ৰাজ্যত পাৰদৰ্শিতাহীন বিদ্যালয় বন্ধৰ বিৰোধিতা আছুৰ
সদ্যঘোষিত হাইস্কুল শিক্ষান্ত পৰীক্ষাত এজনো ছাত্ৰ উত্তীৰ্ণ নোহোৱা ৰাজ্যৰ বিদ্যালয়সমূহ বন্ধ কৰিবলৈ শিক্ষা বিভাগে লোৱা সিদ্ধান্তৰ বিৰোধিতা কৰিছে সদৌ অসম ছাত্ৰ সন্থা(আছু)-ই ৷ উল্লেখ্য যে শিক্ষা মন্ত্ৰী হিমন্ত বিশ্ব শৰ্মাই অলপতে কৰা ঘোষণা অনুসৰি এইবাৰ ৰাজ্যৰ ১৭খন বিদ্যালয়ৰ পৰা এজনো ছাত্ৰ হাইস্কুল শিক্ষান্ত পৰীক্ষাত উত্তীৰ্ণ নহ'ল ৷ এই স্কুলসমূহ বন্ধ কৰি এইসমূহত নিয়োজিত শিক্ষক-শিক্ষয়িত্ৰীসকলক আন স্কুললৈ বদলিৰ সিদ্ধান্ত লৈছে শিক্ষা বিভাগে ৷ সম্প্ৰতি আছুৱে শিক্ষা বিভাগৰ এই সিদ্ধান্তৰ বিৰোধিতা কৰিছে ৷ স্কুল বন্ধ কৰাৰ এই সিদ্ধান্তৰ বিৰোধিতা কৰি আছুৰ সাধাৰণ সম্পাদক লুৰিনজ্যোতি গগৈয়ে দ্যা ছেণ্টিনেল ডিজিটেলক কয় যে চৰকাৰৰ এই সিদ্ধান্ত অতি দুঃখদায়ক সিদ্ধান্ত ৷ অ-কৃতকাৰ্যতাৰ বাবে ছাত্ৰ-ছাত্ৰীসকল দায়ী নহয় বুলি মন্তব্য কৰি আছুৰ সাধাৰণ সম্পাদকজনে লগতে, "যি সময়ত শিক্ষা ব্যৱস্থা অধিকৰ পৰা অধিক ছাত্ৰ-ছাত্ৰীকেন্দ্ৰিক হৈ পৰিছে ৷ তেনে সময়ত ছাত্ৰ-ছাত্ৰীৰ সমস্যা বুজ ল'ব লাগিব আৰু সমস্যা সমাধান কৰিব লাগিব ৷" গগৈয়ে আৰু কয় যে শিক্ষা বিভাগৰ সিদ্ধান্ত অনুসৰি এই বিদ্যালয়সমূহ বন্ধ হৈ পৰিলে, এইসমূহত অধ্যয়নৰত ছাত্ৰ-ছাত্ৰীসকল গভীৰ সমস্যাৰ সন্মুখীন হ'ব ৷ কাৰণ এই ছাত্ৰ-ছাত্ৰীসকলে নতুন বিদ্যালয়লৈ অহা-যোৱাৰ ক্ষেত্ৰত অসুবিধাৰ সন্মুখীন হোৱাৰ আশংকা ব্যক্ত কৰে আছুৰ সাধাৰণ সম্পাদক গগৈয়ে ৷ বিষয়টো সন্দৰ্ভত তেওঁ আকৌ কয় যে এই বিদ্যালয়সমূহ বন্ধ হ'লে ছাত্ৰ-ছাত্ৰীসকলে ১০কিলোমিটাৰ পৰ্যন্ত খোজকাঢ়ি আন বিদ্যালয়লৈ যাবলগা হ'ব পাৰে ৷ কাৰণ দুৰ্গম বা পিছপৰা অঞ্চলৰ বাসিন্দাসকলৰ অধিকাংশৰে আৰ্থিক অৱস্থা সচ্ছল নহয় ৷ গগৈয়ে স্পষ্ট কৰি দিয়ে বিদ্যালয় বন্ধৰ সিদ্ধান্তক আছুৱে কেতিয়াও মানি নলয় ৷
আৰু পঢ়িব পাৰেঃ বাঘজান তৈল ক্ষেত্ৰৰ ভয়াবহ অগ্নিকাণ্ডৰ শেহতীয়া তথ্য