৰ তৃতীয় দিনা CAG-ৰ প্ৰতিবেদনখন সদনত উত্থাপন কৰে। CAG-এ কয় যে বাকী ঋণৰ সুত পৰিশোধৰ বাবে ধাৰ কৰা ধন ব্যৱহাৰ কৰাটো সুস্থ আৰ্থিক প্ৰৱণতা নহয়।
CAG-এ উল্লেখ কৰে, “ৰাজ্য চৰকাৰৰ মুঠ সুতৰ ভিতৰত সাধাৰণতে ৰাজ্যৰ আভ্যন্তৰীণ ঋণ (বজাৰ ঋণ, RBI-ৰ Ways and Means Advances, National Small Savings Fund-লৈ জাৰি কৰা বিশেষ ছিকিউৰিটি, বিভিন্ন বিত্তীয় প্ৰতিষ্ঠানৰ ঋণ আদি), কেন্দ্ৰীয় চৰকাৰৰ ঋণ আৰু আগবঢ়োৱা ধন, লগতে ৰাজহুৱা হিচাপৰ দায়সমূহ অন্তৰ্ভুক্ত থাকে।”
প্ৰতিবেদন অনুসৰি, ২০২৪-২৫ বৰ্ষত মুঠ বকেয়া দায়ত হোৱা ২৫,৮৪৭.২৩ কোটি টকাৰ বৃদ্ধি মূলতঃ ৰাজহুৱা ঋণ বৃদ্ধিৰ ফল। এই ৰাজহুৱা ঋণ ২০২৩-২৪ বৰ্ষৰ ১,২৪,৩৭৬.০৯ কোটি টকাৰ পৰা ২০২৪-২৫ বৰ্ষত ১৮.৮৮ শতাংশ বৃদ্ধি পাই ১,৪৭,৮৫৫.৮৫ কোটি টকালৈ উন্নীত হৈছে। ইয়াৰ মূল কাৰণ হৈছে আভ্যন্তৰীণ ঋণ আৰু ভাৰত চৰকাৰৰ পৰা লোৱা ঋণ বৃদ্ধি।
ইয়াৰ উপৰিও, অফ-বাজেট ঋণো বৃদ্ধি পাইছে। ২০২৩-২৪ বৰ্ষত এই ঋণ আছিল ২,১৯৩.১৩ কোটি টকা, যি ২০২৪-২৫ বৰ্ষত বৃদ্ধি পাই ২,৬৩৯.২০ কোটি টকা হৈছে। ইয়াৰ ফলত চৰকাৰে বিকল্প ঋণ ব্যৱস্থাৰ ওপৰত নিৰ্ভৰশীলতা অব্যাহত ৰাখিছে বুলি CAG-এ উল্লেখ কৰিছে।
আনহাতে, ৰাজ্যৰ দায়-জিএছডিপি (Liability-to-GSDP) অনুপাত ২০২৩-২৪ বৰ্ষৰ ২৫.৮১ শতাংশৰ পৰা ২০২৪-২৫ বৰ্ষত ২৬.৮৪ শতাংশলৈ বৃদ্ধি পাইছে। যদিও এই বৃদ্ধি মধ্যম মানৰ বিত্তীয় চাপৰ ইঙ্গিত দিয়ে, তথাপি ই অসম FRBM আইনত নিৰ্ধাৰিত সীমাৰ ভিতৰতেই আছে বুলি প্ৰতিবেদনত কোৱা হৈছে।
প্ৰতিবেদনত কোৱা হৈছে, “২০২৪-২৫ বৰ্ষৰ শেষত ৰাজ্যৰ মুঠ দায়ৰ ভিতৰত সৰ্বাধিক অংশ আছিল আভ্যন্তৰীণ ঋণৰ, যাৰ পৰিমাণ ৭৪ শতাংশ বা ১,২৭,৭১৮.০২ কোটি টকা। ইয়াৰ পিছত আছিল ৰাজহুৱা হিচাপৰ দায় ১৩ শতাংশ আৰু ভাৰত চৰকাৰৰ পৰা লোৱা ঋণ ১১ শতাংশ। অফ-বাজেট ঋণৰ অংশ আছিল অৱশিষ্ট ২ শতাংশ।”
