হাইস্কুল শিক্ষান্ত পৰীক্ষাঃ সফললৈ শুভেচ্ছা, অ-সফললৈ উৎসাহবাণী শিক্ষামন্ত্ৰী শৰ্মাৰ
আজি ঘোষিত হাইস্কুল শিক্ষান্ত পৰীক্ষাত কৃতিত্বৰে উত্তীৰ্ণসকলকে ধৰি সকলো সফল ছাত্ৰ-ছাত্ৰীলৈ শুভেচ্ছা আৰু অ-সফলসকললৈ উৎসাহবাণী প্ৰেৰণ কৰিছে শিক্ষা মন্ত্ৰী হিমন্ত বিশ্ব শৰ্মাই ৷ উল্লেখ্য যে ক'ৰ'না মহামাৰীৰ পৰিপ্ৰেক্ষিতত তলাবন্ধ ঘোষিত হোৱাত পূৰ্বৰ তুলনাত এইবাৰ হাইস্কুল শিক্ষান্ত পৰীক্ষাৰ ফলাফল ঘোষণাত কিছু পলম হয় ৷ এইবাৰ মুঠ ৫৯৫নম্বৰ লাভ কৰি ৰাজ্যৰ ভিতৰতে সৰ্বোচ্চ স্থান দখল কৰা দৰঙৰ ধৃতিৰাজ বাস্তৱ কলিতাক প্ৰশংসা কৰি শিক্ষামন্ত্ৰী শৰ্মাই কিছুসময় পূৰ্বে এটা টুইটত কয়, " ৫৯৫নম্বৰ লাভ কৰি এইবাৰ হাইস্কুল শিক্ষান্ত পৰীক্ষাত ৰাজ্যৰ ভিতৰতে সৰ্বোচ্চ স্থান দখল কৰা ধৃতিৰাজ বাস্তৱ কলিতালৈ আন্তৰিক শুভেচ্ছা জ্ঞাপন কৰিলো ৷ সফলতাৰ ধাৰা অব্যাহত ৰাখা ৷ তুমি আৰু বহু দূৰ যাবলৈ বাকী আছে "৷ আন এটা টুইতত শিক্ষা মন্ত্ৰীজনে সকলো সফল ছাত্ৰ-ছাত্ৰীলৈ শুভেচ্ছা জনায় ৷ তদুপৰি তেওঁ টুইটাৰযোগে অ-সফল ছাত্ৰ-ছাত্ৰীসকললৈ উৎসাহবাণী প্ৰেৰণ কৰে ৷ এটা টুইটত তেওঁ কয়, " সকলোকে অভিনন্দন জনাইছো ৷ ফলাফল ভাল কৰিব নোৱৰাসকলে ভাগি নপৰিব ৷"