ৰাজ্যৰ ডিটেনচন কেম্পত বন্দী হৈ থকা বিদেশী সকলক চৰ্ত সাপেক্ষে মুকলি কৰি দিয়াৰ ক্ষেত্ৰত চৰ্ত সমূহ নিৰ্ধাৰণত অসম চৰকাৰে কেন্দ্ৰীয় চৰকাৰৰ পৰামৰ্শ গ্ৰহণ কৰিছে । ১০ মেত উচ্চতম ন্যায়ালয়ে দিয়া নিৰ্দেশনাৰ ভিত্তিত চৰ্ত সমূহ নিৰ্ধাৰণ কৰা হয় ।
ডিটেনচন শিবিৰত থকা বন্দী সকলক কেনেকৈ আবেদন কৰিব লাগিব, মুকলি কৰি দিয়াৰ চৰ্ত আৰোপ অন্যান্য সমূহ জাননীত সন্নিবিষ্ট থাকিব । ৰাজ্যৰ ৬ টা আশ্ৰয় শিবিৰত তিনি বছৰতকৈও অধিক সময় বন্দী হৈ থকা বিদেশী সকলৰ প্ৰকৃত নম্বৰ বিচাৰি উলিয়াবলৈ ব্যস্ত হৈ পৰিছে সীমান্ত অসম আৰক্ষী ।
২০১৯ চনৰ ৩১ জানুৱাৰীলৈকে ৬ টা আশ্ৰয় শিবিৰত ৯৩৮ গৰাকী বিদেশী আছে। আশ্ৰয় শিবিৰ কেইটা গোৱালপাৰা, কোকৰাঝাৰৰ জিলা কাৰাগাৰত আৰু শিলচৰ, ডিব্ৰুগড়, যোৰহাট আৰু তেজপুৰৰ কেন্দ্ৰীয় কাৰাগাৰত আছে।
আশ্ৰয় শিবিৰত ৫ বছৰতকৈ অধিক সময় থকা বিদেশী সকলক চৰ্তসাপেক্ষে মুকলি কৰি দিয়াৰ বাবে অসম চৰকাৰে উচ্চতম ন্যায়ালয়ক এক শপতনামা দাখিল কৰিছিল । সেই সময়ত বিদেশীৰ সংখ্যা আছিল ৩৫ জন । কিন্তু এপেক্স কোৰ্টে এই আবেদন খাৰিজ কৰিছিল ।
১০ মেত উচ্চতম ন্যায়ালয়ে ৩ বছৰতকৈ অধিক সময় অসমৰ ডিটেনচন কেম্পত বন্দী হৈ থকা বিদেশী সকলক চৰ্তসাপেক্ষে মুকলি কৰি দিয়াৰ ক্ষেত্ৰত অনুমতি প্ৰদান কৰে । মুখ্য ন্যায়াধীশ ৰঞ্জন গগৈ আৰু ন্যায়াধীশ সঞ্জীৱ খান্নাৰ বিচাৰপীঠে কিছুমান চৰ্ত সাপেক্ষে মুকলি কৰি দিবলৈ নিৰ্দেশ দিছে । উচ্চতম ন্যায়ালয়ৰ নিৰ্দেশনা পাছতে তৎপৰ হৈ পৰিছে ৰাজ্য চৰকাৰ|
অন্য খবৰৰ বাবে পঢ়ক : শীৰ্ষ বাতৰি