জন্মদিন উপলক্ষে বৰ্ষীয়ান ৰাজনীতিকজনলৈ বিভিন্নজনে শুভেচ্ছা জনাইছে ৷ উল্লেখ্য যে মুলায়েম সিং যাদবে পূৰ্বে দেশৰ প্ৰতিৰক্ষা মন্ত্ৰীৰূপেও কাৰ্যনিৰ্বাহ কৰিছিল ৷ এক বৰ্ণাঢ্য ৰাজনৈতিক জীৱনৰ অধিকাৰী মুলায়েম সিং যাদৱ মাথোঁ ১৫ বছৰ বয়সৰ পৰা ৰাজনীতিৰ সৈতে জড়িত হয় ৷ সেই সময়তে তেওঁ দেশৰ এক বৰ্ণিল ব্যক্তিত্ব ৰাম মনোহৰ লোহিয়াৰ সান্নিধ্য লাভ কৰে ৷ দলীয় নেতা-কৰ্মীৰ মাজত " নেতাজী"-ৰূপে খ্যাত মুলায়েম সিং যাদৱ ৰাজনীতি বিজ্ঞানৰ স্নাতকোত্তৰ ডিগ্ৰীধাৰী হোৱাৰ লগতে বি এড ডিগ্ৰীধাৰীও ৷
মুলায়েমৰ একাংশ ঘনিষ্ঠৰ মতে, তেওঁ জীৱনৰ আৰম্ভণিতে মল্লযুঁজাৰু হোৱাৰ সপোন দেখিছিল ৷ সেয়ে তেওঁক "পালোৱান'' বুলিও বহুজনে কয় ৷
ৰাম মনোহৰ লোহিয়াৰ জীৱনাদৰ্শৰ দ্বাৰা মুলায়েম প্ৰভাৱিত হৈছিল ৷ লোহিয়াই সমতাৰ ভিত্তিত এখন ভাৰত নিৰ্মাণৰ সপোন দেখিছিল ৷ তেওঁৰ আদৰ্শৰ দ্বাৰা অনুপ্ৰাণিত হৈ মুলায়েমে নিম্নবৰ্ণৰ হিন্দু আৰু সংখ্যালঘু তথা মুছলমানসকলৰ অধিকাৰ ৰক্ষাৰ বাবে মাত মাতি আহিছে ৷
উল্লেখ্য যে প্ৰথমবাৰৰ বাবে ১৯৬৭ত মুলায়েম উত্তৰ প্ৰদেশ বিধানসভালৈ নিৰ্বাচিত হয় ৷ সেইবাৰ তেওঁ যশৱন্ত নগৰ সমষ্টিৰ পৰা বিধানসভালৈ নিৰ্বাচিত হৈছিল ৷