প্ৰতিবেদন অনুসৰি, ২০২০-২১ বৰ্ষত ৰাজ্য চৰকাৰৰ আভ্যন্তৰীণ ঋণ আছিল ৬৭,০১৪.০৭ কোটি টকা, যি ২০২৪-২৫ বৰ্ষত ৯০.৫৮ শতাংশ বৃদ্ধি পাই ১,২৭,৭১৮.০২ কোটি টকালৈ উপনীত হৈছে। এই সময়ছোৱাত কেৱল আভ্যন্তৰীণ ঋণৰ সুদ পৰিশোধৰ বাবদ ৮,৪০৬.০৮ কোটি টকা ব্যয় কৰা হৈছে।
ধাৰ কৰা ধনৰ ব্যৱহাৰ সন্দৰ্ভত Comptroller and Auditor General of India (CAG)-এ কয়, “আদৰ্শগতভাৱে ধাৰ কৰা ধন মূলধনী সম্পদ সৃষ্টি আৰু উন্নয়নমূলক কামত ব্যৱহাৰ কৰা উচিত। কিন্তু বৰ্তমান ব্যয় পূৰণ আৰু বকেয়া ঋণৰ সুদ পৰিশোধৰ বাবে ধাৰ কৰা ধন ব্যৱহাৰ কৰাটো সুস্থ আৰ্থিক ধাৰা নহয়।”
CAG প্ৰতিবেদন অনুসৰি, ২০২৪-২৫ বৰ্ষত ৰাজ্য চৰকাৰৰ মুঠ ঋণগ্ৰহণৰ পৰিমাণ আছিল ৩০,৬৭৩.০১ কোটি টকা, যি ২০২৩-২৪ বৰ্ষৰ ২৭,৭৭১.৬০ কোটি টকাৰ তুলনাত ১০.৪৫ শতাংশ অধিক। ইয়াৰ ভিতৰত ৭,১৯৩.২৫ কোটি টকা (২৩.৪৫ শতাংশ) পূৰ্বৰ ঋণ পৰিশোধত ব্যৱহাৰ কৰা হৈছে। আনহাতে, ২৬,৪০৪.২০ কোটি টকা (৮৬.০৮ শতাংশ) মূলধনী ব্যয়ত বিনিয়োগ কৰা হৈছে।
ইয়াৰ বিপৰীতে, নেট ঋণ আৰু আগবঢ়োৱা ধনত ৮৭৪.৭৩ কোটি টকাৰ ঋণাত্মক বহিঃপ্ৰবাহ দেখা গৈছে, অৰ্থাৎ বিতৰণতকৈ পুনৰুদ্ধাৰৰ পৰিমাণ অধিক আছিল। প্ৰতিবেদনত স্পষ্ট কৰা হৈছে যে পূৰ্বৰ ঋণ পৰিশোধ আৰু মূলধনী ব্যয়ৰ মুঠ শতাংশ ১০০ শতাংশৰো অধিক, যাৰ অৰ্থ এই ক্ষেত্ৰসমূহত কেৱল ধাৰ কৰা ধনৰ ওপৰত নিৰ্ভৰ কৰা হোৱা নাছিল। ইয়াৰ দ্বাৰা প্ৰমাণিত হয় যে ৰাজ্য চৰকাৰে সম্পদ সৃষ্টি আৰু দায় হ্ৰাসৰ বাবে একমাত্ৰ ঋণৰ ওপৰত নিৰ্ভৰশীল হৈ নাথাকিল।
অধিক পঢ়ক - উত্তৰ-পূৰ্বাঞ্চলৰ চাৰিগৰাকী বিশিষ্ট ব্যক্তিক পদ্মশ্ৰী সন্মান প্ৰদান