পৰীক্ষাৰ পূৰ্বে প্ৰশ্নকাকত ফাদিল পৰিপ্ৰেক্ষিতত অসম আৰক্ষীৰ উপ-পৰিদৰ্শক পৰীক্ষা বাতিলক লৈ প্ৰতিক্ৰিয়া অব্যাহত আছে ৷ উল্লেখ্য যে ৰাজ্যিক পৰ্যায়ৰ আৰক্ষী নিযুক্তি ব'ৰ্ডে ৫৯৭টা পদত উপ-পৰিদৰ্শক নিযুক্তিৰ বাবে পৰীক্ষাৰ আয়োজন কৰে। কিন্তু কালি অনুষ্ঠিত পৰীক্ষা আৰম্ভ হোৱাৰ পূৰ্বেই ৱাটছএপত প্ৰশ্নকাকত ফাদিল হয় ৷ ইয়াৰ পৰিপ্ৰেক্ষিতত পৰীক্ষা বাতিল কৰা হয় ৷ ইয়াক লৈ প্ৰতিক্ৰিয়া অব্যাহত আছে ৷ বহু মেধাৱী আৰু শাৰীৰিকভাবে সক্ষম ছাত্ৰ-ছাত্ৰীয়ে অনেক আশাৰে পৰীক্ষা দিবলৈ আহি বিমুখ হ'বলগীয়া হয় ৷
ইপিনে, এই পৰীক্ষাৰ প্ৰশ্নকাকত ফাদিলৰ লেখীয়া দুষ্কাৰ্যত লিপ্তক গ্ৰেপ্তাৰ কৰিবলৈ মুখ্যমন্ত্ৰী সৰ্বানন্দ সোণোৱালে অসম আৰক্ষীৰ সঞ্চালকপ্ৰধানক নিৰ্দেশ দিছে ৷ মুখ্যমন্ত্ৰীৰ এই নিৰ্দেশৰ ভিত্তিত আৰক্ষী সঞ্চালকপ্ৰধান ভাস্কৰজ্যোতি মহন্তই অসম আৰক্ষীৰ বিশেষ শাখাৰ মহাপৰিদৰ্শক হীৰেন চন্দ্ৰ নাথক ঘটনাৰ এক সুকীয়া তদন্ত কৰিবলৈ নিৰ্দেশ জাৰি কৰিছে ৷
আনহাতে, ৰাজ্যিক পৰ্যায়ৰ আৰক্ষী নিযুক্তি ব'ৰ্ডৰ অধ্যক্ষ প্ৰদীপ কুমাৰে কয় যে তেওঁক এজন ব্যক্তিয়ে প্ৰশ্নকাকত পৰীক্ষাৰ পূৰ্বেই ফাদিল হোৱাৰ কথা জনায়। " মই দেওবাৰে পুৱা ১২-১৫বজাত মোৰ ম'বাইল ফোনত এজন ব্যক্তিৰ পৰা ফোন পাওঁ ৷ তেওঁ মোক কয় যে তেওঁ দেওবাৰে ১১-১৫বজাত ৱাটছএপত এটা বাৰ্তা পায় ৷ এই বাৰ্তাটোত প্ৰশ্নকাকত আছিল। তেওঁ মোক যিটো নম্বৰৰ এই বাৰ্তা লাভ কৰিছিল, সেই নম্বৰটোও দিয়ে ৷ মই এই কথা বুজা নাই যে প্ৰশ্ন কাকত বিভিন্ন জিলাৰ আৰক্ষীৰ জিম্মাত থকা সত্বেও কেনেদৰে ফাদিল হ'বলৈ পালে-, কুমাৰে এইদৰে কয়।
আৰু পঢ়িব পাৰেঃ উচ্চ পৰ্যায়ৰ সমিতিৰ প্ৰতিবেদনঃ আইনজ্ঞৰ পৰামৰ্শ বিচাৰিব দিছপুৰে