অলপতে চীনা সেনাই অপহৰণ কৰি নিয়া পাঁচজন অৰুণাচলী যুৱকক মোকলাই অনাৰ দাবী উত্থাপন কৰি সৱৰ হৈ উঠিছে অসমৰ কংগ্ৰেছ সাংসদ গৌৰৱ গগৈ ৷ উল্লেখ্য যে এই পাঁচজন অৰুণাচলী যুৱক চীনা সেনাৰ দ্বাৰা অপহৃত হোৱাৰ তথ্য প্ৰথমে পোহৰলৈ আনে ৰাজ্যখনৰ ৰাজনীতিক নিনিং এৰিঙে ৷
ইয়াৰ পাছতে বিষয়টোৱে দেশজুৰি আলোড়নৰ সৃষ্টি কৰে ৷ লাডাখ সীমান্তত উত্তেজনা বিৰাজ কৰি থকাৰ সময়তে সংঘটিত এই ঘটনাক কোনেও সহজভাবে ল'ব পৰা নাই ৷ এনে অৱস্থাতে অপহৃত যুৱককেইজনক অক্ষত অৱস্থাত উদ্ধাৰৰ ব্যৱস্থা কৰিবলৈ কেন্দ্ৰীয় চৰকাৰক দাবী জনাইছে সাংসদ গৌৰৱে ৷ এই দাবী জনাই তেওঁ দেশৰ প্ৰতিৰক্ষা মন্ত্ৰীলৈ এখন পত্ৰ প্ৰেৰণ কৰিছে ৷ পত্ৰখনত তেওঁ লিখিছে, " এটা অতি গুৰুত্বপূৰ্ণ বিষয় লৈ আপোনালৈ এই পত্ৰ প্ৰেৰণ কৰিবলগীয়া হ'ল ৷
চিকাৰ কৰিবলৈ যোৱা অৱস্থাত অৰুণাচল প্ৰদেশৰ পাঁচজন যুৱক অপহৃত হৈছে ৷ যুৱককেইজনক চীনৰ পিপ'লছ লিবাৰেচন আৰ্মীয়ে অপহৰণ কৰা বুলি তেওঁলোকৰ পৰিয়ালে অভিযোগ উত্থাপন কৰিছে ৷ মই যুৱককেইজনক সোঁশৰীৰেৰে উভতাই অনাৰ পদক্ষেপ ল'বলৈ দাবী জনাইছো"৷
আৰু পঢ়িব পাৰেঃ চলিত বৰ্ষত ১৪হেজাৰ লোকক নিযুক্তি দিব এছ বি আইয়ে