আজি নিশা অসম পাবহি আঠশ ৰেলযাত্ৰীঃ মন্ত্ৰী শৰ্মা
আজি বৃহস্পতিবাৰে নিশা অসমত উপস্থিত হ'বহি প্ৰায় আঠশ ৰেলযাত্ৰী। দুখন ৰেলত এইসকল লোক অসমলৈ আহি আছে। ইয়াৰে দিল্লী-ডিব্ৰুগড় ৰেলত ২১৯ জন আৰু মিজোৰাম অভিমুখী কৃষক শ্ৰমিক ৰেলত অসমৰ ৬২৫ জন যাত্ৰী আহিছে। এইসকল যাত্ৰীয়ে ৰাজ্যৰ বিভিন্ন স্থানৰ ষ্টেচনত নামিব। তেওঁলোকৰ স্বাস্থ্য পৰীক্ষাৰ ব্যৱস্থা কৰিব সংশ্লিষ্ট চৰকাৰী বিষয়া-কৰ্মচাৰীয়ে। এয়া এক প্ৰত্যাহ্বানজনক কাম হব বুলি মন্ত্ৰীজনে সদৰী কৰে। ইয়াৰ পূৰ্বে আজি ডিব্ৰুগড়ত উপস্থিত হ'ল দিল্লীৰ পৰা অহা বিশেষ ৰাজধানী ৰেলখন ৷ যোৱা ১২মে'ত ডিব্ৰুগড় অভিমুখে যাত্ৰা আৰম্ভ কৰা ৰেলখনে আজি পুৱা ৭-৩০বজাত ডিব্ৰুগড় ৰেল ষ্টেচনত প্ৰৱেশ কৰে ।দীঘলীয়া যাত্ৰাৰ অন্তত অন্তিম স্থানত ২৬১জন যাত্ৰী নামে ৷ এই ২৬১যাত্ৰীৰ ৭৪জন ডিব্ৰুগড়ৰ, ১৯জন লখিমপুৰৰ, ৯৭জন তিনিচুকীয়াৰ, ২৮জন ধেমাজিৰ, পাঁচজন শিৱসাগৰৰ, চাৰিজন বিশ্বনাথৰ আৰু ২১ জন চৰাইদেউ জিলাৰ ৷ তদুপৰি ১৩জন চুবুৰীয়া ৰাজ্য অৰুণাচল প্ৰদেশৰ ৷ এই সম্পৰ্কত ৰেলৱেৰ এক সূত্ৰই জনোৱা মতে, লামডিং ষ্টেচনত ৰেলখনৰ পৰা নামে ৪৪জন যাত্ৰীয়ে ৷ এই যাত্ৰীসকলৰ মাজত ১৬জন লামডিঙৰ, আঠজন হোজাইৰ, ছজন কাৰ্বি আংলঙৰ, সাতজন ডিমা হাছাউৰ, পাঁচজন বিশ্বনাথৰ আৰু এজন মৰিগাঁও জিলাৰ মোৰাঝাৰৰ ৷ এই যাত্ৰীসকলৰ স্বাস্থ্য পৰীক্ষাৰ পাছত যাবলৈ দিয়া হয় ৷ এই বিশেষ ৰেলে যাত্ৰাৰ সময়ত অসমৰ পাঁচ ঠাইত ক্ৰমে কোকৰাঝাৰ, গুবাহাটী, লামডিং, মৰিয়নি আৰু ডিব্ৰুগড়ত ৰখায় ৷
আৰু পঢ়িব পাৰেঃ ডিব্ৰুগড়ত উপস্থিত দিল্লীৰ পৰা অহা বিশেষ ৰাজধানী ৰেল